သိုၵ်းမၢၼ်ႈၵဵပ်းသဵၼ်ႈမၢႆႁူဝ်ၵူၼ်းတွၼ်ႈတႃႇပၢင်လိူၵ်ႈတင်ႈ ဢၼ်ၶဝ်ဢၢၼ်းဢွၼ်ၼမ်းၸတ်းႁဵတ်း၊ ယၢမ်းလဵဝ်သိုၵ်းမၢၼ်ႈပိုၼ်ၽၢဝ်ႇဝႃႈ ၵဵပ်းယဝ်ႉ 90 ပိူဝ်ႊသႅၼ်ႊယဝ်ႉသေတႃႉ တေၸတ်းပၢင်လိူၵ်ႈတင်ႈမိူဝ်ႈလႂ်လၢႆးလႂ်ၵေႃႈပႆႇပိုၼ်ၽၢဝ်ႇတႅတ်ႈတေႃး။
ၵူၼ်းမိူင်းတႃႈၵုင်ႈ ဢၼ်ၶဝ်ႈပႃးၼႂ်းၵၢၼ်ၵဵပ်းသဵၼ်ႈမၢႆႁူဝ်ၵူၼ်းၵေႃႉၼိုင်ႈလၢတ်ႈတီႈၶၢဝ်ႇ RFA ဝႃႈ -“ယၢမ်းလဵဝ် ငဝ်းလၢႆးဝၢၼ်ႈမိူင်းသုၵ်ႉယုင်ႈ ၊ သဵၼ်ႈမၢႆႁူဝ်ႁိူၼ်းဢမ်ႇတႅတ်ႈတေႃး၊ သိုၵ်းမၢၼ်ႈလိုပ်ႈလမ်းတီႉၺွပ်းလႄႈ ၵူၼ်းၼုမ်ႇဢၼ်လႆႈပၢႆႈၶဝ်ႈထိူၼ်ႇ၊ ပၢႆႈၵႂႃႇယူႇၼွၵ်ႈမိူင်း၊ ၵမ်ႈၽွင်ႈၶဝ်ႈယူႇၼႂ်းၶွၵ်ႈ၊ ၵူၼ်းဢၼ်တၢႆၼႂ်းပၢင်တိုၵ်းၵေႃႈၼမ်၊ တၢႆၽွင်းၼႄၵၢင်ၸႂ်သၢၼ်ၶတ်းသိုၵ်းမၢၼ်ႈၼၼ်ႉၵေႃႈၼမ်လႄႈ တႃႇတေၵဵပ်းလႆႈသဵၼ်ႈမၢႆတႅတ်ႈတေႃးဢမ်ႇငၢႆႈငၢႆႈ။ ဢမ်ႇဝႃႈတင်းမူတ်းလႃႈ တႃႇ 25 ပိူဝ်ႊသႅၼ်ႊၵူၺ်းၵေႃႈယင်းဢမ်ႇငၢႆႈ ” – ဝႃႈၼႆ။
မိူဝ်ႈႁူဝ်ပီ 2023 ၼႆ့ သိုၵ်းမၢၼ်ႈ ပိုၼ်ၽၢဝ်ႇဝႃႈ တေၸတ်းပၢင်လိူၵ်ႈတင်ႈမႂ်ႇ ၸွမ်းၼင်ႇ ပိူင် PR ဝႃႈၼႆသေတႃ့ ပေႃးတူၺ်းငဝ်းလၢႆးတႄႉ ၼႂ်းပီၼႆ့ လႅပ်ႈတေဢမ်ႇပဵၼ်လႆႈ ၼႆ ၽူႈလဵပ်းႁဵၼ်းၵၢၼ်မိူင်းၶဝ် ထတ်းသၢင်ဝႆ့ ၼင်ႇၼႆ။
ယၢမ်းလဵဝ် တႃႇၶဝ်ႈပၢင်လိူၵ်ႈတင်ႈမႂ်ႇၼႆ့ ဢၼ်မႃးယိုၼ်ႈတၢင်ႇဝႆ့ တီႈၵေႃႇမသိၼ်ႇပၢင်လိူၵ်ႈတင်ႈ မိူင်းႁူမ်ႈတုမ်ႇ UEC ၼႆ့ မီး 50 ပႃႇတီႇ ၊ ဢၼ်မႃးယိုၼ်ႈတၢင်ႇ တႃႇတင်ႈပႃႇတီႇမႂ်ႇသမ့် မီး 13 ပႃႇတီႇ ၊ ဢၼ်တေၶဝ်ႈပၢင်လိူၵ်ႈတင်ႈမႂ်ႇၼႆ့ မီးဝႆ့ 63 ပႃႇတီႇ ။ ၼႂ်းၼၼ့် ပႃးပႃႇတီႇ သိူဝ်ၽိူၵ်ႇ ႁိုဝ် SNDP တႄႉၶဝ်ႈပႃးဝႆႉၸဵမ်ပိုင်း၊ ၵူၺ်းၵႃႈပႃႇတီႇႁူဝ်သိူဝ် ႁိုဝ် SNLD တႄ့ ဢမ်ႇယွမ်းတၢင်ႇမၢႆၾၢင်ပႃႇတီႇၶိုၼ်းလႄႈ ထုၵ်ႇသိုၵ်းမၢၼ်ႈ ပိုၼ်ၽၢဝ်ႇယႃ့ပႃႇတီႇပႅတ်ႈ ၼႆယဝ့်။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ