သိုၵ်းမၢၼ်ႈ – ပျီႇတူႉၸိတ်ႉ ပႂ်ႉႁူမ်ႇလူမ်ႈတီႈႁူင်းႁဵၼ်းဝဵင်းမူႇၸေႊ ၺႃးယိုဝ်း

သိုၵ်းမၢၼ်ႈ ယိုတ်းမိူင်းတင်း ပျီႇတူႉၸိတ်ႉ ႁူမ်ႈၵၼ်ဢဝ်ႁူမ်ႇလူမ်ႈဝႆႉတီႈ ႁူင်းႁဵၼ်းၸၼ်ႉဢွၼ်ၼၼ်ႉ ထုၵ်ႇၵူၼ်းဢမ်ႇႁူႉၾၢႆႇ ၶဝ်ႈယိုဝ်း – ပျီႇတူႉၸိတ်ႉတၢႆ ၵေႃႉၼိုင်ႈ။

ဝၼ်းတီႈ 22/6/2023 ယၢမ်းႁူဝ်ၶမ်ႈမွၵ်ႈ 6:45 မူင်း သိုၵ်းမၢၼ်ႈတင်း ၸုမ်းပျီႇတူႉၸိတ်ႉ ဢၼ်ပႂ်ႉႁူမ်ႇလူမ်ႈႁူင်းႁဵၼ်း ၸၼ်ႉဢွၼ် ပွၵ်ႉႁူဝ်ၼႃး ဝဵင်းမူႇၸေႊ ၺႃးယိုဝ်းလႄႈ သိုၵ်းမၢၼ်ႈၵူတ်ႇထတ်းၵူၼ်းမိူင်းၵႂႃႇမႃး ၊ ၶဝ်ႈၵူတ်ႇထတ်းသွၵ်ႈထိုင်ၼႂ်းႁူင်းႁဵၼ်းပႃး ဝႃႈၼႆ ။

ၵူၼ်းပိုၼ်ႉတီႈ ဝဵင်းမူႇၸေႊ လၢတ်ႈတီႈၽူႈတွႆႇႁွၵ်ႈဝႃႈ – “ သိုၵ်းမၢၼ်ႈတင်း ပျီႇတူႉၸိတ်ႉၺႃးယိုဝ်း၊ ၾၢႆႇပျီႇတူႉၸိတ်ႉ တၢႆၵေႃႉၼိုင်ႈ မၢတ်ႇၸဵပ်းလၢႆလၢႆၵေႃႉ ႁူဝ်ယွႆႈမၼ်းတႄႉ ပႆႇလႆႈႁူႉတႅတ်ႈတေႃး။ ဝၢႆးၺႃးယိုဝ်းယဝ်ႉ သိုၵ်းမၢၼ်ႈ ဢဝ်ဢဵၼ်ႁႅင်း မွၵ်ႈၵႃး 4 လမ်း ဢၼ်ႁႅင်းမွၵ်ႈ 50 ၵေႃႉသေ ၶဝ်ႈၵူတ်ႇထတ်း ၼႂ်းႁူင်းႁဵၼ်းၼၼ်ႉၵမ်းလဵဝ်”- ဝႃႈၼႆ။

သိုၵ်းမၢၼ်ႈၵူတ်ႇထတ်းပႃးၵူၼ်းပိုၼ်ႉတီႈၵူၼ်းၵႂႃႇမႃးလႄႈၵူၼ်းမိူင်းဢမ်ႇမီးလွင်ႈလွတ်ႈလႅဝ်းႁူမ်ႇလူမ်ႈ။

ႁူင်းႁဵၼ်းၸၼ်ႉဢွၼ်ၼႆႉ ပိုတ်ႇဝႆႉ ၼႂ်းၵႄႈဝၢၼ်ႈႁူဝ်ၼႃးလႄႈ ၵွင်းမူးတူင်ႈ ၾၢႆႇၼႃႈႁူင်းႁဵၼ်းၼၼ်ႉသမ်ႉ မီးႁွင်ႈ KTV လႄႈ ႁူင်းႁႅမ်း။ ဢွင်ႈတီႈႁိမ်းႁွမ်း ၸိူဝ်းၼၼ်ႉသမ်ႉ ပဵၼ်ၸုမ်းပျီႇတူႉၸိတ်ႉ ယူႇသဝ်းဝႆႉၼမ်။ ၼႂ်းပွၵ်ႉႁူဝ်ၼႃးၼႆႉ ၵမ်ႈၼမ် တေပဵၼ်ၸၢဝ်းၶၢင် ယူႇသဝ်း ၵူၼ်းပိုၼ်ႉတီႈမူႇၸေႊလၢတ်ႈ။

မိူဝ်ႈဝၼ်းတီႈ 16/6/2023 ယၢမ်းၵၢင်ၼႂ်မွၵ်ႈ 8:40 မူင်းၼၼ်ႉၵေႃႈ ၽူႈမီးပုၼ်ႈၽွၼ်း ၼႂ်းၸုမ်းပျီႇတူႉၸိတ်ႉ မၢၼ်ႈ ၸေႊ ၵေႃႉၼိုင်ႈ ထုၵ်ႇၵူၼ်းဢမ်ႇႁူႉၾၢႆႇ ၶဝ်ႈယိုဝ်းတၢႆ ၼႂ်းႁၢၼ်ႉၶၢႆၶဝ်ႈသွႆး တီႈပွၵ်ႉပၢႆးၸၢၵ်ႈ ဝဵင်းမူႇၸေႊ။