ၵႃးတၢင်ႇၵုၼ်ႇလမ်းၼိုင်ႈ ပိၼ်ႈၶႂမ်ႈၼိူဝ် သဵၼ်ႈတၢင်းလူင် ၼွင်ၶဵဝ် –  လွၵ်ႉၸွၵ်ႇ ၵူၼ်းႁေႃႈၵႃး တၢႆထင်တီႈ။

မိူဝ်ႈဝႃး ဝၼ်းတီႈ 14/6/2023 ယၢမ်းၵၢင်ဝၼ်း 1 မူင်းၶိုင်ႈၼၼ်ႉ ၵႃးတၢင်ႇၶဝ်ႈၵၢပ်ႇလမ်းၼိုင်ႈ ပိၼ်ႈၶႂမ်ႈၼိူဝ် သဵၼ်ႈတၢင်းလူင် ၼွင်ၶဵဝ် – လွၵ်ႉၸွၵ်ႇ ႁိမ်ႈၵုင်းမၢၵ်ႇမူင်ႈ( သရက်ကုန်းရွာ) ဢၼ်ယၢၼ်ၵႆ ဝဵင်းၼွင်ၶဵဝ် 6 လၵ်း ၼၼ်ႉသေ ၵူၼ်းႁေႃႈၵႃး လူႉတၢႆထင်တီႈ။

ၽူႈတူင်ႉၼိုင်ၼႂ်းၸုမ်းၸွႆႈတူင်ႇဝူင်းၵူၼ်းၼွင်ၶဵဝ်ၵေႃႉၼိုင်ႈလၢတ်ႈတီႈၽူႈတွႆႇႁွၵ်ႈဝႃႈ – “ ၸႂ်ႈဢေႃႈ ၾူၼ်တူၵ်းသေ တၢင်းသမ်ႉမိုၼ်ႈ ၼၼ်ႉၼႃႇ  မိူဝ်ႈၶဝ်ထိုင်သႂ်ႇ တီႈၵုင်းမၢၵ်ႇမူင်ႈၼၼ်ႉ ၵႃးသမ်ႉႁေႃႈဝႆးၽွင်ႈႁေၼႆၵေႃႈ တေဢမ်ႇၵုမ်းလႆႈလီလီႁေ ထိုင်ပေႃးပိၼ်ႈၼၼ်ႉယဝ်ႉ ။ ထိုင်တီႈတၢင်းၵူင်ႉၼၼ်ႉယဝ်ႉ ၸင်ႇပဵၼ်ၼၼ်။ ၵူၼ်းႁေႃႈမၼ်းတႄႉ တၢႆၶမ်ႁူဝ်ၵႃးမၼ်းၼၼ်ႉဢေႃႈ။ဢဝ်ဢွၵ်ႇပေႃးပဵၼ်ယၢပ်ႇၶႃႈယဝ်ႉ ၵူၼ်းၸွမ်းလင်မၼ်းတႄႉ ဢမ်ႇပေႃးပဵၼ်ႁႅင်းၵႃႈႁိုဝ်” – ဝႃႈၼႆ။

ၵေႃႉဢၼ်လူႉတၢႆၵႂႃႇၼႆႉ ၸိုဝ်ႈ ၸီႇတူႇဢွင်ႇ  ဢႃယု 31 ပီ တိုၵ်ႉတႄႇၼႃႈႁိူၼ်းဝႆႉပႆႇႁိုင် ပဵၼ်ၵူၼ်းတွင်ႇတုၼ်းၵျီး တိူင်းမၵူၺ်း ။ မိူဝ်ႈလဵဝ် ၸုမ်းၸွႆႈတူင်ႇဝူင်းၵူၼ်း ၸွႆႈဢဝ်တူဝ်တၢႆမၼ်းၸၢႆးသူင်ႇဝႆႉ တီႈႁူင်းယႃလူင်ၼွင်ၶဵဝ်။

ၽူႈတူင်ႉၼိုင်ၼႂ်းၸုမ်းၸွႆႈတူင်ႇဝူင်းၵူၼ်းၼွင်ၶဵဝ်ၵေႃႉၼိုင်ႈလၢတ်ႈတီႈၽူႈတွႆႇႁွၵ်ႈဝႃႈ – “ တီႈၶဝ် ပိၼ်ႈၼႆႉ ပဵၼ်တီႈပိူၼ်ႈၵႆႉၵႆႉ ပိၼ်ႈဢေႃႈ ။ပဵၼ်သဵၼ်ႈၵူတ်ႉငွၵ်းလူင်ဢေႃႈၼၼ်ႉတီႈၼၼ်ႈ  ” – ဝႃႈၼႆ။

မိူၼ်ၼၼ်ၼင်ႇၵဝ်ႇ မိူဝ်ႈဝႃး ဝၼ်းတီႈ 14/6/2023 ႁူဝ်ၶမ်ႈ 3 မူင်းၼၼ်ႉၵေႃႈ ရူတ်ႉၶိူင်ႈပဵၼ်ၽေးၵိုင်ႉၵၢင်ႉ ၼိူဝ်သဵၼ်ႈတၢင်းလူင် တႃႈၶီႈလဵၵ်း – ၵဵင်းတုင် ပဵၼ်တီႈလူင်းလွႆပၢင်ၵႂၢႆး ၵူၼ်းၸၢႆးၵေႃႉၼိုင်ႈ မၢတ်ႇၸဵပ်း ႁၢဝ်ႈႁႅင်း ထိုင်တီႈလႆႈႁၢမ်သူင်ႇႁူင်းယႃ။

ပူၼ်ႉမႃး ဝၼ်းတီႈ 22/5/2023 ၼၼ်ႉၵေႃႈ ရူတ်ႉၶိူင်ႈတင်း ရူတ်ႉသၢမ်လေႃႉ (တုၵ်းတုၵ်း) ၽႃႇၵၼ် တီႈႁိမ်း တူဝ်းၵဵၵ်ႉ ၼိူဝ်သဵၼ်ႈတၢင်းလူင် ၵဵင်းတုင် – တႃႈၶီႈလဵၵ်း ၼႂ်းၸႄႈဝဵင်းၵဵင်းတုင် ၸိုင်ႈတႆးပွတ်းဢွၵ်ႇၶူင်း မီးလွင်ႈမၢတ်ႇၸဵပ်း ၵေႃႉၼိုင်ႈ ပဵၼ်ၽူႈၸၢႆး လႆႈတေႃႉသူင်ႇယႃတူဝ် တီႈႁူင်းယႃလူင်ၵဵင်းတုင်။