KIA တင်းသိုၵ်းမၢၼ်ႈ ယိုဝ်းၵၼ်တီႈ ၵူတ်ႉၶၢႆႁၢဝ်ႈႁႅင်း  မၢၵ်ႇလူင်တူၵ်းတႅၵ်ႇ ၼႂ်းဝၢၼ်ႈ။

မိူဝ်ႈဝၼ်းတီႈ 11/6/2023 ယၢမ်းၶမ်ႈ 8 မူင်းၼၼ်ႉ သိုၵ်းမၢၼ်ႈတင်း သိုၵ်းၶၢင် KIA ပိုတ်းယိုဝ်းၵၼ် တီႈတပ်ႉ ပၢင်သဝ်းသိုၵ်းမၢၼ်ႈ တၢင်းပွၵ်ႉ 1 ၸႄႈဝဵင်းၵူတ်ႉၶၢႆ ၼၼ်ႉသေ မၢၵ်ႇလူင်ၵႂႃႇတူၵ်းသႂ်ႇ ၼႂ်းဝၢၼ်ႈပၢၼ်းသေး ႁိူၼ်းလူႉၵွႆ လင်ၼိုင်ႈ ၼႆယဝ်ႉ။

ၵူၼ်းၼႂ်းပိုၼ်ႉတီႈၸႄႈဝဵင်းၵူတ်ႉၶၢႆၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “ ပၢင်တိုၵ်းၼႆႉ ပဵၼ်တၢင်း ပွၵ်ႉ 1 ပုၼ်ႉဢေႃႈ။ ပဵၼ်ၼႂ်းၵႄႈ ဝၢၼ်ႈပၢၼ်းသေး လႄႈ ပွၵ်ႉၼိုင်ႈ ဢေႃႈ။ တပ်ႉမၢၼ်ႈၼႆႉ ယူႇၶႅၼ်ႈဝၢၼ်ႈဝႆႉဢေႃႈ။ ၶဝ်တိုၵ်းၵၼ် တေႃႇထိုင် 12 မူင်းၵၢင်ၶိုၼ်းဢေႃႈ။ ပၢင်တိုၵ်းၼႆႉ ပဵၼ်သွင်ၵမ်းဢေႃႈ ” – ဝႃႈၼႆ။

ပၢင်တိုၵ်းပွၵ်ႈၼႆႉ မၢၵ်ႇၵွင်ႈလူင် သိုၵ်းမၢၼ်ႈ ၵႂႃႇတူၵ်းသႂ်ႇ ၼႂ်းဝၢၼ်ႈပၢၼ်းသေး ၼၼ်ႉသေ လင်ႁိူၼ်း ၵူၼ်းမိူင်း လင်ၼိုင်ႈ လူႉၵွႆ ၼႆယဝ်ႉ။

ၵူၼ်းၼႂ်းပိုၼ်ႉတီႈၸႄႈဝဵင်းၵူတ်ႉၶၢႆ သိုပ်ႇလၢတ်ႈဝႃႈ – “ ၶဝ်ယိုဝ်းၵၼ် ၵၢင်ၶိုၼ်းလႄႈ ဢမ်ႇတၼ်းလႆႈပၢႆႈၵႂႃႇတၢင်းလႂ် ။ လင်ႁိူၼ်းၺႃးမၢၵ်ႇတူၵ်းသႂ်ႇၼၼ်ႉၵေႃႈ ၸဝ်ႈႁိူၼ်းလႆႈၶၢႆႉယူႇဝႆႉ တၢင်ႇႁိူၼ်းဢေႃႈ။ၸုမ်းယိပ်းၵွင်ႈၵၢင်ႇၶဝ် ဢမ်ႇတူၺ်းထိုင်လုမ်းလႃးၶိုၼ်း ႁိူၼ်းၵူၼ်းမိူင်းၶႃႈ။မိူဝ်ႈလဵဝ် သဵင်ၵွင်ႈယဵၼ်ၵႂႃႇယဝ်ႉၼင်ႇၵဝ်ႇ ” – ဝႃႈၼႆ။

ၸႄႈဝဵင်းၵူတ်ႉၶၢႆၼႆႉ သိုၵ်းမၢၼ်ႈတင်း သိုၵ်းၸၢဝ်းၶိူဝ်း ပိုတ်းယိုဝ်းၵၼ်မႃး ၶိူဝ်းယႂ်းလႄႈ ၵူၼ်းပိုၼ်ႉတီႈ မႆႈၸႂ် ယွၼ်ႉဢမ်ႇမီးလွင်ႈႁူမ်ႇလူမ်ႈ။

ၵူၼ်းၼႂ်းပိုၼ်ႉတီႈၸႄႈဝဵင်းၵူတ်ႉၶၢႆ သိုပ်ႇလၢတ်ႈဝႃႈ – “ မိူဝ်ႈလဵဝ်ၼႆႉသမ်ႉ ပဵၼ်ၶၢဝ်းပိုတ်ႇႁူင်းႁဵၼ်း လႄႈ ပေႃးၵိုင်ႉၵၢင်ႉ ပဵၼ်ပၢင်တိုၵ်းၵၼ်မႃးၼႆ တႃႇတေႁပ်ႉသူင်ႇ လုၵ်ႈႁဵၼ်းၵေႃႈ ဢမ်ႇငၢႆႈငၢႆႈ ။လႆႈၵူဝ်ဢေႃႈ။မေႃသွၼ်ၶဝ်ၵေႃႈ လႆႈမႆႈၸႂ်ဢေႃႈ ၵွပ်ႈဝႃႈ မီးလုၵ်ႈႁဵၼ်းၼမ်လူးၼေႃ။ယွၼ်ႉၼၼ် ဢမ်ႇၶႂ်ႈႁႂ်ႈပဵၼ်ပၢင်တိုၵ်း ႁိမ်းဝၢၼ်ႈႁိမ်းဝဵင်းၶႃႈ ” – ဝႃႈၼႆ။

မိူဝ်ႈပူၼ်ႉမႃး ဝၼ်းတီႈ 9/6/2023 ၼၼ်ႉၵေႃႈ သိုၵ်းမၢၼ်ႈတင်း သိုၵ်းၶၢင် KIA ပိုတ်းယိုဝ်းၵၼ် တီႈ ၸႄႈဝဵင်းၵူတ်ႉၶၢႆ။

ဝၼ်းတပ်ႉသိုၵ်းမၢၼ်ႈၼၼ်ႉ ၾၢႆႇသိုၵ်းမၢၼ်ႈ ပိုၼ်ၽၢဝ်ႇၵိုတ်းတိုၵ်း ဝႆႉတႃႇၼိုင်ႈပီ  တွၼ်ႈတႃႇပၢင်လိူၵ်ႈတင်ႈ ဢၼ် ၶဝ် တေဢွၼ်ၼမ်းၸတ်းႁဵတ်းၼၼ်ႉတေဢွင်ႇမၢၼ် ဝႃႈၼႆသေတႃႉ ထိုင်မိူဝ်ႈလဵဝ် တိုၵ်ႉသိုပ်ႇႁႅၼ်းသိုၵ်းလေႃႇတိုၵ်း ၸုမ်းယိပ်းၵွင်ႈၵၢင်ႇၸၢဝ်းၶိူဝ်းယူႇၶိူဝ်းယႂ်း။