သဵင်ၵွင်ႈတႅၵ်ႇၼႂ်းဝဵင်းၼမ်ႉလၼ်ႈ ၵူၼ်းမိူင်းတူၵ်းၸႂ် ပေႃးလႆႈပိၵ်ႉႁူင်းႁဵၼ်း၊ ၵၢတ်ႇလႄႈ ႁိူၼ်းယေး မိူင်းပေႃးယဵၼ်။

ဝၼ်းတီႈ 7/6/2023 ယၢမ်းၵၢင်ဝၼ်းမွၵ်ႈ 12 မူင်း သဵင်ၵွင်ႈတႅၵ်ႇ တၢင်းဝၢၼ်ႈၵွင်းလၢင်း၊ ဝၢၼ်ႈၼမ်ႉလုၵ်း၊ ဝၢၼ်ႈၵုင်းၺွင်ႇ၊ ပွၵ်ႉပၢင်သိမ်ႇလႄႈ ပွၵ်ႉၵတ်းယဵၼ် ၼႂ်းဝဵင်းၼမ်ႉလၼ်ႈ ၸႄႈဝဵင်းသီႇပေႃႉ ၸႄႈတွၼ်ႈၵျွၵ်ႉမႄး ၸိုင်ႈတႆးပွတ်းႁွင်ႇ။

ၵူၼ်းဝဵင်းၼမ်ႉလၼ်ႈ လၢတ်ႈတီႈၽူႈတွႆႇႁွၵ်ႈဝႃႈ – “လွင်ႈတင်းမၼ်း ပဵၼ်ၼႆ ။ ၵူႈပွၵ်ႈ သိုၵ်းၶူဝ်းၶဵဝ်ၼႆႉ တေမႃးၵဵပ်း သိုၵ်း ယၢမ်းၵၢင်ၶမ်ႈၵၢင်ၶိုၼ်း။ မိူဝ်ႈဝႃးသမ်ႉ ၶဝ်ၶဝ်ႈမႃးၵဵပ်းသိုၵ်း ယၢမ်းၵၢင်ဝၼ်း။ ၽွင်းၼၼ်ႉသမ်ႉ သဵင်ၵွင်ႈတႅၵ်ႇ။ ၵူၼ်းမိူင်းတႄႉထၢင်ႇဝႃႈၶဝ်ယိုဝ်းၵွင်ႈလွၵ်ႇၵူၼ်းၸိူဝ်းဢမ်ႇၶႂ်ႈႁဵတ်းသိုၵ်းသေလႅၼ်ႈပၢႆႈၶဝ်- ၼႆၵႂႃႈ။ ဝၢႆးဝၼ်းမႃးၸင်ႇႁူႉဝႃႈ သိုၵ်းမၢၼ်ႈ ယိုဝ်း။ လႅပ်ႈတေယိုဝ်းလွၵ်ႇ SSPP ။ သိုၵ်းမၢၼ်ႈၶႂ်ႈဝႃႈ SSPP ၶၢမ်ႈၼႃႈၵၢႆတႃၶဝ် ဢမ်ႇသၢင်းၵိၼ်ၶဝ်ႁေ ၶဝ်ႈထိုင်ၼႂ်းဝဵင်းၼႆၼၼ်ႉၶႃႈၼႃႇ။ ပေႃးသဵင်ၵွင်ႈတႅၵ်ႇ ၵူၼ်းမိူင်းၵေႃႈတူၵ်းၸႂ်၊ ပိၵ်ႉႁူင်းႁဵၼ်း၊ ပိၵ်ႉၵၢတ်ႇ ၊ ပိၵ်ႉၽၵ်းတူႁိူၼ်းယေး မိူင်းပေႃးယဵၼ်သႅပ်ႉဢေႃႈ ”- ဝႃႈၼႆ။

ၵူၼ်းမိူင်းတူၵ်းၸႂ်ၸဵမ်မိူဝ်ႈဝႃး တေႃႇထိုင်ဝၼ်းမိူင်ႈၼႆႉ ၵူၼ်းၼမ်ႉလၼ်ႈဢမ်ႇႁတ်းဢွၵ်ႇႁိူၼ်း ။ ယၢမ်းဝၢႆးဝၼ်းၼႆႉ ၵူၼ်းမိူင်းၸင်ႇႁတ်းဢွၵ်ႇႁိူၼ်းၵႂႃႇမႃးဢိတ်းဢွတ်း ၊ ၵူၺ်းၵႃႈဢမ်ႇၵိုၼ်းၶွၼ်ႈမိူၼ်ၵူႈပွၵ်ႈ ဝႃႈၼႆ။

ၵူၼ်းဝဵင်းၼမ်ႉလၼ်ႈ ဢႃယု 50 ပၢႆ ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “ၼႂ်းႁူဝ်လိူၼ်ၼႆႉ သိုၵ်းၶူဝ်းၶဵဝ်ၼႆႉ ၶဝ်ၶဝ်ႈမႃးၵဵပ်းသိုၵ်း တီႈပွၵ်ႉၸၢၼ်း ၊ ယၢမ်ႈမီးလွင်ႈ ယိုဝ်းၵွင်ႈၶိုၼ်ႈၾႃႉ ႁဵတ်းႁႂ်ႈၵူၼ်းမိူင်းတူၵ်းၸႂ်မႃးယဝ်ႉပွၵ်ႈၼိုင်ႈ။ ၽွင်းၼၼ်ႉ ၶဝ်တီႉဢဝ်ၵႂႃႇ ၵူၼ်းၼုမ်ႇ 3-4 ၵေႃႉ။ ” – ဝႃႈၼႆ။

လွင်ႈၼႆႉ ပဵၼ်ၵႂႃႇဝၼ်းလႂ် တီႉၵူၼ်းဝၢၼ်ႈလႂ်လၢႆလၢႆ လႆႈလၢႆၵေႃႉယဝ်ႉ SSPP တေသိုပ်ႇႁဵတ်းႁိုဝ်ၵႂႃႇထႅင်ႈဢၼ်ဝႃႈၼၼ်ႉ ယူႇတီႈၽူႈတွႆႇႁွၵ်ႈ ၵပ်းသိုပ်ႇၸူး ၽူႈၶၢၼ်ပၢၵ်ႇ SSPP လၢႆၵမ်းယူႇၵေႃႈ ဢမ်ႇႁပ်ႉၾူၼ်းလႄႈ ဢမ်ႇၸၢင်ႈလႆႈႁူႉလွင်ႈႁူဝ်ယွႆႈတႅတ်ႈတေႃး။

ၼႂ်းဝဵင်းၼမ်ႉလၼ်ႈၼႆႉ တင်းမူတ်းမီး 11 ပွၵ်ႉ 5 ဝၢၼ်ႈ ၵမ်ႈၼမ် ၵူၼ်းမိူင်း တေႁဵတ်းၵိၼ်ၵၢၼ်ႁႃလဵင်ႉတွင်ႉ သူၼ်ႁႆႈ ၼႃး။ လိူဝ်ၼၼ်ႉ မီးတပ်ႉသိုၵ်းမၢၼ်ႈ ၶလယ 243 ၊ ၶမယ 505 တင်း ၶမယ 506 ၸိူဝ်းၼႆႉ ပၵ်းယူႇဝႆႉ။ ယဝ်ႉၵေႃႈ မီးသိုၵ်းတႆး SSPP ၵေႃႈ တူင်ႉၼိုင်ယူႇဝႆႉ။

သိုပ်ႇလၢတ်ႈဝႃႈ – “လွင်ႈၵၢၼ်လုၵ်ႉၽိုၼ်ႉတႆး ယၢမ်းလဵဝ်ၼႆႉ ဢမ်ႇႁူႉဝႃႈ မၼ်းပဵၼ်ၵၢၼ်လုၵ်ႉၽိုၼ်ႉၵႂႃႇတၢင်းလႂ်တႄႉတႄႉ။ ၵူၼ်းၼုမ်ႇၵူၼ်းမိူင်း ၸိူဝ်းၼႆႉ ပိူၼ်ႈဢွၼ်ၵၼ်ဢိမ်ႇမိူဝ်ႇၵၼ်ယဝ်ႉ။ ယွၼ်ႉပိူဝ်ႈဝႃႈ ၵဵပ်းၵႂႃႇယဝ်ႉ လႆႈယိုဝ်းၶိုၼ်းတႆးၼင်ႇၵၼ် ၵူၺ်းလႄႈ သင်ဝႃႈ ၶဝ်မီးယိူင်းဢၢၼ်း ယိုဝ်းၽူႈၶဵၼ် တိုၵ်းသိုၵ်းမၢၼ်ႈတႄႉၼႆၸိုင် ၵူၼ်းမိူင်းတႄႉ တေဢွၼ်ၵၼ် ၸူမ်းၶဝ်ႈ ႁဵတ်းသိုၵ်းယူႇ”- ဝႃႈၼႆ။

သိုၵ်းတႆး ၽိူဝ်ႇတေတဵၵ်းငႅၼ်းၵဵပ်းဢဝ်ၵူၼ်းသိုၵ်းမႂ်ႇၼၼ်ႉ တႃႉႁူၺ်းသူၼ်းႁႂ်ႈလႆႈႁူဝ်ၸႂ်ၵူၼ်းမိူင်းယိင်ႈၶႅၼ်းတေပဵၼ်ဢၼ်မၼ်ႈၵိုမ်းသေ ယူႇၵႂႃႇၸွမ်းၵၼ်လႆႈၶၢဝ်းယၢဝ်း၊ ဢမ်ႇထုၵ်ႇလီၸႂ်ႉလၢႆးႁုၵ်ႉႁၢႆႉ ယိုဝ်းၵွင်ႈလွၵ်ႇငိုတ်ႈ ႁဵတ်းႁႂ်ႈၵူၼ်းမိူင်းတူၵ်းၸႂ်- ၵူၼ်းမိူင်းၼမ်ႉလၼ်ႈတႄႉတူၵ်ႇလၢတ်ႈၼင်ႇၼႆ။

ယၢမ်းလဵဝ် ၵူၼ်းၼုမ်ႇ ၼႂ်းဝဵင်းၼမ်ႉလၼ်ႈၼႆႉ ဢွၼ်ၵၼ်ပၢႆႈၵႂႃႇႁဵတ်းၵၢၼ် တၢင်းမိူင်းထႆး၊ တၢင်းတႃႈၶီႈလဵၵ်း၊ မိူင်းလႃး၊ ပၢင်သၢင်း၊ လၢဝ်ႇၵၢႆး၊ မူႇၸေႊ၊ တၢင်းမိူင်းၶႄႇလႄႈ တၢင်းမျႃႉဝတီႇ ၸိူဝ်းၼႆႉ တင်းၼမ် ယွၼ်ႉၵူဝ်လႆႈႁဵတ်းသိုၵ်း ၵေႃႈပိူင်ၼိုင်ႈ၊ ၵၢၼ်ႁႃၵိၼ်လဵင်ႉတွင်ႉယၢပ်ႇၽိုတ်ႇၵေႃႈ ပိူင်ၼိုင်ႈ ဝၢႆးသိုၵ်းမၢၼ်ႈ ယိုတ်းမိူင်းမႃးၼႆႉ။