သိုၵ်းတဢၢင်း TNLA ဢဵၼ်ႁႅင်း 3 ၵေႃႉ ၶဝ်ႈပေႃႉထုပ်ႉ ပူႇၵႄႇ ၼႂ်းဢိူင်ႇမိူင်းပႃး ၸႄႈဝဵင်းသႅၼ်ဝီ လႆႈတိူဝ်ႉမၢတ်ႇၸဵပ်း ႁၢဝ်ႈႁႅင်း ယွၼ်ႉပၼ်ႁႃ ယွၼ်းၵူၼ်းဝၢၼ်ႈၼႄတၢင်းလႄႇထိူၼ်ႇ ဝႃႈၼႆ။
မိူဝ်ႈဝႃး ဝၼ်းတီႈ 16/6/2023 ယၢမ်းဝၢႆးဝၼ်း 4 မူင်း သိုၵ်းတဢၢင်း TNLA တႃႉသူဝ်းပေႇ ဢွၼ်ႁူဝ် လုၵ်ႈၼွင်ႉ 2 ၵေႃႉ သေ ၶဝ်ႈပေႃႉထုပ်ႉ ပူႇၵႄႇ ဝၢၼ်ႈမႂ်ႇၼမ်ႉႁူးပွတ်း ၼႂ်းဢိူင်ႇမိူင်းပႃး ၸႄႈဝဵင်းသႅၼ်ဝီ ၸႄႈတွၼ်ႈလႃႈသဵဝ်ႈ ၸိုင်ႈတႆး ပွတ်း ႁွင်ႇသေ ႁဵတ်းႁႂ်ႈပူႇၵႄႇ လႆႈတိူဝ်ႉမၢတ်ႇၸဵပ်းႁႅင်း ၸွမ်းတူဝ်၊ ၸွမ်းၼႃႈ၊ ၸွမ်းၶႃ ၸိူဝ်းၼႆႉ။
ၵူၼ်းပိုၼ်ႉတီႈ ဝဵင်းသႅၼ်ဝီ လၢတ်ႈတီႈၽူႈတွႆႇႁွၵ်ႈဝႃႈ – “လွင်ႈတၢင်းမၼ်း ပဵၼ်ၼႆ …သိုၵ်းလွႆ 3 ၵေႃႉ ဢၼ်တႃႉသူဝ်းပေႇ ဢွၼ်ႁူဝ်မႃးၼႆႉ ၶဝ်ၶဝ်ႈမႃးၼႂ်းဝၢၼ်ႈသေ မႃးယွၼ်းၽၵ်းၶဵဝ် တီႈပူႇၵႄႇ။ ပူႇၵႄႇၵဵပ်းပၼ်ယဝ်ႉ ၶဝ်ပႆႇမိူဝ်း ၵႂႃႇသိုဝ်ႉ ပီႊယႃႊ(Beer) မႃးၼင်ႈၵိၼ် တီႈၼႂ်းႁိူၼ်းပူႇၵႄႇ။ ၵမ်းၼႆႉ ၶဝ်ဝႃႈပူႇၵႄႇ မိူဝ်ႈၽုၵ်ႈၼႆႉ ၶဝ်တေႁွင်ႉၵူၼ်းသိုၵ်းၶဝ် မႃးလႄႇထိူၼ်ႇ 15 ၵေႃႉ ႁႂ်ႈပူႇၵႄႇႁႃၵူၼ်းၼႄတၢင်းပၼ်။ ပူႇၵႄႇလၢတ်ႈဝႃႈ ယၢမ်းလဵဝ် ပဵၼ်ၶၢဝ်းႁဵတ်းၵၢၼ် ဢမ်ႇမီးၽႂ်တၼ်း ၵွပ်ႈၼႆလႄႈ လႅပ်ႈတေဢမ်ႇလႆႈ။ ၶဝ်ၶိုၼ်းဝႃႈ သင်ဢမ်ႇႁႃပၼ်လႆႈ ႁဝ်းတေၶဝ်ႈမႃးၼႂ်းဝၢၼ်ႈသူသေ ဢဝ်ၵႆႇသူၵိၼ်။ ပူႇၵႄႇဝႃႈ ၸိူင်ႉၼႆတႄႉ ဢမ်ႇလီပဵၼ်ယူဝ်ႉ … လၢတ်ႈၸိူင်ႉၼၼ်ၵေႃႈ သိုၵ်းလွႆ 3 ၵေႃႉၼႆႉ ပေႃႉထုပ်ႉ ပူႇၵႄႇ ၶႃႈဢေႃႈ”- ဝႃႈၼႆ။
ပူႇၵႄႇ ဝၢၼ်ႈမႂ်ႇၼမ်ႉႁူးပွတ်းၼႆႉ ၸိုဝ်ႈႁွင်ႉ လုင်းၽူင်း ဢႃယု 43 ပီ ယၢမ်းလဵဝ် မၢတ်ႇၸဵပ်းဝႆႉ ႁူဝ်တႅၵ်ႇ၊ ၼႃႈၵႂ်ႈ၊ ၶႃၸဵပ်း၊ ဢူၵ်းၸဵပ်း၊ တႃၶွၼ်ၼိုင်ႈ ဢမ်ႇမိုၼ်းလႆႈ ။ တေႃႈလဵဝ် ယူတ်းယႃတူဝ်ဝႆႉ တီႈဝၢၼ်ႈ လႆႈႁူႉၼင်ႇၼႆ။
“မိူဝ်ႈၽွင်းၶဝ် ႁႅမ်ပူႇၵႄႇၼႆႉ ပူႇၵႄႇလႅၼ်ႈၶဝ်ႈၼႂ်းႁိူၼ်း ၶဝ်ၵေႃႈၸွမ်းပေႃႉထုပ်ႉ၊ လဵၼ်ႈဢွၵ်ႇႁိူၼ်းမႃးၵေႃႈ ၸွမ်းပေႃႉထုပ်ႉ ထိုင် ၼႂ်းဝၢင်းႁိူၼ်း။ ၵူၼ်းဝၢၼ်ႈႁၼ်သေ ဢွၼ်ၵၼ်မႃးၶုပ်ႉဝႆႈတွင်းပၢၼ်ယဝ်ႉ သိုၵ်းလွႆၼႆႉ ၸင်ႇတေၵိုတ်းၵႂႃႇ။ ဝၢႆးၶဝ် ပေႃႉ ထုပ်ႉပူႇၵႄႇယဝ်ႉ ဢွၵ်ႇဝၢၼ်ႈမိူဝ်း၊ ပၢႆယိုဝ်းၵွင်ႈလွၵ်ႇငိုတ်ႈၵူၼ်းဝၢၼ်ႈ ပဵၼ်ၵွင်ႈသႅၼ်း M 22 မၢၵ်ႈၵွင်ႈၶဝ်သဵင်ႈ မွၵ်ႈ 4 မႅၵ်ႉ ၼႆႉ။ ထိုင်မႃး ယၢမ်းၵၢင်ၶိုၼ်း 11 မူင်း သိုၵ်းလွႆ ဢၼ်ပေႃႉထုပ်ႉပူႇၵႄႇၼႆႉ မႃးထၢမ်ဝႃႈ ၸွင်ႇႁၢၼ်ႉ ၸႂ် ပေႃးဢမ်ႇႁၢၼ်ႉၸႂ်ၵေႃႈ ၸွမ်းမႃး တီႈတပ်ႉႁဝ်းလႄႈ – ၼႆ – ပူႇၵႄႇဝႃႈႁၢၼ်ႉၸႂ် ဢမ်ႇႁၢၼ်ႉၸႂ်တႄႉ ဢမ်ႇၸၢင်ႈဝႃႈ ယွၼ်ႉၸဵပ်းႁႅင်းၼႃႇလႄႈ ဢမ်ႇၸၢင်ႈ ၵႂႃႇ ၸွမ်း။ ယဝ်ႉၵေႃႈ လိုၵ်းႁႅင်းၼႃႇယဝ်ႉ ဝႃႈၼၼ်သေ သိုၵ်းလွႆၼၼ်ႉ ၸင်ႇပွၵ်ႈမိူဝ်းၶိုၼ်းၶႃႈဢေႃႈ”- ၵူၼ်းပိုၼ်ႉတီႈ ဝဵင်း သႅၼ်ဝီ သိုပ်ႇလၢတ်ႈၼႄၼင်ႇၼႆ။
တပ်ႉသိုၵ်းတဢၢင်း ဢၼ်ၶဝ်ႁွင်ႉပူႇၵႄႇ ၵႂႃႇထူပ်းၶဝ်ၼၼ်ႉ ပၵ်းဝႆႉတီႈတႃႈၶၢႆ ၼႂ်းဢိူင်ႇမိူင်းပႃး ၸႄႈဝဵင်းသႅၼ်ဝီဝႆႉ ဝႃႈၼႆ။
ၵဵဝ်ႇၵပ်းလွင်ႈၼႆႉ ယူႇတီႈ ၽူႈတွႆႇႁွၵ်ႈ ၵပ်းၸူး ၽူႈၶၢၼ်ပၢၵ်ႇ သိုၵ်းတဢၢင်း TNLA ၵေႃႈ ၵပ်းဢမ်ႇလႆႈ။
