မိူဝ်ႈၼႆႉ ဝၼ်းတီႈ 10/6/2023 ယၢမ်းၵၢင်ၼႂ် ၸုမ်းယိပ်းၵွင်ႈၵၢင်ႇ ၸၢဝ်းၶိူဝ်း ဢႅဝ်ႇပၼ်လိၵ်ႈ ၵဵပ်းၶွၼ်ႇ ၵူၼ်းမိူင်းၸိူဝ်း ၶၢတ်ႈ ႁိူၼ်းယူႇ ၼႂ်းပွၵ်ႉၵွင်းမူးတူင်ႈတင်း ပွၵ်ႉၸၢၼ်း ၼႂ်းဝဵင်းမူႇၸေႊ ၸိုင်ႈတႆးပွတ်းႁွင်ႇ လႅၼ်လိၼ်တႆး – ၶႄႇ 1 ႁိူၼ်းလႂ် တေလႆႈသႂ်ႇ 2 သႅၼ်ပျႃး။
ၵူၼ်းပိုၼ်ႉတီႈ မူႇၸေႊ လၢတ်ႈတီႈၽူႈတွႆႇႁွၵ်ႈဝႃႈ – “ပဵၼ်သိုၵ်းလွႆၶဝ်မႃး ပၼ်လိၵ်ႈတႃႇၵဵပ်းၶွၼ်ႇ ၸိူဝ်းၵူၼ်းမႃးၶၢတ်ႈယူႇ ႁိူၼ်းယေးႁွင်ႈသဝ်း ၸိူဝ်းၼႆႉ။ 1 လင် ဢမ်ႇၼၼ် 1 ႁွင်ႈ ၸိူဝ်းၼႆႉ တေလႆႈပၼ်ၶဝ် 2 သႅၼ်ပျႃး။ ၵူၼ်း ၶၢတ်ႈယူႇ လႄႈတင်း ၸဝ်ႈႁိူၼ်း ဢွၼ်ၵၼ်ထူပ်းတၢင်းယၢပ်ႇဢေႃႈ ။ ယွၼ်ႉဝႃႈ ယၢမ်းလဵဝ် ၵၢၼ်ၵႃႉၶၢႆ ဢမ်ႇပဵၼ် ႁႃၵိၼ်ယၢပ်ႇ ၶဝ်သမ်ႉ မႃးၵဵပ်းၸိူင်ႉၼႆထႅင်ႈ ယိုင်ႈၶႅၼ်း ႁဵတ်းႁႂ်ႈႁဝ်း ယၢပ်ႇထႅင်ႈၶႃႈယဝ်ႉ”- ဝႃႈၼႆ။
ၼွၵ်ႈလိူဝ် ၸိူဝ်းႁဵတ်းႁိူၼ်းမႂ်ႇသမ်ႉ တေလႆႈပၼ်ငိုၼ်းထႅင်ႈ ပေႃးပဵၼ်ႁိူၼ်းၸၼ်ႉလဵဝ် တေလႆႈပၼ် 5 သႅၼ်ပျႃး ပေႃးပဵၼ် သွင်ၸၼ်ႉသမ်ႉ 10 သႅၼ်ပျႃး ဝႃႈၼႆ။
ၼႂ်းၸႄႈဝဵင်းမူႇၸေႊၼႆႉၸုမ်းယိပ်းၵွင်ႈၵၢင်ႇၵေႃႈၼမ်၊ မိူဝ်ႈၵူႈပွၵ်ႈပူၼ်ႉမႃး လွင်ႈၵဵပ်းၶွၼ်ႇ ၵဵပ်းၵူၼ်း ၼႆႉ ဢမ်ႇမီးၶိူဝ်းယႂ်းၸိူင်ႉၼႆ။ ၸုမ်းယိပ်းၵွင်ႈၵေႃႈ ဢမ်ႇၵဵပ်းၶွၼ်ႇတေႃႇၼႃႈတေႃႇတႃ ၵၢင်ၵူၼ်း ၵၢင်ဝဵင်း။ ယၢမ်းလဵဝ်ဝၢႆးလင်သိုၵ်းမၢၼ်ႈယိုတ်းမိူင်း၊ ဝၢႆးလင် ၵၢၼ်သိုၵ်းၵၢၼ်မိူင်းယုင်ႈၼႆႉ ၸုမ်းလႂ်ၵေႃႈဢမ်ႇႁၼ်ထိုင်ၵၢင်ၸႂ်ၵူၼ်းမိူင်း ၵဵပ်းၶွၼ်ႇၵဵပ်းငိုၼ်းယႂ်းမႃး။ ႁၢၼ်ႉၶၢႆၽၵ်းယိူဝ်ႈၼၢင်းၶဵဝ်ၵူၺ်းၵေႃႈဢမ်ႇဝႆႉ ၵဵပ်းမူတ်း။
ပီၵၢႆပူၼ်ႉမႃး သိုၵ်း TNLA ၼႆႉၶဝ်ႈၵဵပ်းၶွၼ်ႇထိုင်ၼႂ်းၵၢတ်ႇ ဝဵင်းၼမ်ႉၶမ်း။ ထိုင်တီႈၵူၼ်းမိူင်းၼမ်ႉၶမ်း ၼႄၵၢင်ၸႂ်သၢၼ်ၶတ်း လူၺ်ႈလၢႆးဢမ်ႇၵႂႃႇပိုတ်ႇၶၢႆၶူဝ်းၼႂ်းၵၢတ်ႇ ၵေႃႈယၢမ်ႈမီး။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ