ၵူၼ်းၼမ်ႉၶမ်း 4 ၵေႃႉ ၵႂႃႇလႄႇႁႃသိုဝ်ႉလဵၵ်းၵဝ်ႇ/ယွၵ်း တၢင်းဝဵင်းလၢဝ်ႇၵၢႆးသေႁၢႆၵႂႃႇလႆႈ 10 ဝၼ်းပၢႆယဝ်ႉ တေႃႇထိုင် မိူဝ်ႈၼႆႉၵပ်းသိုပ်ႇႁႃဢမ်ႇလႆႈ ။
တႄႇဢဝ် ဝၼ်းတီႈ 21/5/2023 ၼၼ်ႉမႃး ၵူၼ်းၼမ်ႉၶမ်း 4 ၵေႃႉ ၵႂႃႇႁႃသိုဝ်ႉ လဵၵ်းၵဝ်ႇ တီႈဢိူင်ႇ ၵုင်းၸၢင်ႉ (ကုန်းကြမ်း) ဢၼ်မီးၾၢႆႇႁွင်ႇဝၼ်းတူၵ်းဝဵင်းလၢဝ်ႇၵၢႆး ၸိုင်ႈတႆးပွတ်းႁွင်ႇၼၼ်ႉသေ ႁိုင်ၶၢဝ်းတၢင်း 10 ဝၼ်းပၢႆယဝ်ႉ ပေႃႈမႄႈပီႈၼွင်ႉ ၵပ်းသိုပ်ႇႁႃ ဢမ်ႇလႆႈၼႆယဝ်ႉ။
ပီႈၼွင်ႉႁူမ်ႈႁိူၼ်းၵူၼ်းဢၼ်ႁၢႆၵႂႃႇၼႆႉၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈ ဝႃႈ – “ ၸႂ်ႈယဝ်ႉ ၶဝ်ၵႂႃႇႁႃသိုဝ်ႉ လဵၵ်းယွၵ်း မိူၼ်ၸိူင်ႉၼင်ႇ ရူတ်ႉၶိူင်ႈၵဝ်ႇ လဵၵ်းဢၼ်ၵဝ်ႇဢၼ်မွၼ်ၸိူဝ်းၼႆႉ။ မိူဝ်ႈဝၼ်းထိ 19 ပူၼ်ႉမႃး ၼႆႉဢေႃႈ ၶဝ်ဢွၵ်ႇၼႆႈ ၵႂႃႇ။ ၵူႈပွၵ်ႈၵေႃႈ ၶဝ်ၵႂႃႇယူႇၼင်ႇၵဝ်ႇ။ မီးမွၵ်ႈ 4-5 ပွၵ်ႈၼႆႉယဝ်ႉၼင်ႇၵဝ်ႇဢေႃႈ ။ၶဝ်ၶီႇၵႃးၵႂႃႇ 2 လမ်းဢေႃႈ။ ၵူၺ်းၵႃႈ မိူဝ်ႈလဵဝ်သမ်ႉ ၵႂႃႇလႆႈမွၵ်ႈ ၼိုင်ႈဝၼ်းၼႆႉသေ ၵပ်းသိုပ်ႇႁႃဢမ်ႇလႆႈ ၸဵမ်မိူဝ်ႈ ဝၼ်းထိ 21 ပူၼ်ႉမႃးၼႆႉယဝ်ႉဢေႃႈ ပူၼ်ႉမႃး ၶၢဝ်းတၢင်း 10 ဝၼ်းပၢႆယဝ်ႉၼေႃႈ ဢမ်ႇလႆႈလွင်ႈၵပ်းသိုပ်းၵၼ် ” – ဝႃႈၼႆ။
ၵူၼ်းဢၼ်ႁၢႆတူဝ်ၵႂႃႇၼႆႉ 1. ၼၢင်းၶမ်းလိုၼ်း ဢႃယု 45 2. ၸၢႆးဢၢႆႈၵွၼ်ႉ(ႁိုဝ်) ၸၢႆးတၢၼ်းၵျေႃႇ ဢႃယု 41 3. ၸၢႆးတၢၼ်းထုၼ်း ဢႃယု 35 4. ၸၢႆးဢၢႆႈဝုၼ်း(ႁိုဝ်) ၸၢႆးလႃႉဝုၼ်း ဢႃယု 45 ယူႇဝၢၼ်ႈလူင်ၶၢင် ၸႄႈဝဵင်းၼမ်ႉၶမ်း။ထိုင်ဝၼ်းမိူဝ်ႈၼႆႉ ၵပ်းသိုပ်ႇႁႃ ဢမ်ႇလႆႈလႄႈ ပေႃႈမႄႈပီႈၼွင်ႉ ပဵၼ်တၢင်းမႆႈၸႂ်ႁႅင်းဝႆႉ။
ၼၢင်းသႅင်ဢွၼ်ႇ ၵေႃႉပဵၼ်ပီႈၼၢင်းၸၢႆးဢၢႆႈၵွၼ်ႉ လၢတ်ႈတီႈၽူႈတွႆႇႁွၵ်ႈဝႃႈ – “ ၸိူဝ်းဢၼ်ႁၢႆၵႂႃႇၼၼ်ႉ ၼၢင်းၶမ်းလိုၼ်းတင်း ၸၢႆးတၢၼ်းၵျေႃႇ ပဵၼ်ၽူဝ်မေးၵၼ်ဢေႃႈ ၶႃသွင်ၵေႃႉ မီးလုၵ်ႈယိင်းႁူမ်ႈၵၼ်ဝႆႉ သွင်ၵေႃႉဢေႃႈၼၼ်ႉ။ဢွၼ်ၵၼ် ပဵၼ်ၼမ်ႉႁူႈၼမ်ႉတႃ ယူႇယဝ်ႉၶႃႈ။ထႅင်ႈသွင်ၵေႃႉ ဢၼ်ႁၢႆၸွမ်းၵၼ်ၼၼ်ႉတႄႉ တေပဵၼ်တႆးၵေႃႉ ၶဝ် ႁဵတ်းၵၢၼ်ၸွမ်းၵၼ်ၼၼ်ႉၶႃႈယဝ်ႉ။ ႁဝ်းၵေႃႈ ၶတ်းၸႂ် ၸွပ်ႇထၢမ် ယူႇထိုင်မိူဝ်ႈလဵဝ် ဢမ်ႇၶိုပ်ႈၼႃႈသင် ။ ႁဝ်းၶႃႈၵေႃႈ ဢမ်ႇယၢမ်ႈၵႂႃႇလူးၼေႃႈတၢင်းပုၼ်ႉ တေဝႃႈ ၵႂႃႇၸွမ်းၶႆႈၼႆၵေႃႈ မၼ်းယၢပ်ႇ။လိူဝ်သေပိုၼ်ၽၢဝ်ႇႁႃ ဢမ်ႇၸၢင်ႈႁဵတ်းႁိုဝ်ၶႃႈ ” – ဝႃႈၼႆ ။
ၽႂ်ႁၼ်မႅၼ်ႈ ၵူၼ်းဢၼ်ႁၢႆတူဝ်ၵႂႃႇၸိူဝ်းၼႆႉၼႆၵေႃႈ ႁႂ်ႈၵပ်းသိုပ်ႇပွင်ႇၶၢဝ်ႇပၼ်တီႈ မၢႆၾူၼ်း 09 882 666 619 ၊ 09 256 170784 ၊ 09 256 132 ၸိူဝ်းၼႆႉ ၵူၼ်းႁူမ်ႈႁိူၼ်း သင်ႇလၢတ်ႈၼင်ႇၼႆ။
 ဢၼ်မီးၾၢႆႇႁွင်ႇဝၼ်းတူၵ်းဝဵင်းလၢဝ်ႇၵၢႆး ၸိုင်ႈတႆးပွတ်းႁွင်ႇၼၼ်ႉသေ ႁိုင်ၶၢဝ်းတၢင်း 10 ဝၼ်းပၢႆယဝ်ႉ ပေႃႈမႄႈပီႈၼွင်ႉ ၵပ်းသိုပ်ႇႁႃ ဢမ်ႇလႆႈၼႆယဝ်ႉ။){kind=link}