Friday, March 29, 2024

ၵႃးၽႃႇၵၼ်တီႈၵျွၵ်ႉမႄး မီးၵူၼ်းမၢတ်ႇၸဵပ်း 5 ၵေႃႉ

Must read

မိူဝ်ႈၼႆႉ ဝၼ်းတီႈ 6/6/2023 ယၢမ်းၵၢင်ဝၼ်း 11 မူင်းၶိုင်ႈၼၼ်ႉ ၵႃး 2 လမ်း ၽႃႇၵၼ် ၼိူဝ်သဵၼ်ႈတၢင်းလူင် ႁိမ်းဝၢၼ်ႈပၢင်မၢၵ်ႇၶေႃ ၸႄႈဝဵင်းၵျွၵ်ႉမႄး  မီးၵူၼ်းမၢတ်ႇၸဵပ်းႁၢဝ်ႈႁႅင်း 5 ၵေႃႉ ၼႂ်းၼၼ်ႉပႃးလုၵ်ႈဢွၼ်ႇၵေႃႉၼိုင်ႈ ၼႆယဝ်ႉ။

ၽူႈၶဝ်ႈၸုမ်းၸွႆႈတူင်ႇဝူင်းၵူၼ်းၵျွၵ်ႉမႄးၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “ ၸႂ်ႈဢေႃႈ ၵႃး သွင်လမ်းၽႃႇၵၼ် ဢေႃႈ ။ ၾူၼ်မႃးတၢင်းမိုၼ်ႈလႄႈ ၵႃးႁၢႆႊၸႅတ်ႉၼၼ်ႉ ဝႆးပူၼ်ႉသေ ဢမ်ႇၵုမ်းလႆႈ ပူၼ်ႉတၢင်းၵႂႃႇသေ ၽႃႇသႂ်ႇၵႃး ၾၢႆႇပုၼ်ႉတၢင်းၼၼ်ႉဢေႃႈ ။ ၵူၼ်းၼႂ်းၵႃး ႁၢႆႊၸႅတ်ႉၼၼ်ႉ မီးၵူၼ်းၼႂ်းမၼ်း 6 ၵေႃႉ။ ၼႂ်းၵႃး ၶရၢဝ်ႊ (crown) ၼၼ်ႉသမ်ႉ မီးဝႆႉ 4 ၵေႃႉဢေႃႈ ။ ၵူၼ်းၼိူဝ်ၵႃးႁၢႆႊၸႅတ်ႉၼၼ်ႉတႄႉ ၸဵပ်း ႁၢဝ်ႈႁႅင်းဝႆႉမွၵ်ႈ 5 ၵေႃႉၼႆႉဢေႃႈ ။ ၵူၼ်းႁေႃႈမၼ်းၼၼ်ႉ ၶႃလူင်ၾၢႆႇသၢႆႉမၼ်းႁၢၵ်းၼၼ်ႉၼႃႇ ။ ၶႃၾၢႆႇၶႃၵေႃႈႁၢၵ်းယဝ်ႉ ။ မုၼ်ႈၸဝ်ႈဢၼ်ၶီႇမႃး ၸွမ်းႁိမ်းၵူၼ်းႁေႃႈၵႃးၼၼ်ႉတႄႉ လုပ်ႇငွၵ်းသွၵ်ႇမၼ်းႁၢၵ်းၼၼ်ႉၼႃႇ။ ၵူၼ်းဢၼ်ၼင်ႈတၢင်းလင် ၼၼ်ႉ တႃႇ ၵေႃႉၼိုင်ႈ ၼႃႈၽၢၵ်ႇမၼ်းတႅၵ်ႇ ပဵၼ်ႁွႆးလူင်ဝႆႉ ပေႃးမုင်ႈႁၼ်တၢင်းၼႂ်းမၼ်းယူႇယဝ်ႉ ။ လုၵ်ႈဢွၼ်ႇတႄႉၵေႃႈ ဢၼ်ႁၢၵ်းတႄႉ ဢမ်ႇမီးၼင်ႇၵဝ်ႇ ၼိူဝ်ႉၼင်လွၵ်ႇလၢၼ်ႉၸိူဝ်းၼႆႉတႄႉမီးယူႇ။ ၵူၼ်းၼိူဝ်ၵႃး crown တႄႉ ဢမ်ႇမီးၽႂ်ၸဵပ်းၼမ် ” – ဝႃႈၼႆ။

- Subscription -

ၽေးၵိုင်ႉၵၢင်ႉၵမ်းၼႆႉ မီးၵူၼ်းမၢတ်ႇၸဵပ်း 5 ၵေႃႉ ၼႂ်းၼၼ်ႉ ပႃးလုၵ်ႈဢွၼ်ႇ ဢႃယု 5 ၶူပ်ႇၵေႃႉၼိုင်ႈသေ မိူဝ်ႈလဵဝ်ၾၢႆႇၸုမ်းၸွႆႈတူင်ႇဝူင်းၵူၼ်း (ကမ်းလင့်လက်များ လူမှုကူညီရေး) ၸွႆႈဢဝ်တူဝ် သူင်ႇယူတ်းယႃတူဝ်ဝႆႉတီႈ ႁူင်းယႃလူင်ၵျွၵ်ႉမႄး။

ၽူႈၶဝ်ႈၸုမ်းၸွႆႈတူင်ႇဝူင်းၵူၼ်းၵျွၵ်ႉမႄးၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “ ၼႂ်းၼၼ်ႉ ဢၼ်ၸဵပ်းၼမ်သေ ပိူၼ်ႈ 2 ၵေႃႉ လႆႈသူင်ႇယူတ်းယႃ တီႈမၼ်းတလေးဢေႃႈ ။ မိူဝ်ႈလဵဝ်သမ်ႉ ၾူၼ်တူၵ်းတၢင်းမိုၼ်ႈႁေၼႆ ၵႆႉမီးၽေးၵိုင်ႉၵၢင်ႉရူတ်ႉၵႃးၽႃႇၵၼ်ၼႃႇ ပေႃးပဵၼ်လႆႈတႄႉ ႁႂ်ႈႁေႃႈလွႆးလွႆးဢေႃႈ ။ တေဢမ်ႇလႆႈ မီးလွင်ႈတုမ်ႉတိူဝ်ႉ ၵၼ်ငၢႆႈငၢႆႈ ” ဝႃႈၼႆ။

မိူဝ်ႈဝၼ်းတီႈ 26/5/2023 ၼၼ်ႉၵေႃႈ ၵႃးတင်းရူတ်ႉၶိူင်ႈၽႃႇၵၼ် တုမ်ႉတိူဝ်ႉႁၢဝ်ႈႁႅင်း ႁိမ်းဝတ်ႉဝၢၼ်ႈၼမ်ႉႁူး ဢိူင်ႇၶူဝ်မုင်း ၸႄႈဝဵင်းၵျွၵ်ႉမႄး ၼုမ်ႇၸၢႆး 2 ၵေႃႉ လူႉတၢႆထင်တီႈ။

ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ

- Subscription -
- SHAN's Apps -spot_img

ၶၢဝ်ႇလိုၼ်းသုတ်း