သိုၵ်းမၢၼ်ႈ မီးၽႅၼ် တေတီႉဢဝ်လၢႆ ရူတ်ႉၵႃး ၸိူဝ်းဢမ်ႇမီးဝႂ်

ပလိၵ်ႈမၢၼ်ႈ သိုၵ်းမၢၼ်ႈ ၶိုင်ဢၢၼ်းတေတီႉၺွပ်းရူတ်ႉၵႃး ဢမ်ႇမီးဝႂ်/ ၶွၼ်ႇ ၼႂ်းဝဵင်းတႃႈၶီႈလဵၵ်း လႅၼ်လိၼ်တႆး – ထႆး ၵူၼ်းၸမ်ၸႂ်တင်းတူင်ႇဝူင်း သိုၵ်းမၢၼ်ႈလၢတ်ႈ။

တႄႇဢဝ် ႁၢင်လိူၼ်ၵျုၼ်ႊ 2023 ၼႆႉၵႂႃႇ ပလိၵ်ႈသိုၵ်းမၢၼ်ႈ မီးၽႅၼ်ၵၢၼ် တေတီႉဢဝ်လၢႆ ရူတ်ႉၵႃး ၸိူဝ်းဢမ်ႇမီးဝႂ်/ ၶွၼ်ႇ (လၢႆႇသိၼ်ႇ) ၽွင်းၵၢင်ၶမ်ႈ/ ၵၢင်ၶိုၼ်း ၼႂ်းဝဵင်းတႃႈၶီႈလဵၵ်း ၸိုင်ႈတႆးပွတ်းဢွၵ်ႇၶူင်း လႅၼ်လိၼ်တႆး – ထႆး ဝႃႈၼႆ။

ၽူႈၵွၼ်းပွၵ်ႉ ၼႂ်းဝဵင်းတႃႈၶီႈလဵၵ်း လၢတ်ႈတီႈၽူႈတွႆႇႁွၵ်ႈဝႃႈ – “ယၢမ်းလဵဝ်ၼႆႉ ပလိၵ်ႈမၢၼ်ႈ၊ မေႃႇတေႃႇပီႇၵေႇလႄႈ သိုၵ်း မၢၼ်ႈ ၸိူဝ်းၼႆႉ တေႁူမ်ႈၵၼ် တင်ႈလၢၼ်ႇယၢမ်းၵၢင်ၶမ်ႈၵၢင်ၶိုၼ်းသေ ပႂ်ႉတီႉၺွပ်းဢဝ်ရူတ်ႉၵႃး ဢၼ်ဢမ်ႇမီးၶွၼ်ႇ(ဝႂ်လၢႆႇ သိၼ်ႇ) ၸိူဝ်းၼႆႉ ၶဝ်တေဢၢၼ်းတီႉ တေဢဝ်လၢႆ 50 ပၢႆ ၵမ်ႈၼမ် ၵႃးဢၼ်ၶဝ်တေတီႉၼႆႉ တေပဵၼ်ၵႃးသႅၼ်း မိူၼ်ၼင်ႇ သီႇ ၽၵ်းတူ၊ ရူတ်ႉၵႃးတၢင်ႇၵုၼ်ႇ ၊ ၽူဝ်းဝီး ၸိူဝ်းၼႆႉ။ ၵွပ်ႈၼႆလႄႈ ၶႂ်ႈၾၢင်ႉထိုင်ၵူၼ်းမိူင်းႁဝ်းၶႃႈ ၵူႈၵေႃႉလႄႈ ၸိူဝ်းမီးလုၵ်ႈလၢင်း ႁၢမ်ႈ ၶပ်းရူတ်ႉၵႃးဢွၵ်ႇၵၢင်ၶမ်ႈၵၢင်ၶိုၼ်းၽွင်ႈ”- ဝႃႈၼႆ။

ယၢမ်းလဵဝ် ၼႂ်းဝဵင်းတႃႈၶီႈလဵၵ်းၼႆႉ ၵႃးရူတ်ႉၶိူင်ႈ ဢမ်ႇမီးဝႂ် မီးၼမ်ႁႅင်း ။တႄႇဢဝ်ယၢမ်းၵၢင်ၼႂ်ထိုင်ၵၢင်ၶမ်ႈ တႄႇ တီႈႁူဝ်ၶူဝ်မၢႆ 1 ထိုင်သီႇယႅၵ်ႈႁွင်ႈလိုၵ်ႉ တၢင်းဢွၵ်ႇဝဵင်းတႃႈၶီႈလဵၵ်းၼၼ်ႉ ရူတ်ႉၵႃးတိတ်းသတ်ႉၼႅၼ်ႈၵူႈဝၼ်း ယွၼ်ႉၵူၼ်း ၼုမ်ႇ တၢင်ႇတီႈသီႇလႅၼ် မႃးႁဵတ်းၵၢၼ် ႁႃၵိၼ်လဵင်ႉတွင်ႉ ၵဵမ်းဢွၼ်ႊလၢႆႊ၊ ပၢင်တေႃႇလွင်း ၸိူဝ်းၼႆႉၼမ်။

“လႆႈငိၼ်းဝႃႈ ၶဝ်မီးၽႅၼ်ၵၢၼ် တေသိမ်းဢဝ်လၢႆ ရူတ်ႉၵႃး ဢမ်ႇမီးၶွၼ်ႇတႃႇ 80 လမ်း၊ တီႈတႃႈၶီႈလဵၵ်းသမ်ႉ မီးၽႅၼ် တေတီႉဢဝ် 50 ပၢႆ။ ရူတ်ႉၵႃး ၸိူဝ်းၶဝ်တေတီႉဢဝ်လၢႆၼႆႉ ၶဝ်တေသူင်ႇၸူးတၢင်းမိူင်းမၢၼ်ႈၼႆၶႃႈ။ လွင်ႈၼၼ်ႉတႄႉ ၶဝ် တေတီႉဢဝ်ၵႂႃႇႁဵတ်းသင်တႄႉ ဢမ်ႇႁူႉၶႃႈ ” – ၽူႈၵွၼ်းပွၵ်ႉ သိုပ်ႇလၢတ်ႈၼႄၼင်ႇၼႆ။

ဝဵင်းတႃႈၶီႈလဵၵ်းၼႆႉ ပဵၼ်ဝဵင်းတိတ်းၸပ်း လႅၼ်လိၼ်တႆး – ထႆး ပဵၼ်ဝဵင်းၵႃႉၶၢႆ ပၢႆးမၢၵ်ႈမီးဝဵင်းၼိုင်ႈ ။ ၵွပ်ႈၼႆလႄႈ ၵူၼ်းတၢင်ႇတီႈသီႇလႅၼ် မႃးယူႇႁဵတ်းၵိၼ်ၵၢၼ်ႁႃလဵင်ႉတွင်ႉၼမ်။ မိူၼ်ၼင်ႇ ၵၢၼ်တေႃႇလွင်း ၵဵမ်းဢွၼ်ႊလၢႆႊ၊ ၵၢၼ်ၽိတ်းပၵ်းပိူင်မၢႆမီႈ ယႃႈမဝ်းၵမ်၊ ၽူႈလၵ်ႉၸၵ်ႉၶုတ်ႇ ၸိူဝ်းၼႆႉၵေႃႈ လိူင်ႇၼမ်ႁႅင်း။

ၵူၼ်းၼုမ်ႇ ဝဵင်းတႃႈၶီႈလဵၵ်း လၢတ်ႈတီႈၽူႈတွႆႇႁွၵ်ႈဝႃႈ – “ယၢမ်းလဵဝ် တီႈဝဵင်းတႃႈၶီႈလဵၵ်းၼႆႉ ၽူႈလၵ်ႉၸၵ်ႉၶုတ်ႈ လိူင်ႇၼမ် ႁႅင်း သၢႆၾႆးၾႃႉ တၢင်းၼႃႈႁိူၼ်းယေး ၸွမ်းၶၢင်ႈတၢင်း ၸိူဝ်းၼႆႉ ဢမ်ႇဝႆႉ သင်ဝႃႈ ၶဝ်ၸၼ်ဢဝ်လႆႈၼႆ ၶဝ်တေဢဝ်ၶေႃ ယၢဝ်းသေ လၵ်ႉၸၼ်ဢဝ်ၵႂႃႇ။ ယဝ်ႉၵေႃႈ ရူတ်ႉၶိူင်ႈ ၸိူဝ်းၼႆႉၵေႃႈ လႃႈလီႈဝႆႉ မဝ်မၢင် ဢမ်ႇလႆႈ၊ လွင်ႈရူတ်ႉၶိူင်ႈႁၢႆၼႆႉ ၶႂ်ႈဝႃႈမီး ၵူႈဝၼ်းယဝ်ႉ”- ဝႃႈၼႆ။

ဝၢႆးသိုၵ်းမၢၼ်ႈ ယိုတ်းမိူင်းမႃး ၶၢဝ်းတၢင်း 2 ပီပၢႆၼႆႉ ၵူၼ်းမိူင်းပိုၼ်ႉတီႈ ၼႂ်းၸႄႈဝဵင်းတႃႈၶီႈလဵၵ်းၼႆႉ ဢမ်ႇမီးလွင်ႈႁူမ်ႇလူမ်ႈ ဢုၼ်ႇၸႂ်သင် ၵႆႉမီးၽူႈလၵ်ႉၸၵ်ႉၶုတ်ႈ ၶိုၼ်ႈႁိူၼ်းယေး၊ ရူတ်ႉၶိူင်ႈၵႆႉႁၢႆ ၶိူဝ်းယႂ်း ၵဵဝ်ႇၵပ်းလွင်ႈၼႆႉ ပလိၵ်ႈသိုၵ်းမၢၼ်ႈ ႁူႉယူႇ ၵေႃႈ ဢမ်ႇဢဝ်တၢင်းၽိတ်းသင် ထိုင်တီႈထိုင်လႅၼ် ၵူၼ်းပိုၼ်ႉတီႈ ဝဵင်းတႃႈၶီႈလဵၵ်းလၢတ်ႈ။