မိူဝ်ႈဝႃး ဝၼ်းတီႈ 12/6/2023 ယၢမ်းၶမ်ႈ 8 မူင်းပၢႆၼၼ်ႉ ၵူၼ်းၸၢႆးၵေႃႉၼိုင်ႈ တီႈဝၢၼ်ႈပၢင်လိၼ် ဢိူင်ႇမိူင်းၶွၼ် ၸႄႈဝဵင်းၵဵင်းတုင် ၶႃႈႁႅမ်ၵေႃႉပဵၼ်မႄႈ လူႉတၢႆ ၼႂ်းႁိူၼ်း။

ၸုမ်းၸွႆႈတူင်ႇဝူင်းၵူၼ်းတႆးၼိူဝ် လၢတ်ႈတီႈၽူႈတွႆႇႁွၵ်ႈဝႃႈ – “ ၸႂ်ႈဢေႃႈ မိူဝ်ႈပိူၼ်ႈႁွင်ႉႁဝ်းၵႂႃႇၼၼ်ႉ ယႄးၶဝ် ပေႃးႁွတ်ႈဝႆႉယဝ်ႉတီႈၼၼ်ႈ။တေပဵၼ်ၵူၼ်းမဝ်းယႃႈ ၵျွင်ႇယႃႈ ၵူၺ်းၼင်ႇၵဝ်ႇၵႂႃႈ။ႁိူၼ်းၶဝ်ၵေႃႈ မီးၼႂ်းၵႄႈပိူၼ်ႈ ယူႇၵၼ်ၼမ်ဢေႃႈ ။ ၵူၼ်းဝၢၼ်ႈၶဝ် တီႉၺွပ်းဝႆႉၵူၼ်းၸၢႆးၼၼ်ႉ ဝႆႉပၼ် ယႄးၶဝ်ယူႇဢေႃႈၼၼ်ႉ။ ၸုမ်းႁဝ်းတႄႉ မိူဝ်းတေႃႉ ၵူၼ်းတၢႆ သူင်ႇပၼ်ႁူင်းယႃ တႃႇၵူတ်ႇထတ်းၼၼ်ႉၼႃႇၼေႃႈ” – ဝႃႈၼႆ။

ၵူၼ်းၸၢႆးၵေႃႉဢၼ်ပူၼ်ႉပႅၼ်ၼႆႉ ၸိုဝ်ႈ ဢႃမူၵ်ႉ ဢႃယု 30 ပီ ၊ ၵေႃႉလူႉတၢႆ ၸိုဝ်ႈ ပႃႈၼႃႇလေႃး ဢႃယု မီး 60 ပၢႆ ပဵၼ်ၸၢဝ်းလႃးႁူႇ ယူႇဝၢၼ်ႈပၢင်လိၼ် ဢိူင်ႇမိူင်းၶွၼ် ၸႄႈဝဵင်းၵဵင်းတုင် ။

ၸုမ်းၸွႆႈတူင်ႇဝူင်းၵူၼ်းတႆးၼိူဝ် လၢတ်ႈတီႈၽူႈတွႆႇႁွၵ်ႈဝႃႈ – “ လွင်ႈမႄႈလုၵ်ႈၶႃႈႁႅမ်ၵၼ်တၢႆ ၸိူင်ႉၼႆႉ ဢမ်ႇသူႈငိၼ်း ။ ပဵၼ်ယွၼ်ႉယႃႈမဝ်းၵမ်ၵူၺ်း။ တၢင်းမိူင်းၶွၼ်ၼႆႉသမ်ႉ ယႃႈမဝ်းၵမ်ႈလိူင်ႇၼႃႇလူး ။ ၵူၼ်းၸၢႆးၵေႃႉၼႆႉ မၼ်းဢဝ်မႆႉပေႃႉၶဝ်ႈ  ထုပ်ႉပေႃႉ မႄႈမၼ်းၶိုၼ်း ၼႆဢေႃႈ ။ ၸွမ်းၵွၵ်းႁူဝ်လႄႈ ၶေႃးမႄႈမၼ်း  ပေႃးပဵၼ်လိူတ်ႈ ပဵၼ်ယၢင်ၵႂႃႇမူတ်းဢေႃႈ ” – ဝႃႈၼႆ။

ၼႂ်းပီ 2022- 2023 မႃးၼႆႉၵူၼ်းမိူင်းတႆး ယၢပ်ႇၽိုတ်ႇၵၢၼ်ႁႃၵိၼ်လဵင်ႉတွင်ႉ။ ပၢင်တေႃႇလွင်းၼမ် ၵၢၼ်ၵႃႉၶၢႆၵိၼ်သူႇသမ်းယႃႈမဝ်းၵမ်ၵေႃႈလိူင်ႇၼမ်။ ယွၼ်ႉပၢင်တေႃႇလွင်းလႄႈယႃႈမဝ်းၵမ်ၼႆႉသေ ဢၼ်ပဵၼ်လုၵ်ႈၶႃႈႁႅမ်ပေႃႈမႄႈၼႆႉ လိူင်ႇၼမ်မႃးၵူႈမိုဝ်ႉၵူႈဝၼ်း။ တီႈဝဵင်းပၢင်လူင်ၵေႃႈပီၵၢႆၼႆႉ လုၵ်ႈၸၢႆးမဝ်းယႃႈၶႃႈႁႅမ်ပေႃႈမႄႈတၢႆသေ ၾင်ဝႆႉၼႂ်းဝၢင်းႁိူၼ်း၊ ၽိူဝ်ႇဢၢႆတူႇၼဝ်ႈ ဢွၵ်ႇမႃး ၵူၼ်းႁိမ်းႁိူၼ်းၸင်ႇႁူႉၵေႃႉမီး။