လုၵ်ႈႁဵၼ်းသင်ၶတႆး ဢၼ်ၵႂႃႇႁဵၼ်းၸၼ်ႉၸွမ် တီႈၵုင်းထဵပ်ႈၼၼ်ႉ တေလႆႈႁပ်ႉၸုမ်ႈၶူး တီႈၸၼ်ႉၸွမ်မႁႃၸုလႃး ဝင်းၼွႆႉ တင်းမူတ်း 28 တူၼ် ဝႃႈၼႆ။
ဝၼ်းတီႈ 12-13/05/2018 ၶၢဝ်းတၢင်း 2 ဝၼ်း ယူႇတီႈၸၼ်ႉၸွမ်မႁႃၸုလႃး ဝင်းၼွႆႉ ဢယုတ်ႉထယႃး ၸိုင်ႈထႆး တေမွပ်ႈယိုၼ်ႈၸုမ်ႈၶူး ပၼ်လုၵ်ႈႁဵၼ်း တင်းမူတ်း 3000 ပၢႆ ၼႂ်းၼၼ်ႉ ပႃးလုၵ်ႈႁဵၼ်း သင်ၶတႆး 28 တူၼ် ဢၼ်ယူႇတီႈၵုင်းထဵပ်ႈ(မိူင်းၵွၵ်ႇ) သေ ၶိုၼ်ႈႁဵၼ်းယဝ်ႉၵႂႃႇၼၼ်ႉ ဝႃႈၼႆ။
ၸဝ်ႈၶူးၶမ်းလႅင်း ၶေႇမိၼ်ႇတ ဢၼ်ႁဵၼ်းယဝ်ႉၸၼ်ႉ B.A လၢတ်ႈတီႈၽူႈတွႆႇႁွၵ်ႈဝႃႈ “ ၼႂ်းလုၵ်ႈ ႁဵၼ်းသင်ၶတႆး ႁဝ်းၶႃႈ တင်းမူတ်း 28 တူၼ်/ၵေႃႉၼႆႉ ပဵၼ်လုၵ်ႈႁဵၼ်းၵုင်းထဵပ်ႈၼႆႉၵူၺ်း။ ဢၼ်တၢင်းၵဵင်းမႆႇ ဢိၵ်ႇထႅင်ႈလၢႆလၢႆတီႈ ၸိူဝ်းၼၼ်ႉ ယင်းမီးထႅင်ႈတင်းၼမ်။ ယွၼ်ႉႁဝ်းၶႃႈ ဢမ်ႇလႆႈႁပ်ႉႁူႉသဵၼ်ႈမၢႆမၼ်းလႄႈ ဢမ်ႇလႆႈသႂ်ႇပႃး၊ ဢၼ်ယူႇ တီႈလုၵ်ႈႁဵၼ်းသင်ၶတႆးႁဝ်းၶႃႈ လႆႈႁပ်ႉၸုမ်ႈၶူးတီႈ ၸၼ်ႉၸွမ်မႁႃၸုလႃး ဝင်းၼွႆႉမႃးၼႆႉ တေပဵၼ်ၸုပ်ႈတီႈ 9 ပႃးပွၵ်ႈၼႆႉ” ဝႃႈၼႆ။
လုၵ်ႈႁဵၼ်းသင်ၶတႆး 28 တူၼ်/ ၵေႃႉ ဢၼ်တေလႆႈႁပ်ႉၸုမ်ႈၶူး ပီ 2018 ႁူဝ်လိူၼ်မေႊ တေထိုင်ၼႆႉ ၸၼ်ႉ Ph.D 1 တူၼ်၊ ၸၼ်ႉ M.A 3 တူၼ်လႄႈ ၸၼ်ႉ B.A 24 တူၼ်။ ဢၼ်လႆႈလၢဝ်ၸွင်ႈသူးထီႉ 2 သမ်ႉမီး 10 တူၼ် ဝႃႈၼႆ။
ယူႇတီႈၸၼ်ႉၸွမ်မႃႁႃၸုလႃးလူင်းၵွၼ်းၼႆႉ တေမွပ်ႈယိုၼ်ႈၸုမ်ႈၶူးလုၵ်ႈႁဵၼ်း တင်းမူတ်းလုၵ်ႈႁဵၼ်း 3000 ပၢႆ ။ တေမွပ်ႈယိုၼ်ႈပၼ် လုၵ်ႈႁဵၼ်းဢၼ်ၶိုၼ်ႈၸၼ်ႉၸွမ်မႃႁႃၸုလႃးလူင်းၵွၼ်းလႄႈႁူမ်ႈလူၺ်ႈ ၵိင်ႇၽႄ ထႅင်ႈ 11 ၸၼ်ႉၸွမ် ဝႃႈၼႆ။
