ၵူၼ်းမိူင်းၵဵင်းတုင်ႁူမ်ႈၵၼ် ပႂ်ႉယၢမ်း ဢဝ်လွင်ႈႁူမ်ႇလူမ်ႈဝၢၼ်ႈၸဝ်ႈၵဝ်ႇ တီႉၺွပ်းလႆႈ ၵူၼ်းလၵ်ႉရူတ်ႉၶိူင်ႈၵေႃႉၼိုင်ႈ။
ၼႂ်းၸႄႈဝဵင်းၵဵင်းတုင်ၼႆႉ ၽူႈလၵ်ႉၸၵ်ႉၶုတ်ႈလိူင်ႇၼမ်ႁႅင်း တႃႇၵႅတ်ႇၶႄလႆႈၼႂ်းဢိူင်ႇၼႂ်းဝၢၼ်ႈၵေႃႈ ဢမ်ႇမီးၸုမ်းလႂ် ဢဝ်ပုၼ်ႈၽွၼ်း၊ ၵူၼ်းမိူင်းၵူၺ်းလႆႈၽွမ်ႉၵၼ် ဢဝ်ပုၼ်ႈၽွၼ်းပႂ်ႉယၢမ်း ၸင်ႇတီႉၺွပ်းလႆႈ ၵူၼ်းလၵ်ႉ ရူတ်ႉၶိူင်ႈ ၵေႃႉၼိုင်ႈ တီႈဝၢၼ်ႈၵၢင်ၼႃးလူင် ၼႂ်းပွၵ်ႉ 5 ၸႄႈဝဵင်းၵဵင်းတုင် ယၢမ်းႁူဝ်ၼႂ် မိူဝ်ႈဝၼ်းတီႈ 16/6/2023 ။
ၵူၼ်းၼႂ်းပိုၼ်ႉတီႈၸႄႈဝဵင်းၵဵင်းတုင်ၵေႃႉၼိုင်ႈလၢတ်ႈတီႈၽူႈတွႆႇႁွၵ်ႈဝႃႈ – “ ၸႂ်ႈယဝ်ႉ ၵူၼ်းဝၢၼ်ႈ ဢွၼ်ၵၼ်ပုတ်ႈ ၵၼ် ပႂ်ႉၵိၼ်းဢေႃႈၼၼ်ႉ ။ ၶၢဝ်းၶဝ်ပႂ်ႉၵိၼ်းၼၼ်ႉ မီးၵူၼ်းၶီႇ ရူတ်ႉၶိူင်ႈ ၶဝ်ႈမႃးၼႂ်းဝၢၼ်ႈ 4 ၵေႃႉ မိူဝ်ႈၶဝ် ၵိုတ်း ရူတ်ႉၶိူင်ႈၶဝ်ၼၼ်ႉ ၵူၼ်းဝၢၼ်ႈ ဢွၼ်ၵၼ်ၶဝ်ႈႁႃၶဝ်လႄႈ ၶဝ်ၸိူဝ်းၼၼ်ႉ တူၵ်းၸႂ်သေ ဢွၼ်ၵၼ်လႅၼ်ႈပၢႆႈဢေႃႈ ။ ႁၼ်ၶဝ်ယိပ်းမႃး ၵိမ်းၵႅတ်းယႂ်ႇယႂ်ႇလူင်လႅပ်ႈတေမႃးယႃႉသေႃး။ ၶဝ်တူၵ်းၸႂ်သေ ဝၢင်းၶိူင်ႈမႆႉၶိူင်ႈမိုဝ်းၶဝ်သေ လႅၼ်ႈပၢႆႈ။တၼ်းတီႉၺွပ်းလႆႈ ၵေႃႉၼိုင်ႈဢေႃႈ ၶဝ်ၸိူဝ်းၼၼ်ႉတႄႉ လႅၼ်ႈပၢႆႈပႅတ်ႈ တႃႇၵေႃႉၼိုင်ႈတႄႉ တၼ်းတီႉလႆႈၼႂ်းဢိူင်ႇယၢင်းလေႃးပုၼ်ႉၼေႈ ” – ဝႃႈၼႆ။
ၵူၼ်းလၵ်ႉဢၼ်ၺႃးတီႉၺွပ်းၼႆႉ ၸိုဝ်ႈဢႃးလေႃႇသူး(ၶ)လေႃးသူႉ ပဵၼ်ၵူၼ်းမိူင်းပဵင်း ၵူၼ်းလၵ်ႉ ၸိူဝ်းပၢႆႈလွတ်ႈ ၵႂႃႇၼၼ်ႉၵေႃႈ ပဵၼ်ၵူၼ်းမိူင်းပဵင်းလႄႈမိူင်းၶၢၵ်ႇ ၸိုင်ႈတႆးပွတ်းဢွၵ်ႇ ။ ၵူၼ်းဝၢၼ်ႈ ယိုတ်းလႆႈပႃး ၶိူင်ႈမႆႉၶိူင်ႈမိုဝ်း ၵူၼ်းလၵ်ႉသေဢမ်ႇၵႃး လႆႈပႃး ရူတ်ႉၶိူင်ႈ 2 လမ်း ဝႃႈၼႆ။
ၵူၼ်းၼႂ်းပိုၼ်ႉတီႈၸႄႈဝဵင်းၵဵင်းတုင်ၵေႃႉၼိုင်ႈလၢတ်ႈတီႈၽူႈတွႆႇႁွၵ်ႈဝႃႈ – “ မိူဝ်ႈလဵဝ် ၵူၼ်းဝၢၼ်ႈၶဝ် ၸႅတ်ႈထၢမ်တူၺ်း ၵေႃႉဢၼ်ၺွပ်းဝႆႉၼႆႉသေ လႆႈႁူႉပႃး ၸုမ်းၶဝ်ယဝ်ႉၶႃႈ။ မၼ်းယွမ်းႁပ်ႉဝႃႈ ပဵၼ်ၵူၼ်းဢၼ်ယၢမ်ႈ လၵ်ႉရူတ်ႉၶိူင်ႈတေႉၼႆဢေႃႈ ။ လၢတ်ႈပလိၵ်ႈၶဝ်ဝႆႉယဝ်ႉၼင်ႇၵဝ်ႇ တႃႇတေတီႉၺွပ်းလႆႈ တင်းၸုမ်း ” – ဝႃႈၼႆ။
မိူဝ်ႈလဵဝ်ၵူၼ်းဝၢၼ်ႈ ဢဝ်ၽူႈမီးတၢင်းၽိတ်း မွပ်ႈပၼ်ပလိၵ်ႈမၢၼ်ႈသေ တႃႇပၼ်တူတ်ႈတၢမ်ႇ ဢႃးလေႃႇသူး(ၶ) လေႃးသူႉ ၸွမ်းၼင်ႇပၵ်းပိူင်မီးဝႆႉ လိူဝ်ၼၼ်ႉ တေသိုပ်ႇသွၵ်ႈႁႃထႅင်ႈ ၽူႈၵဵဝ်ႇၶွင်ႈတင်းသဵင်ႈ ၼႆယဝ်ႉ။
ၶၢဝ်းတၢင်းသိုၵ်းမၢၼ်ႈယိုတ်းမိူင်းမႃး 2 ပီပၢႆၼႆႉ ၵၢၼ်ဝၢၼ်ႈမိူင်းဢမ်ႇၼိမ်သဝ်းသေဢမ်ႇၵႃး ၽူႈလၵ်ႉၸၵ်ႉၶုတ်ႈၵေႃႈ လိူင်ႇၽႄႈၼမ်မႃးၼႂ်းမိူင်းတႆးၵူႈမိုဝ်ႉၵူႈဝၼ်း မိူၼ်ၼင်ႇ ၼႂ်းၸႄႈဝဵင်းတႃႈၶီႈလဵၵ်း ၸိုင်ႈတႆးပွတ်းဢွၵ်ႇၼႆႉၵေႃႈ မီးၵူၼ်းဢမ်ႇႁူႉၾၢႆႇ လၵ်ႉရူတ်ႉၶိူင်ႈၼမ်မႃးၶိူဝ်းယႂ်း ၵူၼ်းမိူင်းမႆႈၸႂ် ယွၼ်ႉဢမ်ႇၸၢင်ႈတိူင်ႇလၢတ်ႈမူႇလႂ်ၸုမ်းလႂ် ၸွႆႈထႅမ်ပၼ်လႆႈ ၼႆယဝ်ႉ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ