သိုၵ်းမၢၼ်ႈ ပၼ်လုၵ်ႈႁဵၼ်းလဵၼ်ႈၵွင်ႈ ႁဵတ်းႁႂ်ႈၵွင်ႈလၼ်ႇ

သိုၵ်းမၢၼ်ႈ မဝ်းလဝ်ႈ ၵေႃႉၼိုင်ႈ ဢၼ်ပႂ်ႉဢဝ်ႁူမ်ႇလူမ်ႈ ဝႆႉတီႈႁူင်းႁဵၼ်းလူင်ပွင်ၸိုင်ႈ တီႈဝဵင်းတႃႈၶီႈလဵၵ်းၼၼ်ႉ ပၼ်လုၵ်ႈ ႁဵၼ်းၸၢႆးလဵၼ်ႈၵွင်ႈ ႁဵတ်းႁႂ်ႈၵၼ်းၵွင်ႈလၼ်ႇသေ မၢၵ်ႇၵွင်ႈလႆႈလၼ်တိူဝ်ႉသႂ်ႇၶႃ လႆႈတိူဝ်ႉမၢတ်ႇၸဵပ်း။

ဝၼ်းတီႈ 22/6/2023 ယၢမ်းၵၢင်ဝၼ်းမွၵ်ႈ 12 မူင်း သိုၵ်းမၢၼ်ႈ မဝ်းလဝ်ႈ ၵေႃႉၼိုင်ႈ ပႂ်ႉဢဝ်ႁူမ်ႇလူမ်ႈဝႆႉတီႈ ၼႂ်း ဝၢင်းႁူင်းႁဵၼ်းၸၼ်ႉသုင် ပွၵ်ႉမၢၵ်ႇၵႃႇႁူဝ်ၶမ်း ဝဵင်းတႃႈၶီႈလဵၵ်း ၸိုင်ႈတႆးပွတ်းဢွၵ်ႇၶူင်း လႅၼ်လိၼ်တႆး – ထႆး ၼႆႉ ပၼ်လုၵ်ႈ ႁဵၼ်းၸၢႆး ဢႃယု 8 ၶူပ်ႇ လဵၼ်ႈၵွင်ႈသေ ႁဵတ်းႁႂ်ႈၵၼ်းၵွင်ႈလၼ်ႇ မၢၵ်ႇၵွင်ႈလၼ်တိူဝ်ႉသႂ်ႇ တီႈၶႃမၼ်း ၸၢႆး ၼႆယဝ်ႉ။

ၵူၼ်းပိုၼ်ႉတီႈ ဝဵင်းတႃႈၶီႈလဵၵ်း လၢတ်ႈတီႈၽူႈတွႆႇႁွၵ်ႈဝႃႈ – “ၸႂ်ႈၶႃႈဢေႃႈ သိုၵ်းမၢၼ်ႈ ဢၼ်ပႂ်ႉဢဝ် ႁူမ်ႇလူမ်ႈတီႈႁူင်းႁဵၼ်း ၼၼ်ႉ မၼ်းမဝ်းလဝ်ႈသေ ပၼ်လုၵ်ႈဢွၼ်ႇလဵၼ်ႈၵွင်ႈမၼ်း ႁဵတ်းၼၼ်သေ ဢဝ်ၵွင်ႈလၼ်ႇ မၢၵ်ႇၵွင်ႈလႆလၼ်တိူဝ်ႉသႂ်ႇတီႈ ၶႃမၼ်းၸၢႆး။ ဝၢႆးၵွင်ႈလၼ်ႇယဝ်ႉၼၼ်ႉ သိုၵ်းမၢၼ်ႈၶဝ် ႁွင်ႉဢဝ်လုၵ်ႈဢွၼ်ႇၼၼ်ႉ ၵႂႃႇၼႂ်းတပ်ႉၵမ်းလဵဝ် ထၢင်ႇတႄႉ ၶဝ်ဢဝ် ၵႂႃႇ ယူတ်းယႃပၼ်ၶႃႈယူဝ်ႉ”- ဝႃႈၼႆ။

ဢိင်ၼိူဝ် လွင်ႈပိူင်ပဵၼ်ၼႆႉသေ ၸိူဝ်းပေႃႈမႄႈလုၵ်ႈႁဵၼ်း ဢွၼ်ၵၼ်ထတ်းသၢင်ဝႃႈ သိုၵ်းမၢၼ်ႈ ဢၼ်ပႂ်ႉဢဝ်ႁူမ်ႇလူမ်ႈ တီႈႁူင်းႁဵၼ်းၼႆႉ မဝ်းလဝ်ႈသေ မႃးပႂ်ႉၸိူင်ႉၼႆၼႆႉ မၼ်းဢမ်ႇထုၵ်ႇလီပဵၼ် ယဝ်ႉၵေႃႈ ဢမ်ႇထုၵ်ႇလီပၼ်လုၵ်ႈ ဢွၼ်ႇ ယိပ်းၵွင်ႈလဵၼ်ႈၵွင်ႈ ၸိူင်ႉၼင်ႇၼႆ။

ယဝ်ႉၵေႃႈ ႁၼ်ထိုင်ဝႃႈ လွင်ႈသိုၵ်းမၢၼ်ႈ မႃးပႂ်ႉဢဝ်ႁူမ်ႇလူမ်ႈ တီႈၼႂ်းဝၢင်းႁူင်းႁဵၼ်းၼႆႉ ဢမ်ႇလူဝ်ႇမႃးပႂ်ႉယဝ်ႉ မၼ်းတေ ႁဵတ်းႁႂ်ႈလုၵ်ႈဢွၼ်ႇႁဵၼ်း မီးၽေးၼမ်ၵူၺ်း ဝႃႈၼႆ။

“လွင်ႈသိုၵ်းမၢၼ်ႈ မႃးပႂ်ႉတီႈႁူင်းႁဵၼ်း ၸိူင်ႉၼႆၼႆႉ ႁဝ်းၶႃႈ ပေႃႈမႄႈလုၵ်ႈဢွၼ်ႇတႄႉ ႁၼ်ထိုင်ဝႃႈ ဢမ်ႇလူဝ်ႇမႃးပႂ်ႉယဝ်ႉ။ ယၢမ်းလဵဝ် ဢၼ်ပဵၼ်ၵႂႃႇၸိူင်ႉၼင်ႇၼႆၼႆႉ ဢမ်ႇထုၵ်ႇလီပဵၼ်သေဢိတ်း။ သိုၵ်းမၢၼ်ႈၶဝ်သမ်ႉ ၵိၼ်မဝ်းယဝ်ႉ သမ်ႉမႃးယိပ်း ၵွင်ႈ ပႂ်ႉၸိူင်ႉၼႆၼႆႉ ႁဵတ်းႁႂ်ႈလုၵ်ႈဢွၼ်ႇႁဝ်း မီးၽေးၵူၺ်းဢေႃႈ”- ၵူၼ်းပိုၼ်ႉတီႈ ဝဵင်းတႃႈၶီႈလဵၵ်း သိုပ်ႇလၢတ်ႈၼင်ႇၼႆ။

ၵဵဝ်ႇၵပ်း ၵွင်ႈလၼ်ႇသႂ်ႇ လုၵ်ႈဢွၼ်ႇၼႆႉသေ ယူႇတီႈသိုၵ်းမၢၼ်ႈ ယိုတ်းမိူင်းၶဝ်တႄႉ ၶတ်းၸႂ်ပိၵ်ႉၶေႃႈမုလ်း ၼင်ႇႁိုဝ် ၶေႃႈမုလ်း ပေႃးတေဢမ်ႇပိုၼ်ၽႄႈဢွၵ်ႇၵႂႃႇ ၼႆၸိူဝ်းၼႆႉ။

လုၵ်ႈႁဵၼ်းၸၢႆး ဢၼ်ထုၵ်ႇၵွင်ႈလၼ်ႇသႂ်ႇၼၼ်ႉ ၸိုဝ်ႈႁွင်ႉ မွင်ႇဢွင်ႇထႅၵ်ႉၵူဝ်ႇၵူဝ်ႇ ဢႃယု 8 ပီ ၶိုၼ်ႈႁဵၼ်းယူႇဝႆႉ ၸၼ်ႉ 2 ယူႇတီႈ သိုဝ်ႇၶၢဝ်ႇ TNA (တႃႈၶီႈလဵၵ်း) ဢွၵ်ႇဝႆႉၼင်ႇၼႆ။