ၽွင်းၵူၼ်းမိူင်းယၢင်းလႅင် ၶွတ်ႇၽွတ်ႈလူင်ပွင်ၸိုင်ႈမိူင်းယၢင်းလႅင် တႃႇမီးလွင်ႈသုၼ်ႇလႆႈတႅပ်းတတ်း ႁင်းၶေႃၼၼ်ႉ သိုၵ်းမၢၼ်ႈပိုတ်းယိုဝ်း ၸုမ်းသိုၵ်းၽွမ်ႉႁူမ်ႈယၢင်းလႅင် KA -KNLA လႄႈ PDF၊ သိုၵ်းမၢၼ်ႈလၢမ်းလိမ်းယိုဝ်း ၶိူင်ႈၵွင်ႈလူင်ၵႂႃႇသီႇႁူးႁႃႈတၢင်း ၼႂ်းမိူင်းယၢင်းလႅင်ၵူၺ်းဢမ်ႇၵႃး ယိုဝ်းသႂ်ႇပႃးတီႈလႅၼ်လိၼ်တႆး-ယၢင်းလႅင် တူၵ်းသႂ်ႇၼႂ်းဝၢၼ်ႈပီႈၼွင်ႉတႆးယူႇသဝ်း ႁဵတ်းႁႂ်ႈပီႈၼွင်ႉတႆးလႆႈႁူပ်ႉ ၽေးသိုၵ်းသိူဝ်ပႃးထႅင်ႈတင်းၼမ်။
မိူဝ်ႈဝၼ်းတီႈ 8 ယၢမ်းၵၢင်ၶမ်ႈ သိုၵ်းမၢၼ်ႈယိုဝ်းၵွင်ႈလူင် သႂ်ႇတီႈဝၢၼ်ႈတိုဝ်ႉၸၢႆးၶႃး ဝဵင်းလွႆလႅမ်ဢွၼ်ႇ လႅၼ်လိၼ်တႆးယၢင်းလႅင်။
မၢၵ်ႇလူင်တိူဝ်ႉၺႃးႁိူၼ်းယေးၵူၼ်းဝၢၼ်ႈ ၾႆးမႆႈလူႉၵွႆ။ ငိုၼ်းၸေႈႁူဝ်ပၢၵ်ႇသႅၼ်ပျႃးၺႃးၾႆးမႆႈသုမ်းမူတ်း။ ၶူဝ်းၶွင်ႁိူၼ်းယေးၵူၼ်းမိူင်းၵေႃႈၵွႆ။ ၸၢၵ်ႇမၢၵ်ႇတိူဝ်ႉၺႃးၸဝ်ႈႁိူၼ်း မၢတ်ႇၸဵပ်း။
ၵူၼ်းဝၢၼ်ႈတိုဝ်ႉၸၢႆးၶႃးလၢတ်ႈတီႈၽူႈတွႆႇႁွၵ်ႈဝႃႈ -“ ၽွင်းသိုၵ်းမၢၼ်ႈယိုဝ်းၼၼ်ႉ ဢမ်ႇမီးပၢင်တိုၵ်းသင်ၶႃႈလူင်။ ၶဝ်တင်ႈၸႂ်ယိုဝ်းၵွင်ႈလူင်ၶဝ်ႈဝၢၼ်ႈၼၼ်ႉယဝ်ႉၶႃႈ။ ၶဝ်ယိုဝ်းမွၵ်ႈ 7 မူင်းပၢႆၼႆႉ ၵူႈၶမ်ႈၶႃႈဢေႃႈ ။ ပဵၼ်တပ်ႉ 530 ၼၼ်ႉၶႃႈယဝ်ႉ။ တိူဝ်ႉႁိူၼ်းၸၢႆးႁူင်းၶဝ် ၾႆးမႆႈ သမ်ႉပေႃးၶႂ်ႈသုမ်းမူတ်းၶႃႈဢေႃႈ။ ၸၢၵ်ႇမၢၵ်ႇၵေႃႈတိူဝ်ႉသႂ်ႇ လင်မၼ်း ပေႃးလဵၼ်းပေႃးလၢႆးၵႂႃႇမူတ်း” – ဝႃႈၼႆ။
မၢၵ်ႇၼႆႉပဵၼ်တပ်ႉသိုၵ်းမၢၼ်ႈ ၶမယ 530 ယိုဝ်းၶဝ်ႈဝၢၼ်ႈတိုဝ်ႉၸၢႆးၶႃး 5 လုၵ်ႈ။ ၸၢၵ်ႇမၢၵ်ႇတူၵ်းသႂ်ႇပႃးႁၢၼ်ႉၶၢႆၶူဝ်းၶွင်ၵေႃႇသၢင်ႈႁိူၼ်းယေးလႄႈ ၶိူင်ႈမႄးရူတ်ႉၶိူင်ႈ လူႉသုမ်းမူတ်း၊ လိူဝ်ၼၼ်ႉ ငိုၼ်းၸေႈၵေႃႈ ၾႆးမႆႈၵႂႃႇ 130 သႅၼ်ပျႃး ၊ ၸဝ်ႈႁိူၼ်းၸိုဝ်ႈၸၢႆးႁိူင်း ၸၢၵ်ႇမၢၵ်ႇတိူဝ်ႉသႂ်ႇတီႈလင်မၢတ်ႇၸဵပ်း တပ်ႉၵႅတ်ႇၶႄၵူၼ်းမိူင်းပိုၼ်ၽၢဝ်ႇၼင်ႇၼႆ။
ၼွၵ်ႈလိူဝ်ႈဝၢၼ်ႈတီႈ တိုဝ်ႉၸၢႆးၶႃးယဝ်ႉ တီႈဝၢၼ်ႈလိၼ်ၽုင်ႇ ဝၢၼ်ႈတႆး ဢၼ်မီးႁိမ်းဝၢၼ်ႈတိုဝ်ႉၸၢႆးၶႃးၼၼ်ႉၵေႃႈ တုမ်ႉတိူဝ်ႉၺႃးၸၢၵ်ႇမၢၵ်ႇ။
“တီႈဝၢၼ်ႈလိၼ်ၽုင်ႇၼႆႉၵေႃႈ ပဵၼ်ဝၢၼ်ႈတႆး ၶႃႈဢေႃႈ ။ မီးလင်ႁိူၼ်းမွၵ်ႈ 100 ပၢႆ။ ၺႃးမၢၵ်ႇလူင်တိူဝ်ႉၵွႆၵႂႃႇမွၵ်ႈ 15 လင်ၼႆႉ။ ၵူၼ်းဝၢၼ်ႈၵေႃႈလႆႈမႃးသွၼ်ႈယူႇတီႈၵျွင်းၵမထၢၼ်းတိုဝ်ႉၸၢႆးၶႃး။ လွင်ႈၵိၼ်ယမ်ႉလႄႈ ၶူဝ်းၶွင်ၵမ်ႈၽွင်ႈ UN မႃးၸွႆႈဝႆႉ။ ၵူၼ်းတႄႉၵေႃႈ တိူဝ်ႉပၢႆးၸႂ်ၵၼ်ၶႃႈဢေႃႈ။ ဢမ်ႇၶႂ်ႈႁတ်းမိူဝ်းယူႇၶိုၼ်းတီႈဝၢၼ်ႈယဝ်ႉ။ ” ၵူၼ်းလွႆလႅမ်ဢွၼ်ႇၵေႃႉၼိုင်ႈလၢတ်ႈၼင်ႇၼႆ။
တီႈမိူင်းယၢင်းလႅင်ၼႆႉ မီးယၢင်းလႅင်ၵူၺ်းဢမ်ႇၵႃး မီးပႃး တႆး ပဢူဝ်း လႄႈလၢႆလၢႆၸၢဝ်းၶိူဝ်း ယူႇႁူမ်ႈၵၼ်ဝႆႉ။ ဝၢႆးလင်သိုၵ်းမၢၼ်ႈယိုတ်းဢႃႇၼႃႇမႃးၼႆႉ ၵူၼ်းမိူင်းၼပ်ႉႁူဝ်သႅၼ် လႆႈထူပ်းၽေးသိုၵ်းသိူဝ်။
တႃႇလႆႈသုၼ်ႇလႆႈဢၼ်လုသုမ်းၵႂႃႇၼၼ်ႉသေ တႃႇလႆႈၽွင်းငမ်းတူဝ်ၵဝ်ႇၵႂႃႇၼၼ်ႉ ၶွင်ႇသီႇၵိူဝ်းၵုမ်မိူင်းယၢင်းလႅင် ဢၼ်ၵေႃႇတင်ႈမႃးမိူဝ်ႈဝၼ်းတီႈ 9 လိူၼ်ဢေႊပရိူဝ်ႊ 2021 ၼၼ်ႉ ပိုၼ်ၽၢဝ်ႇၶွတ်ႇၽွတ်ႈလူင်ပွင်ၸိုင်ႈ မိူင်းယၢင်းလႅင် (Interim Executive Council of Karenni State – IEC) မိူဝ်ႈဝၼ်းတီႈ 12 လိူၼ်ၵျုၼ်ႊ ပီ 2023 ဝႃႈၼႆ။
