ၶွမ်ႇမတီႇလႅၼ်လိၼ်ထႆး-မၢၼ်ႈ ၸၼ်ႉၸႄႈဝဵင်း(ပိုၼ်ႉတီႈ) တႃႈၶီႈလဵၵ်း-မႄႈသၢႆ ႁူပ်ႉထူပ်းဢုပ်ႇဢူဝ်းၵၼ် ၵမ်းထူၼ်ႈ 97 တီႈ ဝဵင်းတႃႈၶီႈလဵၵ်းၸိုင်ႈတႆးပွတ်းဢွၵ်ႇ ၾၢႆႇထႆးတုၵ်းယွၼ်းႁႂ်ႈသိုၵ်းမၢၼ်ႈသင်ႇပၢင်သဝ်းတပ်ႉသိုၵ်းဝႃႉၶၢႆႉထွၼ် 5 ဢၼ် ဢၼ်မီးၸွမ်းလႅၼ်လိၼ် တႆး-ထႆး။

ပၢင်ႁူပ်ႉထူပ်းၼႆႉ ၸတ်းႁဵတ်းမိူဝ်ႈဝၼ်းတီႈ 19 လိူၼ်ၵျုၼ်ႊ (မိူဝ်ႈဝႃး) တီႈ ႁူင်းႁႅမ်း 1G1 ဝဵင်းတႃႈၶီႈလဵၵ်း၊ ၾၢႆႇထႆးပဵၼ်ၸွမ်သိုၵ်းလူင် ၼထီႇ ဢၼ်ပဵၼ်ႁူဝ်ပဝ်ႈၶွမ်ႇမတီႇလႅၼ်လိၼ်ထႆး-မၢၼ်ႈ ၾၢႆႇထႆး ဢွၼ်ႁူဝ်။ ၾၢႆႇတၢင်းမၢၼ်ႈသမ်ႉ ၽူႈၵွၼ်းၸႄႈတွၼ်ႈတႃႈၶီႈလဵၵ်း ၸွမ်းသိုၵ်းလူင် ၸေႃႇလုၼ်ႇၸူဝ်း ဢွၼ်ႁူဝ်ၸုမ်းတၢင်တူဝ်ႁူပ်ႉထူပ်းၵၼ်။

ၾၢႆႇသိုၵ်းမၢၼ်ႈ တုၵ်းယွၼ်းထိုင်ၸဝ်ႈၼႃႈတီႈထႆး ႁႂ်ႈၸွႆႈၸတ်းၵၢၼ်ပၼ် ၵူၼ်းၸိူဝ်းထုၵ်ႇပိုၼ်ၽၢဝ်ႇသဵၼ်ႈၸိုဝ်ႈ ထုၵ်ႇဢဝ်လိူင်ႈဝႆႉ ၊ ၵူၼ်းၸိူဝ်းႁဵတ်းၽိတ်းမၢႆမီႈၸိုင်ႈမိူင်းသေဢမ်ႇယွမ်းမွပ်ႈတူဝ် ဢၼ်ပၢႆႈၶဝ်ႈၵႂႃႇယူႇဝႆႉၼႂ်းမိူင်းထႆးၸိူဝ်းၼၼ်ႉႁႂ်ႈၾၢႆႇထႆးၸွႆႈတီႉၺွပ်းသူင်ႇပၼ်ၶိုၼ်း။

ၾၢႆႇတၢင်းမိူင်းထႆးသမ်ႉတုၵ်းယွၼ်းၸူးတူဝ်တႅၼ်းမိူင်းမၢၼ်ႈ 3 လွင်ႈ။ 1- ႁႂ်ႈၽဵဝ်ႈထွၼ်ပၼ်တပ်ႉပၢင်သဝ်းသိုၵ်းဝႃႉ ဢၼ်ပၵ်းယူႇၸွမ်းလႅၼ်လိၼ် ထႆး-မၢၼ်ႈ 5 တီႈ ဢွၵ်ႇႁၢင်ႇယၢၼ်လႅၼ်လိၼ်သေ ၶဝ်ႈမိူဝ်းယူႇသဝ်းၼႂ်းလိၼ်မိူင်းမၢၼ်ႈ။ 2- ႁႂ်ႈၾၢႆႇသိုၵ်းမၢၼ်ႈလူင်းပိုၼ်ႉတီႈ ၵူတ်ႇထတ်းငဝ်းလၢႆး သွင်ၾင်ႇၼမ်ႉသၢႆလႄႈ ၼမ်ႉႁူၵ်ႈ ဢၼ်ၵူၼ်းမိူင်းၵမ်ႈၽွင်ႈ ၵေႃႇသၢင်ႈႁိူၼ်းယေးတင်းသွင်ၾင်ႇၼမ်ႉ ၊ ယွၼ်ႉပိူဝ်ႈဝႃႈ လုၵ်ႉတီႈၵၢၼ်ၵေႃႇသၢင်ႈသေ မီးလွင်ႈပႅတ်ႈယုၵ်းယၢၵ်းတူၵ်းၼမ်ႉ ႁဵတ်းႁႂ်ႈၼမ်ႉတူႇၼဝ်ႈ ဢမ်ႇၸၢင်ႈလႆလီလီ 3- ႁႂ်ႈသွင်ၾင်ႇၸိုင်ႈမိူင်း ၵေႃႇသၢင်ႈၽႃတမ်ႇတိူင်းသွင်ၾင်ႇၼမ်ႉ တႃႇႁႄႉၵင်ႈၽေးၼမ်ႉလူၼ်ႉၾင်ႇ ၼမ်ႉထူမ်ႈ – ၸဵမ်ၸိူဝ်းၼႆႉ။

ၽူႈပၵ်းတႃၵၢၼ်မိူင်း ဢၼ်ယူႇၸွမ်းလႅၼ်လိၼ်တႄႉလၢတ်ႈဝႃႈ – “လွင်ႈထႆး ၸႂ်ႉတပ်ႉပၢင်သဝ်းဝႃႉၸွမ်းလႅၼ်လိၼ်ၶၢႆႉၼႆႉ ဢမ်ႇၸႂ်ႉဝႃႈပွၵ်ႈၼႆႉပဵၼ်ပွၵ်ႈၵမ်းႁႅၵ်ႈ။ မိူဝ်ႈၵွၼ်ႇပူၼ်ႉမႃးၵေႃႈ ထႆးယၢမ်ႈတုၵ်းယွၼ်းမႃးတႃႇသေႇ။ ပိူင်လူင်တႄႉ ထႆးႁၼ်ထိုင်ဝႃႈ ယွၼ်ႉပိူဝ်ႈထၢၼ်တပ်ႉဝႃႉ ၸွမ်းလႅၼ်လိၼ်လႄႈ ပၼ်ႁႃယႃႈမဝ်းၵမ် ၸွမ်းလႅၼ်လိၼ်ထႆး-မၢၼ်ႈ လိူင်ႇၼမ် ဢမ်ႇၸၢင်ႈၵႄႈလိတ်ႈလႆႈ” – ဝႃႈၼႆ။

ပၢင်ၵုမ် ၶွမ်ႇမတီႇလႅၼ်လိၼ်ထႆး-မၢၼ်ႈ ၸၼ်ႉၸႄႈဝဵင်းၼႆႉ ယွၼ်ႉတၢင်းပဵၼ်ၶူဝ်ႊဝိတ်ႉလၢမ်းၽႄႈသေ လႆႈၵိုတ်းလွင်ႈႁူပ်ႉထူပ်းဢုပ်ႇဢူဝ်းၵၼ်မႃးလႆႈ 3 ပီယဝ်ႉ ပီၼႆႉၸင်ႇတေထိုၼ်းထူပ်းၵၼ် ပဵၼ်ပွၵ်ႈၵမ်း 97။ ဢၼ်ပဵၼ်ပၢင်ၵုမ်ၶွမ်ႇမတီႇလႅၼ်လိၼ်ထႆး-မၢၼ်ႈၸၼ်ႉၸႄႈတွၼ်ႈတႄႉ မိူဝ်ႈပီၵၢႆၶၢဝ်းၼႆႉ တူဝ်တႅၼ်းၸၼ်ႉၸႄႈတွၼ်ႈ သွင်ၾင်ႇၸိုင်ႈမိူင်း ၵႂႃႇႁူပ်ႉထူပ်းဢုပ်ႇဢူဝ်းၵၼ်တီႈဝဵင်းလူင်တူၼ်ႈတီး ၊ ပဵၼ်ပၢင်ႁူပ်ႉထူပ်းၵၼ် ၵမ်းထူၼ်ႈ 34 ။