လုၵ်ႈဢွၼ်ႇသွင်ၵေႃႉ တီႈႁူင်းႁဵၼ်းလင်ၼိုင်ႈၼႂ်းၸႄႈဝဵင်းမႄႈဢၢႆး ၸႄႈတွၼ်ႈၵဵင်းမႂ်ႇ ၽိတ်းမေႃးၵၼ်သေ ထိုင်တီႈ ဢဝ်တႃမၢတ်ႇသပ်းႁူဝ်ၵၼ်ထိုင်တၢႆ။
မိူဝ်ႈၼႆႉ ဝၼ်းတီႈ 21/6/2023 ယၢမ်းလိုဝ်ႈၵိၼ်ၶဝ်ႈဝၼ်း လုၵ်ႈႁဵၼ်းတီႈ ဝၢၼ်ႈမႄႈႁၢင်ႉ ဢိူင်ႇမႄႈသၢဝ် ၸႄႈဝဵင်းမႄႈဢၢႆး ၸိုင်ႈထႆး သွင်ၵေႃႉ ၽိတ်းမေႃးၵၼ်သေ ထိုင်တီႈဢဝ်တႃမၢတ်ႇသပ်းႁူဝ်ၵၼ် တၢႆၼႂ်းႁူင်းႁဵၼ်း၊ လုၵ်ႈႁဵၼ်းလႄႈၶူးသွၼ်ဢွၼ်ၵၼ်တူၵ်းၸႂ်ၵူဝ်ႁႄ။
သိုဝ်ႇၶၢဝ်ႇထႆး chiangmainews ႁၢႆးငၢၼ်းဝႆႉဝႃႈ – ဢိင်ၼိူဝ်ၶူးသွၼ်လႄႈလုၵ်ႈႁဵၼ်းလၢတ်ႈၼေသေ လႆႈႁူႉဝႃႈ လုၵ်ႈဢွၼ်ႇ 2 ၵေႃႉၼႆႉ ၶႃဢမ်ႇမႅၼ်ႈၵၼ်မႃးလႆႈ 5-6 လိူၼ်ယဝ်ႉ။ ၶၢဝ်းယၢမ်းႁဵၼ်းလိၵ်ႈၵေႃႈ မီးလွင်ႈလၢတ်ႈၵႂၢမ်းၶတ်းၵၼ် တႃႇသေႇ။ ထိုင်မိူဝ်ႈၼႆႉ ၶၢဝ်းယၢမ်းလိုဝ်ႈၵိၼ်ၶဝ်ႈဝၼ်း လႆႈပူၼ်ႉတိၼ်ပူၼ်ႉမိုဝ်း ထိုင်တီႈဢဝ်တႃမၢတ်ႇသပ်းႁူဝ်ၵၼ်တၢႆ -ဝႃႈၼႆ။
ၽူႈမီးပုၼ်ႈၽွၼ်းၼႂ်း ႁူင်းႁဵၼ်းၵေႃႉၼိုင်ႈလၢတ်ႈဝႃႈ – “ ၽွင်းတိုၵ်ႉ တၵ်းၶဝ်ႈၽၵ်းပၼ်လုၵ်ႈႁဵၼ်း မွၵ်ႈ 4-5 ၵေႃႉၼၼ်ႉ ဢမ်ႇထၢင်ႇသေ လုၵ်ႈဢွၼ်ႇၵေႃႉၼိုင်ႈ ၵႂႃႇလၢၵ်ႈဢဝ်တႃမၢတ်ႇဢၼ်မၼ်း မႃးသိူင်ႇဝႆႉၼႂ်းႁွင်ႈၵိၼ်ၶဝ်ႈ ၼႆႉၼၼ်ႉမႃးသပ်းသႂ်ႇႁူဝ် ၵေႃႉဢၼ်ၶႃၶတ်းၵၼ်ၼၼ်ႉ။ တၼ်းသပ်းသႂ်ႇမွၵ်ႈ 5 ၵမ်း။ ၵေႃႉၺႃးသပ်းၼၼ်ႉ တၢႆထင်တီႈ။ ဢွၼ်ၵၼ်တူၵ်းၸႂ်ႁႅင်းသေ ဢမ်ႇမီးၽႂ်ႁတ်းၶဝ်ႈၸမ် ။ တင်း 2 ၵေႃႉၼႆႉ တိုၵ်ႉပဵၼ်လုၵ်ႈဢွၼ်ႇ ဢႃယု 10 ပၢႆၵူၺ်းလႄႈ ပႃးၸဵမ်ၶူးသွၼ်မေႃသွၼ် ၽႂ်ၵေႃႈဢမ်ႇထၢင်ႇတေၶဝ်တေႁတ်းႁဵတ်းတေႃႇၵၼ်ထိုင်တၢႆ ၸိူင်ႉၼႆ ” – ဝႃႈၼႆ။
ၵေႃႉဢၼ် ပူၼ်ႉပႅၼ်လၢၵ်ႈတႃမၢတ်ႇသပ်းၼႆႉတိုၵ်ႉမီး ဢႃယု 16 ပီ ပဵၼ်ၸၢဝ်းလႃးႁူႇ၊ ၵေႃႉလူႉတၢႆမီး ဢႃယု 14 ပီ ပဵၼ်ၵူၼ်းၼႂ်းပိုၼ်ႉတီႈ ၸႄႈဝဵင်းမႄႈဢၢႆး။
ဝၢႆးလင်ပိူင်ပဵၼ်ၼႆႉယဝ်ႉ ၸဝ်ႈၼႃႈတီႈထႆး သင်ႇႁႂ်ႈၽူႈၵွၼ်းႁူင်းႁဵၼ်း ပိၵ်ႉဢိုတ်း ၵၢၼ်ႁဵၼ်းၵၢၼ်သွၼ် ၶၢဝ်းတၢင်း 3 ဝၼ်း တႃႇယူတ်းယႃပၢႆးၸႂ်လုၵ်ႈႁဵၼ်း လႄႈ တႃႇၸွႆႈထႅမ် ပီႈၼွင်ႉၵေႃႉလူႉတၢႆ ၊ လိူဝ်ၼၼ်ႉ တေဢဝ်လိူင်ႈၸွႆးတြႃးၽူႈပူၼ်ႉပႅၼ် ၸွမ်းၼင်ႇပၵ်းပိူင်မၢႆႈမီႈ ဝၢၼ်ႈမိူင်းမီးၼၼ်ႉဝႃႈၼႆ။
ႁူင်းႁဵၼ်းတီႈ ဝၢၼ်ႈမႄႈႁၢင်ႉ ဢိူင်ႇမႄႈသၢဝ် ၸႄႈဝဵင်းမႄႈဢၢႆး ၼႆႉ မိူဝ်ႈဢွၼ်တၢင်း ႁူဝ်ၼပ်ႉ လုၵ်ႈႁဵၼ်း မီး 200 ၵူၺ်း။ ယၢမ်းလဵဝ်လုၵ်ႈႁဵၼ်းမီးထိုင် 400 ၵေႃႉ။ ၵူၼ်းပိုၼ်ႉတီႈၵမ်ႈၼမ်ပဵၼ်တႆး ၊ လႃးႁူႇ၊ ၶႄႇ လႄႈ ထႆး။