ၵူၼ်းတၢင်ႇတီႈ ဢၼ်ႁဵတ်းဝႂ်ၶၢမ်ႈမိူင်း (ပပ်ႉလႅင်) တီႈၽၵ်းတူလူင် ဝဵင်းၼမ်ႉၽႃႈ (ၶျိၼ်းသူၺ်ႇႁေႃႇ) လႆႈပၼ်ထိုင် 1 ၵေႃႉလႂ် 1,000 ယႂၼ် (ငိုၼ်းၶႄႇ) ။

တႄႇဢဝ် ဝၼ်းတီႈ 8/1/2023 ၼၼ်ႉမႃး ယူႇတီႈ လူင်ပွင်ၸိုင်ႈၶႄႇ ပိုတ်ႇၽၵ်းတူမိူင်းၸွမ်းလႅၼ်လိၼ်တႆး – ၶႄႇ မႃးပဵၼ်တၢင်းၵၢၼ်။ ၵူၺ်းၵႃႈ ယူႇတီႈ ၽူႈမီးပုၼ်ႈၽွၼ်း တၢင်းၾင်ႇမိူင်းႁူမ်ႈတုမ် တီႈၽၵ်းတူလူင် ဝဵင်းၼမ်ႉၽႃႈ ၼႂ်းၸိုင်ႈတႆးပွတ်းႁွင်ႇသမ်ႉ ၵဵပ်းငိုၼ်းၵူၼ်းမိူင်းၸိူဝ်း ႁဵတ်းဝႂ်ၶၢမ်ႈမိူင်း ၊ ၵူၼ်းၸိူဝ်းဢမ်ႇၸႂ်ႈၵူၼ်းပိုၼ်ႉတီႈ မိူၼ်ၼင်ႇ ဝဵင်းၼမ်ႉၽႃႈ၊ လၢဝ်ႇၵၢႆး၊ ႁူဝ်ပၢင်ႇလႄႈ ၵုၼ်လူင် ၸိူဝ်းၼႆႉ ၊ မၢင်ၵေႃႉ လႆႈပၼ်ၵႃႈႁဵတ်းဝႂ်ၶၢမ်ႈမိူင်းထိုင် 1,000 ယႂၼ် (မႅၼ်ႈငိုၼ်းမၢၼ်ႈမွၵ်ႈ 2 သႅၼ်ပျႃး)။  

ၵူၼ်းဝဵင်းၼမ်ႉၽႃႈ လၢတ်ႈတီႈၽူႈတွႆႇႁွၵ်ႈဝႃႈ – “ပေႃးပဵၼ်ၵူၼ်းတၢင်း တူင်ႇဝဵင်းၶျိၼ်းသူၺ်ႇႁေႃႇ၊ လၢဝ်ႇၵၢႆး၊ ႁူဝ်ပၢင်ႇလႄႈ ၵုၼ်လူင် ၸိူဝ်းၼႆႉတႄႉ ပေႃးၵႂႃႇႁဵတ်းၸိုင် လႆႈပၼ် 40 ယႂၼ်။ သင်ဢမ်ႇၸႂ်ႈၵူၼ်းပိုၼ်ႉတီႈ ၼႂ်း 4 ၸႄႈဝဵင်း ၼႆႉ မိူၼ်ၼင်ႇ သႅၼ်ဝီ၊ လႃႈသဵဝ်ႈ တႄႇၵႂႃႇတၢင်ႇၸႄႈဝဵင်း ၸိူဝ်းၼၼ်ႉသမ်ႉ ၵမ်ႉၶဝ်ၶႂ်ႈယွၼ်း ဢေႇသုတ်း 300 ယႂၼ် – 500 ယႂၼ် မၢင်ၵေႃႉ ထိုင် 700 – 800 ယႂၼ်။ မၢင်ၸိူဝ်း ၸၢင်ႈၵူၼ်းၵၢင်ႁဵတ်းပၼ် လႆႈပၼ်ထိုင် 1,000 ယႂၼ် ၸိူဝ်းၼႆႉၵေႃႈမီးဢေႃႈ”- ဝႃႈၼႆ။

လွင်ႈၼႆႉ ယူႇတီႈ ၽူႈမီးပုၼ်ႈၽွၼ်းတၢင်းၾင်ႇမိူင်းႁူမ်ႈတုမ် ဢထမ်ႇမၵဵပ်းငိုၼ်း ၼမ်ၸိူင်ႉၼႆၼႆႉ ၶဝ်ဢမ်ႇၵဵပ်းၸွမ်း ၼင်ႇ ပၵ်းပိူင်မီးဝႆႉ ၵဵပ်းၸွမ်းၼင်ႇၵမ်ႉၸႂ်ၶဝ် ၶႂ်ႈယွၼ်းၼၼ်ႉၵူၺ်း ၵူၼ်းပိုၼ်ႉတီႈ ဢွၼ်ၵၼ်ႁၼ်ထိုင်ၵၼ်ဝႆႉ ၸိူင်ႉ ၼႆ။  

“ဢၼ်ၶဝ် ယွၼ်းငိုၼ်း ၵႃႈႁဵတ်းဝႂ်ၶၢမ်ႈမိူင်းၼႆႉ ၶဝ်ယွၼ်းဢမ်ႇမီးပၵ်းမီးပိူင် ၵမ်ႉၸႂ်ၶဝ် ၶႂ်ႈယွၼ်းၵူၺ်း။ တၢင်းၾင်ႇမိူင်းၶႄႇတႄႉ ပိူၼ်ႈဢမ်ႇပေႃးၸႅတ်ႈထၢမ်သင် သင်ဝႃႈ ႁဝ်းၶႃႈ မီးဝႂ်ၶၢမ်ႈမိူင်းယဝ်ႉၼႆၸိုင် ၶဝ်တူၺ်းသေၵေႃႈ ပၼ်ၶဝ်ႈၵႂႃႇ ယဝ်ႉ။ ဢၼ်ယၢပ်ႇၽိုတ်ႇတႄႉ တၢင်းမိူင်းႁူမ်ႈတုမ်ႁဝ်းၼႆႉၵူၺ်း ၸူဝ်ႈသိုၵ်းမၢၼ်ႈ ယိုတ်းမိူင်းမႃးၼႆႉ ယိုင်ႈၶႅၼ်း ဢထမ်ႇမ ယွၼ်းငိုၼ်းၼမ်ၼၼ်ႉၶႃႈယဝ်ႉ”- ၵူၼ်းပိုၼ်ႉတီႈ ဝဵင်းၼမ်ႉၽႃႈ သိုပ်ႇလၢတ်ႈၼႄၼင်ႇၼႆ။

မိူၼ်ၼႆ ၼင်ႇၵဝ်ႇ တီႈၽၵ်းတူလူင် (သူၺ်ႇၼၢၼ်းတေႃႇ) ဝဵင်းမူႇၸေႊ လႅၼ်လိၼ်တႆး – ၶႄႇ ၼၼ်ႉၵေႃႈ ၽူႈမီးပုၼ်ႈၽွၼ်း တၢင်းၾင်ႇမိူင်းႁူမ်ႈတုမ်ၼႆႉ ဢထမ်ႇမ ၵဵပ်းငိုၼ်း ၵႃႈႁဵတ်းဝႂ်ၶၢမ်ႈမိူင်းၵမ်းလဵဝ် ပေႃးၵႂႃႇႁဵတ်းႁင်းၵူၼ်း  1 ၵေႃႉလႂ် 10,000 ပျႃး 20,000 ပျႃး တေလႆႈပႂ်ႉႁိုင် ဝၼ်းသွင်ဝၼ်း သင်ဝႃႈ ၸၢင်ႈၵူၼ်းၵၢင်ႁဵတ်းပၼ်သမ်ႉ 50,000 ပျႃး လႆႈၵမ်းလဵဝ်။ ၵူႈပွၵ်ႈ မိူဝ်ႈပႆႇပဵၼ်ၶူဝ်ႊဝိတ်ႉ 19 ၼၼ်ႉ 1 ၵေႃႉ လႆႈပၼ် 500 ပျႃးၵူၺ်း ဝႃႈၼႆ။

ၽၵ်းတူလႅၼ်လိၼ်တႆး – ၶႄႇၼႆႉ ပိၵ်ႉဢိုတ်းမႃး ၶၢဝ်းတၢင်းၸမ် 3 ပီ တႄႇဢဝ် ဝၼ်းတီႈ 1/4/2020 တေႃႇထိုင် 8/1/2023 ၼႆႉ ယွၼ်ႉတၢင်းပဵၼ်ၶူဝ်ႊဝိတ်ႉ 19 ၽႄႈလၢမ်းႁႅင်း ၼႆယဝ်ႉ။