ရူတ်ႉၶိူင်ႈ ပဵၼ်းၽေးၵိုင်ႉၵၢင်ႉ ၽႃႇၵၼ်တီႈသႅၼ်ဝီ တၢႆ 1 မၢတ်ႇၸဵပ်း 2 ။
မိူဝ်ႈဝႃး ဝၼ်းတီႈ 24/6/2023 ယၢမ်းႁူဝ်ၶမ်ႈ 5 မူင်းၼၼ်ႉ ရူတ်ႉၶိူင်ႈၽႃႇၵၼ် ၼိူဝ်သဵၼ်ႈတၢင်းလူင် သႅၼ်ဝီ – ၵုၼ်လူင် ၾၢႆႇၼႃႈ ဝတ်ႉဝၢၼ်ႈႁူဝ်မိူင်း ၸႄႈဝဵင်းသႅၼ်ဝီ မီးၵူၼ်းမၢတ်ႇၸဵပ်း 2 ၵေႃႉ လူႉတၢႆထင်တီႈၵေႃႉၼိုင်ႈ။
ၸုမ်းၸွႆႈတူင်ႇဝူင်းၵူၼ်းသႅၼ်ဝီ(အနိူင်းမဲ့)လၢတ်ႈတီႈၽူႈတွႆႇႁွၵ်ႈဝႃႈ -“ၸႂ်ႈဢေႃႈ ၶဝ်ဢမ်ႇၸႂ်ႈၵူၼ်းဝၢၼ်ႈလဵဝ်ၵၼ် ဝၢၼ်ႈၶဝ်ၵေႃႈ ဢမ်ႇပေႃးၵႆၵၼ်ၵႃႈႁိုဝ်ၶႃႈ။ၵူၺ်းၼႃႇ ၶဝ်ႁဵတ်းႁိုဝ်ၽႃႇၵၼ်ႁၢဝ်ႈႁႅင်းၸိူင်ႉၼႆတႄႉဢမ်ႇႁူႉ။လုင်းၵေႃႉၼိုင်ႈတႄႉ ၵွၵ်းႁူဝ်မၼ်း မၢတ်ႇၸဵပ်းၼမ်လႄႈ လူႉတၢႆထင်တီႈဢေႃႈ ဢၼ်ၵိုတ်းသွင်ၵေႃႉၼၼ်ႉတႄႉ မၢတ်ႇၸဵပ်းၸွမ်းႁူဝ်မႃႇၸွမ်းၶႅၼ်ၸိူဝ်းၼႆႉၵူၺ်းၶႃႈ ႁၼ်ၶဝ်ပႆလႆႈယူႇ” – ဝႃႈၼႆ။
ၵေႃႉဢၼ်လူႉတၢႆၵႂႃႇၼႆႉ ၸိုဝ်ႈ လုင်းသၢင်ႇဢေး ဢႃယု 63 ယူႇဝၢၼ်ႈၼႃးၶိူဝ်း ဢိူင်ႇၸႄႈဢူ ၸႄႈဝဵင်းသႅၼ်ဝီ မိူဝ်ႈၼႆႉ ၸုမ်းၸွႆႈတူင်ႇဝူင်းၵူၼ်း ။ၵူၼ်းသွင်ၵေႃႉဢၼ်ၸဵပ်းမၢတ်ႇသမ်ႉ ပဵၼ်ၵူၼ်းဝၢၼ်ႈမူလွတ်ႈ ဢိူင်ႇပၢင်ႇလေႃႉ ၸႄႈဝဵင်းသႅၼ်ဝီ ။
ၵူၼ်းၼႂ်းပိုၼ်ႉတီႈသႅၼ်ဝီၵေႃႉၼိုင်ႈလၢတ်ႈဝႃႈ -“ ၵူၼ်းၶီႇရူတ်ႉၶိူင်ႈမိူင်းႁဝ်းၵမ်ႈၼမ် ဢမ်ႇၵႆႉသႂ်ႇ မၢၵ်ႇႁူဝ်သင်ႇၶႄႇ ပေႃးပဵၼ်ၽေးၵိုင်ႉၵၢင်ႉမႃးၵေႃႈ တိူဝ်ႉႁူဝ်သေ တၢႆၵမ်ႈၼမ်ယဝ်ႉ။ဢမ်ႇတၢႆၵေႃႈ ဢမ်ႇမိူၼ်ၵဝ်ႇယဝ်ႉ ပေႃးတိူဝ်ႉႁူဝ်။ယွၼ်ႉၼၼ် လီလႆႈ တိုဝ်းမၢၵ်ႇႁူဝ်ရူတ်ႉၶိူင်ႈဢေႃႈ ၵႂႃႇလႂ်ၵေႃႈ ” – ဝႃႈၼႆ။
မိူဝ်ႈဝၼ်းတီႈ 21/6/2023 ၼၼ်ႉၵေႃႈ ထေႃႈလမ်းၼိုင်ႈ ပိၼ်ႈ ၽွင်းၵႂႃႇႁဵတ်းသူၼ် ႁိမ်းဝၢၼ်ႈႁူဝ်မိူင်း ဢိူင်ႇၸႄႈဢူ ၼႂ်းၸႄႈဝဵင်းသဵၼ်ဝီ မီးၵူၼ်းမၢတ်ႇၸဵပ်း 3 ၵေႃႉ လူ့တၢႆထင်တီႈ 1 ၵေႃႉ ။
