ၽွင်းၶၢဝ်းသွၼ်းၼမ်ႉလိူၼ်ႁႃႈ ပူၼ်ႉမႃးၼႆႉ ဢွၼ်ႇယိင်း ဢႃယု 16 ပီ ၵႂႃႇဢႅဝ်ႇတၢတ်ႇႁၢႆးပႃသေ တူၵ်းၼမ်ႉတၢႆ ၵေႃႉၼိုင်ႈ ဝႃႈၼႆ။
ဝၼ်းတီႈ 14/04/2018 ဝၼ်းသၢင်းၵျၢၼ်ႇတူၵ်း ဢွၼ်ႇယိင်း ဢႃယု 16 ပီ ၵေႃႉၼိုင်ႈ ပဵၼ်ၵူၼ်းၸႃတိ ဝၢၼ်ႈသေႃႉ ၸႄႈဝဵင်းမိူင်းသူႈ ၵႂႃႇဢႅဝ်ႇလႄႇၼမ်ႉတူၵ်းတၢတ်ႇႁၢႆးပႃ ၶိုၼ်ႈၵႂႃႇတႆႇၼိူဝ်တၢတ်ႇလႄႈ ပလၢတ်ႈ တူၵ်းၼမ်ႉ/ ၸူမ်ၼမ်ႉတၢႆ ဝႃႈၼႆ။
ၼၢင်းၵွင်ၶမ်း ၽူႈတႅၼ်းသၽႃးၸႄႈမိူင်းၶဵတ်ႇလိူၵ်ႈတင်ႈ မၢႆ(2) လၢတ်ႈတီႈၽူႈတွႆႇႁွၵ်ႈဝႃႈ “ ၸႂ်ႈၶႃႈဢေႃႈ ပဵၼ် ဢွၼ်ႇယိင်း ဝၢၼ်ႈသေႃႉ။ တီႈတႄႉမၼ်း ဢွၼ်ႇယိင်းၵေႃႉၼၼ်ႉ မၼ်းလီႁူႉယူႇ ယွၼ်ႉမၼ်းၼၢင်းပဵၼ်ၵူၼ်း မိူင်း သူႈၵေႃႉၼိုင်ႈ ပိူၼ်ႈလၢတ်ႈယူႇဝႃႈ ယႃႇပေၵႂႃႇတႆႇတၢတ်ႇ မၼ်းသမ်ႉဢမ်ႇထွမ်ႇ သမ်ႉၵႂႃႇတႆႇတၢတ်ႇ။ ယွၼ်ႉတီႈ တၢတ်ႇၼၼ်ႉ မၼ်းမိုၼ်ႈလႄႈ ပလၢတ်ႈတူၵ်းတၢတ်ႇ” ဝႃႈၼႆ။
ဝၢႆးသွၼ်းၼမ်ႉလိူၼ်ႁႃႈ 2 ဝၼ်းယဝ်ႉ ၵူၼ်းဝၢၼ်ႈၸင်ႇထူပ်းႁၼ် တူဝ်တၢႆမၼ်းၼၢင်းသေ ယူႇတီႈၸိူဝ်ႉၶိူဝ်းပီႈၼွင်ႉ ၸင်ႇဢွၼ်ၵၼ်လုမ်းလႃးသၢင်းၵဵဝ်ႇပၼ် တီႈႁိမ်းတၢတ်ႇၼၼ်ႉၵမ်းလဵဝ် ဝႃႈၼႆ။
ၼၢင်းၵွင်ၶမ်း လၢတ်ႈဝႃႈ တႄႇဢဝ် လိူၼ်ၵျႅၼ်ႊၼိဝ်ႊရီႊ တေႃႇထိုင် လိူၼ်ဢေႊပရိူဝ်ႊ 2018 (ၶၢဝ်းတၢင်း 4 လိူၼ်) ၼႆႉ မီးၵူၼ်း တူၵ်းတၢႆ တီႈတၢတ်ႇႁၢႆးပႃၼႆႉ 2 ၵေႃႉယဝ်ႉ။ ၵွၼ်ႇတေၽႅဝ်လိူၼ်ႁႃႈသွၼ်းၼမ်ႉၼႆႉ မီးဢွၼ်ႇၸၢႆးၵေႃႉၼိုင်ႈ ယူႇဝဵင်း ၼမ်ႉၸၢင် မႃးဢႅဝ်ႇၸွမ်းပေႃႈမႄႈၵူၼ်းႁိူၼ်းမၼ်း။ ၼၼ်ႉၵေႃႈ မႃးတႆႇတၢတ်ႇ သေပလၢတ်ႈတူၵ်းတၢတ်ႇၸူမ်ၼမ်ႉတၢႆ ၼင်ႇၵဝ်ႇ ဝႃႈၼႆ။
ၵူၼ်းပိုၼ်ႉတီႈတႄႉ ၼင်ႇႁိုဝ် ၵူၼ်းမႃးဢႅဝ်ႇယဵမ်ႈတေဢမ်ႇထူပ်းၽေးၼၼ်ႉ တႅမ်ႈလိၵ်ႈတိတ်းပႃႉ ၾၢင်ႉတိူၼ်ဝႆႉဝႃႈ ဢမ်ႇပၼ်တႆႇတၢတ်ႇ ဝႃႈၼႆ။
တၢတ်ႇႁၢႆးပႃၼႆႉ ပဵၼ်တၢတ်ႇဢၼ်ႁၢင်ႈလီ ဢၼ်ၼိုင်ႈ မီးၼႂ်းၸႄႈဝဵင်းမိူင်းသူႈ ယၢၼ်ၵႆဝဵင်းမိူင်းသူႈ မွၵ်ႈ 13 လၵ်း မီးၾၢႆႇၸဵင်ႇၸၢၼ်းဝၼ်းတူၵ်း မိူင်းသူႈ၊ ၼိုင်ႈဝၼ်းလႂ် မီးၵူၼ်းမိူင်း ၵႂႃႇဢႅဝ်ႇလႄႇ ဢမ်ႇယွမ်း 40-50 ၵေႃႉ။
