ၵၢၼ်ၵေႃႇသၢင်ႈ ၶူဝ်ၶၢမ်ႈတႃႈသူပ်းတဵင်း(ၼမ်ႉၶူင်း) တႄႇယဝ်ႉ

တႃႇသဵၼ်ႈတႃႈသၢႆတၢင်း ပွတ်းၸၢၼ်း – ပွတ်းဢွၵ်ႇၶူင်း ပေႃးတေၵၢႆႇၸူး ၵႂႃႇမႃးငၢႆႈလူမ်ၸႂ် လီၼႆသေ တႃႇၵေႃႇသၢင်ႈၶူဝ်ၶၢမ်ႈတႃႈသူပ်းတဵင်း(ၼမ်ႉၶူင်း) ၼၼ်ႉ တႄႇၾင်သဝ် တၢင်းၾၢႆႇတူၵ်းၶူင်း ယဝ်ႉ 4 သဝ်။

ၼႂ်းပီ 2023 ၶၢဝ်းတၢင်း 6 လိူၼ်ၼႆႉ သဝ်ၶူဝ်ၶၢမ်ႈၶူင်းတႃႈသူပ်းတဵင်းတွၵ်ႇယဝ်ႉၵႂႃႇ 4 လၵ်းယဝ်ႉဝႃႈၼႆ။

ၽူႈတူင်ႉၼိုင် ၼႂ်းတူင်ႇဝူင်းတႆး ၸႄႈတွၼ်ႈလၢင်းၶိူဝ်း လၢတ်ႈတီႈၽူႈတွႆႇႁွၵ်ႈဝႃႈ – “ပီၵၢႆ 2022 ၼၼ်ႉ ၾၢႆႇၵေႃႇသၢင်ႈၶဝ် လူင်းမႃးၵူတ်ႇထတ်းတႅၵ်ႇတူၺ်းသေ ပီ 2023 ၼႆႉ ႁၼ်ၶဝ် မႃးတွၵ်ႇသဝ် တၢင်းတူၵ်းၶူင်းၼႆႉ ယဝ်ႉၵႂႃႇ 4 သဝ်ယဝ်ႉ။ ၶဝ်ႁၢင်ႈ ႁႅၼ်းၶိူင်ႈမႆႉၶိူင်းမိုဝ်း၊ ဢွင်ႈတီႈၵူၼ်းႁဵတ်းၵၢၼ်ၶဝ်ယူႇ၊ ၶိူင်ႈၸၢၵ်ႈ ၸိူဝ်းၼႆႉ ၶဝ်ႁဵတ်းယဝ်ႉ မူတ်းယဝ်ႉ။ ၶူင်းၵၢၼ်ၶဝ်ၼႆႉ ဢၢၼ်း ဝႆႉ တႃႇ 5 ပီ။ ပေႃးႁဝ်းၶႃႈ တူၺ်းငဝ်းလၢႆးမၼ်းတႄႉ လႅပ်ႈတေဢမ်ႇထိုင် ယွၼ်ႉဝႃႈ ၶိင်းၽွင်းလူင် မိူင်းတႆး ယၢမ်းလဵဝ်ၼႆႉ ၵႆႉ မႃးလၢင်းၶိူဝ်းသေ ပူၼ်ႉၵႂႃႇတူၺ်းတၢင်းတႃႈသူပ်းတဵင်းၼႃႇယဝ်ႉ ၶူဝ်ၼႆႉ လႅပ်ႈၶဝ်တေဢၢင်းၵေႃႇသၢင်ႈယဝ်ႉ ၼႂ်းၶၢဝ်းတၢင်း 3 ပီၼႆႉၵူၺ်း”- ဝႃႈၼႆ။

တႃႇတေၵေႃႇသၢင်ႈ ၶူဝ်တႃႈသူပ်းတဵင်းၼႆႉ သၽႃးတၢင်ႇယွၼ်းငိုၼ်းတီႈ လူင်ပွင်ၸိုင်ႈၼူၵ်ႉယုင်း NLD ဝႆႉ ။

“ၵူၼ်းမႃးႁဵတ်းတႄႉ ပဵၼ်ၸၢဝ်းမၢၼ်ႈ ၵူၺ်းၵႃႈ ပဵၼ်ဢိၼ်ႇၵျိၼ်ႇၼီႇယိူဝ်ႇ ၸုမ်းလႂ်တႄႉ ဢမ်ႇႁူႉ။ ပႆႇႁၼ်ၶဝ် ပူၵ်းပၢႆႉသင်။ သင်ၶဝ် ပူၵ်းပၢႆႉယဝ်ႉ တေလႆႈႁူႉဝႃႈ ငိုၼ်းတေသဵင်ႈၵႃႈႁိုဝ်၊ တေၸႂ်ႉၶၢဝ်းယၢမ်းႁိုင်ၵႃႈႁိုဝ် ၼႆၸိူဝ်းၼႆႉ။ ၶူင်း ၵၢၼ်တႃႇသၢင်ႈ ၶူဝ်ၼႆႉ တၢင်ႇဝႆႉတင်ႈတႄႇ မိူဝ်ႈပၢၼ်ၼူၵ်ႉယုင်းၼၼ်ႉယဝ်ႉ။ ၶူဝ်ၼႆႉ တေၵေႃႇသၢင်ႈ ၶူဝ်ပုၼ် ပူၵ်းသဝ်။ ၶူဝ်ၽႅၼ်တႄႉ လႅပ်ႈ တေဢမ်ႇပဵၼ်”- ၽူးတူင်ႉၼိုင် ၼႂ်းတူင်ႇဝူင်းတႆး သိုပ်ႇလၢတ်ႈၼႄၼင်ႇၼႆ။

သဵၼ်ႈတၢင်း ဢၼ်ၵၢႆႇၸူးၵၼ် လၢင်းၶိူဝ်း – ႁူဝ်မိူင်းၼႆႉ ပေႃးဢဝ်ၵီႇလူဝ်ႇမၼ်းဝႃႈၼႆၸိုင် တေၵႆၵၼ် 129 ၵီးလူဝ်း။ သင်ဝႃႈ ႁွတ်ႈထိုင် လၢၼ်ႇၼႃးမူၼ်း လႅၼ်လိၼ်တႆး – ထႆးၸိုင် တေၵႆၵၼ် 150 ၵီးလူဝ်း ၼႆယဝ်ႉ။

ၵူၼ်းပိုၼ်ႉတီႈ ဝဵင်းလၢင်းၶိူဝ်း လၢတ်ႈတီႈၽူႈတွႆႇႁွၵ်ႈဝႃႈ – “သင်ဝႃႈ ၶူဝ်တႃႈသူပ်းတဵင်းၼႆႉ ယဝ်ႉၼႆၸိုင် ၵူၼ်းမိူင်းတႆး ပွတ်း ၸၢၼ်း – ပွတ်းဢွၵ်ႇၶူင်း တေၵႂႃႇမႃးၵႃႉၶၢႆ လႆႈငၢႆႈလူမ်ၸႂ်လီတႄႉတႄႉ။ တေၸမ်လိူဝ်သေ တၢင်းတႃႈၶီႈလဵၵ်း – ၵဵင်းတုင် ပူၼ်ႉ ၵွၼ်ႇၶႃႈဢေႃႈ။ ယၢမ်းလဵဝ် သဵၼ်ႈတၢင်းၼႆႉ လုၵ်ႉတူၼ်ႈတီး ထိုင်ၾင်ႇၶူင်း လၢင်းၶိူဝ်းၼႆႉ သဵၼ်ႈတၢင်းသိူဝ်ႇယၢင်ႇ၊ ၵႂၢင်ႈလီၼႃႇယဝ်ႉ။ ၵူၺ်းၵႃႈ သဵၼ်ႈတၢင်း တႄႇဢဝ် ၾင်ႇၶူင်းတၢင်းၾၢႆႇဢွၵ်ႇၶူင်း ထိုင်ႁူဝ်မိူင်း – လၢၼ်ႇၼႃးမူၼ်းတႄႉ ပႆႇလီ။ လႆႈငိၼ်းဝႃႈ တႄႇဢဝ် လၢၼ်ႇၼႃးမူၼ်းထိုင် ႁူဝ်မိူင်းတႄႉ ထႆးၶဝ် တေဢဝ်ပုၼ်ႈ ၽွၼ်းႁဵတ်းမႃး”- ဝႃႈၼႆ။

သဵၼ်ႈတၢင်းၼႆႉ တေပဵၼ်သဵၼ်ႈတၢင်း ဢၼ်ၵၢႆႇၸူးၵၼ် တၢင်းလႅၼ်လိၼ်တႆး – ထႆး ၵမ်းသိုဝ်ႈ တေလုၵ်ႉတူၼ်ႈတီး – သီႇသႅင်ႇ – မွၵ်ႇမႆႇ – လၢင်းၶိူဝ်း – ႁူဝ်မိူင်း ထိုင် လၢၼ်ႇၼႃးမူၼ်း ၶဝ်ႈမႄႈႁွင်ႈသွၼ် မိူင်းထႆး ၼႆႉသဵၼ်ႈၼိုင်ႈ။ လိူဝ် ၼၼ်ႉ လုၵ်ႉ တၢင်းတူၼ်ႈတီး – ၼမ်ႉၸၢင် – မိူင်းၼၢႆး – လၢင်းၶိူဝ်း ၼႆႉမႃးထႅင်ႈသဵၼ်ႈၼိုင်ႈ ဢၼ်ပွင်ႇၸူးၵၼ်။

“သင်ဝႃႈ ၶူဝ်တႃႈသူပ်းတဵင်း (ၼမ်ႉၶူင်း) ၼႆႉ ယဝ်ႉၵႂႃႇၸိုင် ၶူဝ်းၵုၼ်ႇ ဢၼ်ၶဝ်ႈဢွၵ်ႇတၢင်းသဵၼ်ႈၼႆႉ ၶူဝ်းမိူင်းတႆး တေႃႉၶဝ်ႈ မိူင်းထႆးသမ်ႉ တေပဵၼ်ၶူဝ်းသူၼ်၊ ဝူဝ်းၵႂၢႆး ၸိူဝ်းၼႆႉ။ သင်ဝႃႈ လုၵ်ႉတၢင်းမိူင်းထႆး ၶဝ်ႈမႃးသမ်ႉ တေပဵၼ် ၶူဝ်းၵုၼ်ႇ ၶွင်ၵိၼ် ယႅမ်ႉ၊ ၼမ်ႉသူမ်ႈၼမ်ႉဝၢၼ်၊ ပီႇယိူဝ်ႇ၊ ၼမ်ႉမၼ်းၸိူဝ်ႉၾႆး (ၼမ်ႉမၼ်းၸၢၵ်ႈ) ၸိူဝ်းၼႆႉ ပဵၼ်ပိူင်ယႂ်ႇ ”- ၽူႈၵႃႉၶၢႆ ပၢႆးမၢၵ်ႈမီး တၢင်းပွတ်းၸၢၼ်း ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈၼင်ႇၼႆ။

ၸုမ်းယိပ်းၵွင်ႈၵၢင်ႇ ဢၼ်တူင်ႉၼိုင်ယူႇဝႆႉ တၢင်းၼႆႉသမ်ႉ တေမီးသိုၵ်းမၢၼ်ႈလႄႈ ၸုမ်းပျီႇတူႉၸိတ်ႉ S3 တူဝ် ၸိူဝ်း ၼႆႉ။

ထႅင်ႈလွင်ႈၼိုင်ႈ ဢၼ်ၵူၼ်းမိူင်း ပိုၼ်ႉတီႈၵႂႃႇမႃး သဵၼ်ႈတၢင်းၼႆႉ ယၢပ်ႇၽိုတ်ႇသမ်ႉ လွင်ႈၸဝ်ႈႁိူဝ်း ႁပ်ႉသူင်ႇတေႃႉၶၢမ်ႈ ၼမ်ႉ ၶူင်း တႃႈသူပ်းတဵင်းၼႆႉ သင်ဝႃႈ ဢမ်ႇၸႂ်ႈၶၢဝ်းယၢမ်းမၼ်းၼႆ ပႆႇၶၢမ်ႈႁပ်ႉတေႃႉသူင်ႇပၼ်။ ယွၼ်ႉပဵၼ် ၽွင်းၸဝ်ႈႁိူဝ်း လိုဝ်ႈ ၵၢၼ် ၽွင်း 12:00 မူင်းၵၢင်ဝၼ်း ထိုင် 2:30 မူင်း ဝၢႆးဝၼ်း ၼႆယဝ်ႉ။