ရူတ်ႉၶိူင်ႈၽႃႇၵၼ် 2 လမ်း တီႈၸႄႈဝဵင်းသႅၼ်ဝီ မီးၵူၼ်းမၢတ်ႇၸဵပ်းႁၢဝ်ႈႁႅင်း 4 ၵေႃႉ။
မိူဝ်ႈဝႃး ဝၼ်းတီႈ 12/6/2023 ယၢမ်းႁူဝ်ၶမ်ႈ 5 မူင်းပၢႆၼၼ်ႉ ရူတ်ႉၶိူင်ႈ 2 လမ်း ၽႃႇၵၼ်တီႈၾၢႆႇၼႃႈ တပ်ႉမၢႆ 240 ၼႂ်းဢိူင်ႇပၢင်ၸူင် ၸႄႈဝဵင်းသႅၼ်ဝီ ၵူၼ်း 4 ၵေႃႉ မၢတ်ႇၸဵပ်းႁၢဝ်ႈႁႅင်း ၼႆယဝ်ႉ။
ၸုမ်းၸွႆႈတူင်ႇဝူင်းၵူၼ်းသႅၼ်ဝီလၢတ်ႈတီႈၽူႈတွႆႇႁွၵ်ႈဝႃႈ – “ ၸႂ်ႈဢေႃႈ ၶဝ်ၽႃႇၵၼ်တီႈႁိမ်းတပ်ႉ မၢႆ 240 ၼၼ်ႉၼႃႇ။ တူဝ်ၶႃႈတႄႉဢမ်ႇလႆႈၵႂႃႇၸွႆႈၸွမ်း။ၸုမ်းႁဝ်းၶဝ် ၵႂႃႇႁပ်ႉသူင်ႇပၼ်ႁူင်းယႃဢေႃႈ ။ မၢတ်ႇၸဵပ်းႁၢဝ်ႈႁႅင်းယူႇဢေႃႈ။ ဢမ်ႇထိုင်တီႈတၢႆၼင်ႇၵဝ်ႇ ” – ဝႃႈၼႆ။
ၵူၼ်းဢၼ်ပဵၼ်ၽေးၵိုင်ႉၵၢင်ႉသေ မၢတ်ႇၸဵပ်းၼႆႉ ပဵၼ်ၼၢင်းယိင်း 1 ၵေႃႉ ၵူၼ်းၸၢႆး 3 ၵေႃႉ ပဵၼ်ၵူၼ်းသႅၼ်ဝီတင်းမူတ်း ၼႆယဝ်ႉ။
ၵူၼ်းၼႂ်းပိုၼ်ႉတီႈၸႄႈဝဵင်းသႅၼ်ဝီၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “ တီႈၼႆၼႆႉ ဢမ်ႇၵႆႉၽႃႇၵၼ်ၼင်ႇၵဝ်ႇ ၶဝ်တေႁေႃႈၽႂ်းၵၼ်လႄႈ ၽႃႇၵူၺ်းၶႃႈၵႂႃႈ။ ၾၢႆႇၸုမ်းၸွႆႈတူင်ႇဝူင်းၵူၼ်းၶဝ် ၸွႆႈသူင်ႇယူတ်းယႃဝႆႉ တီႈႁူင်းယႃလူင်သႅၼ်ဝီယဝ်ႉၼင်ႇၵဝ်ႇ” – ဝႃႈၼႆ
မိူဝ်ႈဝႃးဝၼ်းတီႈ 12/6/2023 ၼႆႉၵူၺ်းၼင်ႇၵဝ်ႇ ၵႃးတၢင်ႇၵူၼ်းလမ်းၼိုင်ႈ ပဵၼ်ၽေးၵိုင်ႉၵၢင်ႉ သဵၼ်တူၵ်းတၢင်း ၽႃႇၺႃးၾင်ႇႁိုၵ်း တီႈလွႆသပႄႇသျႄႇ ၼိူဝ်သဵၼ်ႈတၢင်းလူင် ၵဵင်းတုင် – တူၼ်ႈတီး မီးၵူၼ်းမၢတ်ႇၸဵပ်းႁၢဝ်ႈႁႅင်း 19 ၵေႃႉ။
မိူဝ်ႈဝၼ်းတီႈ 8/6/2023 ၼၼ်ႉၵေႃႈ ရူတ်ႉသၢမ်လေႃႉ ဢူဝ်းဝူၺ်ႇ(အိုးဝေ)လမ်းၼိုင်ႈ တၢင်ႇထဝ်ႈယိင်း ၵေႃႉၼိုင်ႈသေလုၵ်ႉဢွင်ႇပၢၼ်းဢၢၼ်းၶိုၼ်ႈမိူဝ်းတူၼ်ႈတီး ပဵၼ်ၽေးၵိုင်ႉၵၢင်ႉ သေ ထဝ်ႈယိင်းဢၼ်ၶီႇမႃးၸွမ်း တၢင်းလင်ၼၼ်ႉ တၢႆထင်တီႈ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ