တႄႇဢဝ် ႁူဝ်လိူၼ်ၵျုၼ်ႊ 2023 ၼႆႉမႃး သိုၵ်း SSPP/SSA သင်ႇယွၼ်းၵူၼ်းသိုၵ်းမႂ်ႇ ၼႂ်းၸႄႈဝဵင်းမူႇၸေႊ သီႇပေႃႉ ႁၢဝ်ႈႁႅင်း ႁဵတ်းႁႂ်ႈၵူၼ်းမိူင်း ယၢပ်ႇၸႂ် ၽွင်းၶၢဝ်းႁႃၵိၼ်လဵင်ႉတွင်ႉယၢပ်ႇ။
ဝၼ်းတီႈ 5/6/2023 SSPP ၶဝ်ႈတီႉၵူၼ်းမိူင်းၼႂ်းဢိူင်ႇၼမ်ႉဢုၼ်ႇ ၸႄႈဝဵင်းမူႇၸေႊ ၵႂႃႇတင်းမူတ်း 11 ၵေႃႉ ။
ၵူၼ်းမိူင်းဝဵင်းမူႇၸေႊ လၢတ်ႈတီႈၽူႈတွႆႇႁွၵ်ႈဝႃႈ – “ တီႈဢိူင်ႇၼမ်ႉဢုၼ်ႇၼႆႉ ၶဝ်ဢဝ်ၵႂႃႇ 11 ၵေႃႉ ပွႆႇၶိုၼ်း 2 ၵေႃႉ ။ ယွၼ်ႉသင်လႄႈပွႆႇၶိုၼ်းတႄႉပႆႇႁူႉတႅတ်ႈတေႃး။ ၵူၼ်းဝၢၼ်ႈ ဢၼ်ၺႃးတီႉၵႂႃႇႁဵတ်းသိုၵ်းၼၼ်ႉ တေပဵၼ်ဝၢၼ်ႈၼမ်ႉဢုၼ်ႇတင်း မၢၼ်ႈႁွင်း 6 ၵေႃႉ။ ဝၢၼ်ႈၵွင်းဝဵင်း 3 ၵေႃႉ တင်းမူတ်း ႁူမ်ႈၵၼ် 9 ၵေႃႉ”- ဝႃႈၼႆ။
ဝၼ်းတီႈ 5-6 ၶၢဝ်းတၢင်း 2 ဝၼ်းမႃးၼႆႉ သိုၵ်း SSPP လူင်းႁူပ်ႉထူပ်းၵူၼ်းမိူင်း တီႈဝၢၼ်ႈတိုင်းလူင် ၸႄႈဝဵင်းမူႇ ၸေႊသေ သပ်းလႅင်းလၢတ်ႈၼႄၵူၼ်းမိူင်း လွင်ႈလႆႈၵဵပ်းသိုၵ်း၊ ယွၼ်းၵူၼ်းသိုၵ်းမႂ်ႇ 10 ႁိူၼ်း ၼႆႉတေလႆႈသူင်ႇပၼ် 2 ၵေႃႉ ဝႃႈၼႆ။
“ၶဝ်မႃး သပ်းလႅင်းလၢတ်ႈၵႂႃႇဝႃႈ ပေႃး 10 ႁိူၼ်း တေလႆႈသူင်ႇၵူၼ်း ပၼ်ၶဝ် 2 ၵေႃႉ။ ၶဝ်တေၾိုၵ်းပၼ်ၵၢၼ်သိုၵ်းတႃႇၶၢဝ်းတၢင်း 1 လိူၼ်။ ဝၢႆးၼၼ်ႉ တႃႇၵေႃႉ ၼိုင်ႈ တေလႆႈႁဵတ်းသိုၵ်းလွၼ်ႉ ။ တႃႇၵေႃႉၼိုင်ႈ တႄႉတေလႆႈႁဵတ်းသိုၵ်း ၵူၼ်းမိူင်း ။ ဢၼ်ၶဝ်သင်ႇယွၼ်းၵူၼ်းမႂ်ႇၼႆႉ ၼႂ်းၶၢဝ်းတၢင်း 5 ဝၼ်း ႁႂ်ႈၵႂႃႇပၼ်သဵၼ်ႈၸိုဝ်ႈ၊ သင်ဝႃႈ ဢမ်ႇၵႂႃႇပၼ်ၸိုင် တူဝ်ၶဝ်တေလူင်းမႃးၺွပ်းဢဝ်ၼႆၶႃႈဝႃႇ။ ၽွင်းၶဝ်မႃးသပ်းလႅင်းသေဢွၵ်ႇမိူဝ်းၼၼ်ႉ လၼ်ႇၵွင်ႈၶိုၼ်ႈ ၾႃႉထႅင်ႈ ပဵၼ်လၢႆၵမ်းၵွၼ်ႇဢေႃႈ”- ၵူၼ်းပိုၼ်ႉတီႈ ဝဵင်းမူႇၸေႊ သိုပ်ႇလၢတ်ႈၼႄၼင်ႇၼႆ။
လွင်ႈၸုမ်းယိပ်းၵွင်ႈၵဵပ်းသိုၵ်းမႂ်ႇၼႆႉ ဢမ်ႇၵွမ်ႉၵႃႈ ၼႂ်းၸႄႈဝဵင်းမူႇၸေႊၵူၺ်း တၢင်းၸႄႈဝဵင်းမိူင်းယႆ၊ တၢင်ႉယၢၼ်း၊ လႃႈသဵဝ်ႈ၊ သႅၼ်ဝီ၊ သီႇပေႃႉ၊ ၵျွၵ်ႉမႄး၊ ၼမ်ႉတူႈ၊ မိူင်းလူင်၊ မိူင်းမိတ်ႈ၊ ၼမ်ႉၶမ်း၊ ပၢင်ႇသၢႆးလႄႈ တၢင်းပွတ်းၸၢၼ်း ၸိူဝ်းၼႆႉၵေႃႈ ၸိူဝ်းပဵၼ်ၸုမ်းယိပ်းၵွင်ႈၵၢင်ႇ ဢၼ်ယူႇၼႂ်းပိုၼ်ႉတီႈ ၵဵပ်းၵူၼ်းဢမ်ႇၵႃး ၵဵပ်းငိုၼ်း ၵဵပ်းတၢင်းၵိၼ်ပႃးထႅင်ႈ။
တီႈဝဵင်းလႃႈသဵဝ်ႈၵေႃႈ သိုၵ်းTNLA ၶဝ်ႈၵဵပ်းသိုၵ်းထိုင်ၼႂ်းဝဵင်း။ တၢင်းႁူဝ်ပၢင်ႇ မိူင်းၵူဝ်း တႃႈမိူင်းငႅၼ်းသမ်ႉသိုၵ်းၵဝ်ႈၵၢင်ႉ MNDAA ၵဵပ်းၶွၼ်ႇၵဵပ်းသိုၵ်း၊ တၢင်းၸိုင်ႈတႆးပွတ်းၸၢၼ်းသမ်ႉ ၸုမ်းယိပ်းၵွင်ႈၵၢင်ႇ ပဢူဝ်းၵဵပ်းၵူၼ်းၵဵပ်းငိုၼ်းမိူၼ်ၵၼ်။
“ လွင်ႈၵဵပ်းၶွၼ်ႇၵေႃႈမီး၊ ပေႃးဢမ်ႇပၼ်ငိုၼ်းလႆႈတေဢဝ်ၵူၼ်းၼႆလႄႈ ၽႂ်ၵေႃႈ ၵူဝ်လႆႈႁဵတ်းသိုၵ်းသေ ဢွၼ်ၵၼ် ၵႂႃႇႁႃၵူႈႁိမ်ငိုၼ်းပိူၼ်ႈမႃးသႂ်ႇဢေႃႈ။ ပၢႆလိူဝ် ပၢႆးမၢၵ်ႈမီးတူၵ်း ႁႃငိုၼ်းယၢပ်ႇ”- ၵူၼ်းပိုၼ်ႉတီႈ ဝဵင်းသႅၼ်ဝီလၢတ်ႈ။
ၵူၼ်းမိူင်း ၼႂ်းဢိူင်ႇမိူင်းၸီး ၸႄႈဝဵင်းၵူတ်ႉၶၢႆၵေႃႈ ယၢပ်ႇၸႂ်ယွၼ်ႉၸုမ်းယိပ်းၵွင်ႈၵၢင်ႇ၊ ၵူၼ်းၼုမ်ႇ ဢွၼ်ၵၼ်ပၢႆႈၵႂႃႇ ႁဵတ်းၵၢၼ် တၢင်းမိူင်းထႆး၊ မိူင်းၶႄႇ ဢိၵ်ႇ ၸွမ်းလႅၼ်လိၼ် ၸိူဝ်းၼၼ်ႉၵေႃႈ မီးၼမ်။
တီႈဝဵင်းၼမ်ႉလၼ်ႈၵေႃႈတေႃႈၼင်ႇၼၼ် သိုၵ်း SSPP ၶဝ်ႈဢဝ်ၵူၼ်းပိုၼ်ႉတီႈတႃႇၾိုၵ်းၵၢၼ်သိုၵ်း။ ၵူၼ်းမိူင်းၶၢင်းပွင်ႉ ဢမ်ႇမီးလွင်ႈႁူမ်ႇလူမ်ႈ။ ဢမ်ႇႁတ်းယူႇၼႂ်းဝၢၼ်ႈ ပေႃးထိုင်ယၢမ်းႁူဝ်ၶမ်ႈ မိူင်းပေႃးယဵၼ်သီႇသီႇ။ ပူၼ်ႉမႃးသွင်သၢမ်ဝၼ်းၼႆႉၵေႃႈ ယင်းမႃးယိုဝ်းၵွင်ႈၼႂ်းဝၢၼ်ႈ ႁဵတ်းႁႂ်ႈၵူၼ်းမိူင်းတူၵ်းၸႂ်ဝႃႈၼႆ။
ၵဵဝ်ႇၵပ်းလွင်ႈၼႆႉ ၸုမ်းၶၢဝ်ႇၽူႈတွႆႇႁွၵ်ႈ ၵပ်းၾူၼ်းၸူး ၽူႈၶၢၼ်ပၢၵ်ႇ SSPP ၵေႃႈ ဢမ်ႇလႆႈလႄႈ ပႆႇလႆႈႁူႉလွင်ႈႁူဝ်ယွႆႈပိူင်ပဵၼ်။
ပူၼ်ႉမႃး မိူဝ်ႈႁၢင်လိူၼ်ဢွၵ်ႊထိူဝ်ႊပိူဝ်ႊ ပီ 2021 ၼၼ်ႉ ၸဝ်ႈႁၢၼ် ၽူင်းႁၢၼ် ၽူႈၶၢၼ်ပၢၵ်ႇ SSPP ယၢမ်ႈလၢတ်ႈတီႈၽူႈတွႆႇႁွၵ်ႈဝႃႈ – “ပေႃးၵုမ်ႇပၢႆႈယူႇတိၵ်းတိၵ်း၊ ပိူၼ်ႈတေမႃးယူႇတႅၼ်းတီႈယူႇႁဝ်းယဝ်ႉ။ တေႃႈလဵဝ် ႁဝ်းလူဝ်ႇ ၵူၼ်းၼုမ်ႇ ၸိူဝ်းမီး ပၢႆးဝူၼ်ႉလီ၊ ၸိူဝ်းမီးပၺ်ႇၺႃႇတၢင်းႁူႉ၊ ယုမ်ႇယမ်ၼိူဝ်တူဝ်ၸဝ်ႈၵဝ်ႇသေ ႁႂ်ႈမႃးၸွႆႈၶိုင်ပွင်ၸိုင် ၵၢၼ်လုၵ်ႉၽိုၼ်ႉႁဝ်း တေ ဢွင်ႇမၢၼ်ဢေႃႈ”- ဝႃႈၼႆ။
ၽွင်းယၢမ်းၼင်ႇၼႆ သိုၵ်း SSPP – RCSS သမ်ႉ ၶဵင်ႈၶႅင်ၵၢၼ်သိုၵ်းတေႃႇၵၼ် ၼႂ်းမိူင်းတႆး ပွတ်းႁွင်ႇ – ပွတ်းၸၢၼ်းမႃး ၶိူဝ်း ယႂ်း ။ ၵူၼ်းမိူင်းလႆႈပၢႆႈယၢၼ်ႁိူၼ်းယေးပိုၼ်ႉတီႈ။ ၸုမ်းလႂ်ၵေႃႈ ဢမ်ႇလိုပ်ႈတိုၵ်း ၸုမ်းသိုၵ်းမၢၼ်ႈ ယိုတ်းဢႃႇၼႃႇ တႄႉတႄႉဝႃႈဝႃႈလႄႈ ပေႃးၵဵဝ်ႇၵပ်းၵၢၼ်လုၵ်ႉ ၽိုၼ်ႉမႃး ၵူၼ်းမိူင်း ဢမ်ႇၶႂ်ႈတူၵ်ႇလၢတ်ႈသင်ၸွမ်း။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ