ဝၼ်းသၢၼ်ၶတ်းယႃႈမဝ်းၵမ်လုမ်ႈၾႃႉ ဝၼ်းတီႈ 26 ၵျုၼ်ႊၼႆႉ သိုၵ်းမၢၼ်ႈၶၢၼ်းၵူၼ်းမိူင်းတူၼ်ႈတီး ပႃးၸဵမ် လုၵ်ႈဢွၼ်ႇႁူင်းႁဵၼ်း ၵႂႃႇၶဝ်ႈႁူမ်ႈ ပၢင်ၽဝ်ယႃႈမဝ်းၵမ် တီႈပၢင်ႇႁူင်းၾႆးမိၼ် ဢဝေႇယႃႇ ဝဵင်းတူၼ်ႈတီး ႁဵတ်းႁႂ်ႈလုၵ်ႈႁဵၼ်းမဝ်းလူမ်ႉတင်းၼမ်ထိုင်တီႈလႆႈႁၢမ်သူင်ႇႁူင်းယႃ။

တီႈပၢင်ၽဝ်ယႃႈမဝ်းၵမ်ၼၼ်ႉ သိုၵ်းမၢၼ်ႈၶၢၼ်းႁွင်ႉလုၵ်ႈႁဵၼ်း ၸၼ်ႉ7 ၸၼ်ႉ 8 တီႈႁူင်းႁဵၼ်းၸၼ်ႉသုင်မၢႆ 2 မႃးၶဝ်ႈႁူမ်ႈၸွမ်း။ ဢိင်ၼိူဝ် လႅတ်ႇမႆႈႁႅင်း၊ မဵၼ်ဢၢႆၵႂၼ်းဢၼ်ၽဝ်ယႃႈမဝ်းၵမ်ၼၼ်ႉသေ လုၵ်ႈဢွၼ်ႇႁူင်းႁဵၼ်းမဝ်းလူမ်ႉ 30 ပၢႆ။ လႆႈႁၢမ်သူင်ႇႁူင်းယႃ 13 ၵေႃႉ။

လုၵ်ႈၸုမ်းၶႂၢႆႇလႃပႄလႅင် ဢၼ်ၸွႆႈထႅမ်ဢဝ်လုၵ်ႈဢွၼ်ႇသူင်ႇႁူင်းယႃၼၼ်ႉလၢတ်ႈတီႈၽူႈတွႆႇႁွၵ်ႈဝႃႈ -“ၶဝ်လႆႈမႃးၸဝ်ႉၼႃႇၶႃႈဢိူဝ်ႈ။ ဢမ်ႇလႆႈၵိၼ်ၶဝ်ႈမႃးႁေ သမ်ႉမႃးၸုၵ်းၼႂ်းလႅတ်ႇမႆႈလႄႈ ဢဝ်မဝ်းလူမ်ႉ ၸိူင်ႉၼၼ်ႉၵူၺ်းၶႃႈ။ မဝ်းလူမ်ႉ 30 ပၢႆဢေႃႈ။ ဢၼ်လႆႈဢဝ်သူင်ႇႁူင်းယႃတႄႉ 13 ၵေႃႉၶႃႈ။ ၸိူဝ်းၶဝ်- မႃးၼႂ်းႁူဝ်ၶေႃႈ ၾၢႆႇလဵပ်ႈႁဵၼ်း ၼႆဢေႃႈၼေႃႈ။ ”- ဝႃႈၼႆ။

ၵူၼ်းပိုၼ်ႉတီႈဢၼ်ထုၵ်ႇၶၢၼ်းၵႂႃႇၶဝ်ႈႁူမ်ႈၼၼ်ႉၵေႃႉၼိုင်ႈၵေႃႈလၢတ်ႈဝႃႈ – ဢၢႆၵႂၼ်းၽဝ်ယႃႈၼၼ်ႉ မဵၼ်ႁႅင်းဢႃးလႃးလႄႈ ႁဵတ်းႁႂ်ႈတွင်ႉၶူၼ်ႉ ၸႂ်ၸႃႉ ဝႃႈၼႆ။

“လုၵ်ႈဢွၼ်ႇမဝ်းလူမ်ႉၼမ်ၼႃႇၶႃႈ။ မႆႈၵေႃႈမႆႈ မဵၼ်ၵေႃႈမဵၼ်ၶႃႈလူးၼေႃႈ။ လုၵ်ႈဢွၼ်ႇတေႁဵတ်းႁိုဝ်ၶၢမ်ႇဢၢႆမၼ်းလႆႈၼႄ။ တီႈတႄႉမၼ်း ပဵၼ်တီႈဢၼ်လုၵ်ႈဢွၼ်ႇဢမ်ႇထုၵ်ႇလီမႃးၶႃႈလူင်။ ၶဝ်ဢမ်ႇထုၵ်ႇလီၶၢၼ်းလုၵ်ႈဢွၼ်ႇမႃးၸွမ်း။ ပီပူၼ်ႉမႃး လုၵ်ႈဢွၼ်ႇဢမ်ႇမႃးၶႃႈ တီႈပၢင်ၽဝ်ယႃႈၼႆႉ”- ၵူၼ်းမႃးၶဝ်ႈႁူမ်ႈပၢင် လၢတ်ႈၼင်ႇၼႆ။

ပီပူၼ်ႉမႃးၵေႃႈ ပေႃးပဵၼ်ဝၼ်းသၢၼ်ၶတ်းယႃႈမဝ်းၵမ်ၼႆ ႁွင်ႈၵၢၼ်ၾၢႆႇၽဵဝ်ႈယႃႈမဝ်းၵမ် မႃးၸတ်းပၢင်ၽဝ်ယႃႈတီႈပၢင်ႇႁူင်းၾႆးမိၼ်ၼႆႉၵူႈပီ။ ၵႂၼ်းမႆႈယႃႈၼႆႉမဵၼ်ႁႅင်းလႄႈ ၵူၼ်းပိုၼ်ႉတီႈႁိမ်းႁွမ်း တုၵ်းယွၼ်းႁႂ်ႈၶၢႆႉၵႂႃႇႁဵတ်းတၢင်ႇတီႈ တီႈၵႆၵူၼ်း ဝႃႈၼႆသေတႃႉ ၾၢႆႇၽွင်းငမ်းၵူႈသိုပ်ႇၵူႈပၢၼ်ဢမ်ႇထွမ်ႇသဵင်ၵၢင်ၸႂ်ၵူၼ်းမိူင်း၊ တေႃႇထိုင်ဝၼ်းမိူဝ်ႈၼႆႉၵေႃႈတိုၵ်ႉသိုပ်ႇၽဝ်ယူႇတီႈပၢင်ႇႁူင်းၾႆးမိၼ်ၼၼ်ႉ။