ပေႃႈထဝ်ႈၺူဝ်ႇ ၽူႈႁၢပ်ႇၵၢၼ်လုၵ်ႉၾိုၼ်ႉၵဝ်ႇ ၼႂ်းတပ်ႉသိုၵ်းၸိုင်ႈတႆး SSA ဢၼ်ၸဝ်ႈမႄႈၼၢင်းႁိူၼ်းၶမ်း ဢွၼ်ႁူဝ်ၼၼ်ႉ လူႉသဵင်ႈၵႂႃႇ တီႈႁိူၼ်းမၼ်းၸဝ်ႈ ၽွင်းဢႃယု 86 ပီ လူၺ်ႈတၢင်းပဵၼ်ၵူၼ်းထဝ်ႈ။
မိူဝ်ႈဝႃး ဝၼ်းတီႈ 9/6/2023 ယၢမ်းဝၢႆးဝၼ်း 3 မူင်းတဵမ် ပေႃႈထဝ်ႈၺူဝ်ႇ ဢႃယု 86 ပီ လႆႈလူႉသဵင်ႈၵႂႃႇ တီႈႁိူၼ်းမၼ်းၸဝ်ႈ မူႇဝၢၼ်ႈမွၼ်း ဢိူင်ႇသၼ်ၵၢင် ၸႄႈဝဵင်းသၼ်ၵမ်းၽႅင်း ၸႄႈတွၼ်ႈၵဵင်းမႂ်ႇ ၸိုင်ႈထႆး ယၢမ်းလဵဝ် လႆႈဢဝ်ၶၢပ်ႈတူဝ်မႃးလုမ်း လႃးဝႆႉ တီႈဝတ်ႉသီမရၢမ်း (วัดสีมาราม) ၼႆယဝ်ႉ။
မႄႈထဝ်ႈဢွင်ႇ ၵေႃႉပဵၼ်မေးၼၢင်း ပေႃႈထဝ်ႈၺူဝ်ႇ လၢတ်ႈတီႈၽူႈတွႆႇႁွၵ်ႈဝႃႈ – “မိူဝ်ႈဝႃး ယၢမ်းၵၢင်ဝၼ်းတဵင်ႈ တိုၵ်ႉၵိၼ် ၼမ်ႉၵိၼ်ၼူမ်းယူႇ။ မႄႈထဝ်ႈ ယင်းဢုပ်ႇၼႄပေႃႈထဝ်ႈဝႃႈ ၸဝ်ႈၶူးဝႃးဝုၼ်းၸုမ်ႉ တေမႃးတီႈသၼၢမ်ၵီးလႃး ႁဝ်းဢွၼ်ၵၼ် ၵႂႃႇၼေႃႈ။ ဝၢႆးဢုပ်ႇၼႄယဝ်ႉ ယၢမ်းဝၢႆးဝၼ်း မႄႈထဝ်ႈဢွၼ်ပေႃႈထဝ်ႈ ဝႆႈၽြႃး တၼ်းလႆႈလွတ်ႈၸိင်ႇတႃႇမၼိ ယင်းပႆႇယဝ်ႉ ပေႃႈထဝ်ႈ ထူၺ်ႈၸႂ်ႁႅင်းသၢမ်သီႇၵမ်း၊ ဢႃႈပၢၵ်ႇ သွင်သၢမ်ၵမ်းသေၵေႃႈ ဢဝ်လူႉသဵင်ႈၵႂႃႇၸိူင်ႉၼၼ်ၶႃႈယဝ်ႉ။ ပေႃႈထဝ်ႈၼႆႉ ဢမ်ႇလုၵ်ႈလႆႈ ၸမ် 3 ပီယဝ်ႉ။ ဢမ်ႇမီးတၢင်းပဵၼ် ၶႆႈၼၢဝ်သင်မႃးသေပွၵ်ႈ ဢၼ်ပေႃႈထဝ်ႈလႆႈၼွၼ်းၵူႇ မႃးၼႆႉ ယွၼ်ႉပဵၼ်ၵူၼ်းထဝ်ႈ ဢမ်ႇမီးႁႅင်းသေ လုၵ်ႉပႆလုၵ်ႉၼင်ႈ မိူၼ်ၵွၵ်းၾႆးယဝ်ႉ ၼမ်ႉမၼ်းဢေႇလူင်းၵႂႃႇၵမ်းဢိတ်းဢိတ်း ၸိူင်ႉၼၼ်သေ ဢဝ်ၾႆးမွတ်ႇၵႂႃႇၸိူင်ႉၼၼ်ၵူၺ်း”- ဝႃႈၼႆ။
ယၢမ်းလဵဝ် ၶၢပ်ႈတူဝ် ပေႃႈထဝ်ႈၺူဝ်ႇၼႆႉ လႆႈဢဝ်မႃးလုမ်းလႃးဝႆႉတီႈဝတ်ႉသီမႃးရၢမ်း ဢိူင်ႇသၼ်ၵၢင် ဝဵင်းသၼ်ၵမ်းၽႅင်း ၸႄႈတွၼ်ႈၵဵင်းမႂ်ႇ ၸိုင်ႈထႆး တေပူၼ်ႉၶၢပ်ႈတူဝ် ၼႂ်းဝၼ်းတီႈ 13/6/2023 (ဝၼ်းဢင်းၵၢၼ်း) ၼႆႉ ဝႃႈၼႆ။
ပေႃႈထဝ်ႈၺူဝ်ႇၼႆႉ ပဵၼ်ၽူႈႁၢပ်ႇၵၢၼ်လုၵ်ႉၾိုၼ်ႉမႃး ၸွမ်းၼႂ်းတပ်ႉသိုၵ်းၵဝ်ႈၵၢင်ႉ ဢၼ်ၸဝ်ႈလႅတ်ႇ (ၸဝ်ႈၾႃႉ ၵဝ်းၵၢင်ႉ) ဢွၼ်ႁူဝ်ၼၼ်ႉ။ ထိုင်မႃး ပီ 1964 တပ်ႉသိုၵ်းလွတ်ႈလႅဝ်းသဝ်းၶေႃ ၸိုင်ႈတႆး SSIA ၊ တပ်ႉၽွမ်ႉႁူမ်ႈၸိူဝ်ႉၸၢတ်ႈၸိုင်ႈတႆး SNUF လႄႈ တပ်ႉၸဝ်ႈၾႃႉ ၵဝ်ႈၵၢင်ႉ ၸိူဝ်းၼႆႉ ႁူမ်ႈၵၼ် ပူၵ်းတင်ႈပဵၼ်မႃး တပ်ႉသိုၵ်းၸိုင်ႈတႆး SSA မိူဝ်ႈပီ 1964 လိူၼ် ဢေႊပရိူဝ်ႊ ဝၼ်းတီႈ 24 ၼၼ်ႉ။
ပေႃႈထဝ်ႈၺူဝ်ႇၼႆႉ ပဵၼ်ၵူၼ်းၸႃတိ ဝဵင်းၵုၼ်လူင် ၸႄႈတွၼ်ႈလႃႈသဵဝ်ႈ ၸိုင်ႈတႆးပွတ်းႁွင်ႇ ပဵၼ်လုၵ်ႈၸၢႆး ပူႇလွႆၸရေး လၢႆးၸိုၼ်ႈလႄႈ မႄႈသမ်ႉ ၼၢႆးၸရေးလၢႆးၸိုၼ်ႈ။ ပေႃႈထဝ်ႈၺူဝ်ႇၼႆႉ တႄႇၼႃႈႁိူၼ်းၵိုၵ်းတင်း မႄႈထဝ်ႈဢွင်ႇ မီးလုၵ်ႈႁူမ်ႈ ၵၼ် 2 ၵေႃႉ။ ၶၢႆႉမႃးယူႇသဝ်း ၼႂ်းဝဵင်းသၼ်ၵမ်းၽႅင်း ၸႄႈတွၼ်ႈၵဵင်းမႂ်ႇ ၸိုင်ႈထႆးၼၼ်ႉ မီးၶၢဝ်းတၢင်းၸမ် 40 ပီယဝ်ႉ။
