ထိုင်ၶၢဝ်းပိုတ်ႇႁူင်းႁဵၼ်းၶိုၼ်းယဝ်ႉလႄႈ ၵူၼ်းမိူင်းပိုၼ်ႉတီႈႁဵတ်းလိၵ်ႈတုၵ်းယွၼ်းထိုင်သိုၵ်းၶၢင် KIA တီႈဢိူင်ႇမိူင်းၸီး ၸႄႈဝဵင်းၵူတ်ႉၶၢႆ ႁႂ်ႈပိုၼ်ၽၢဝ်ႇပၼ်ပိုတ်ႇႁူင်းႁဵၼ်းလူင်ပွင်ၸိုင်ႈၶိုၼ်းဝႆးဝႆး ၵူဝ်လုၵ်ႈလၢင်းတူၵ်းလိုၼ်းၵၢၼ်ႁဵၼ်း ဝႃႈၼႆ။
ဢိူင်ႇမိူင်းၸီးၼႆႉ တေမီးႁူင်းႁဵၼ်းလူင်ပွင်ၸိုင်ႈ 2 လင် တေပဵၼ်ႁူင်းႁဵၼ်းၸၼ်ႉငဝ်ႈ 1 လင်လႄႈ ႁူင်းႁဵၼ်း ၸၼ်ႉသုင် 1 လင်။ သိုၵ်းၶၢင် KIA ႁၢမ်ႈပိုတ်ႇႁူင်းႁဵၼ်း ၸၼ်ႉငဝ်ႈၼႆႉ ၸဵမ်မိူဝ်ႈပီ 2020 ၽွင်းငဝ်းလၢႆးၶဵင်ႈၶႅင်ၵၢၼ်သိုၵ်းၵၼ်တင်းသိုၵ်းမၢၼ်ႈ။ ႁူင်းႁဵၼ်းၸၼ်ႉသုင်သမ်ႉ သိုၵ်းၶၢင် KIA ႁၢမ်ႈ ပိုတ်ႇ ဝၢႆးသိုၵ်းမၢၼ်ႈ ယိုတ်းမိူင်းမႃး။
ၵူဝ်လုၵ်ႈလၢၼ်ၸဝ်ႈၵဝ်ႇ တူၵ်းလိုၼ်းၼႂ်းၵၢၼ်ႁဵၼ်းၵၢၼ်သွၼ်ၼႆသေ ၵူၼ်းပိုၼ်ႉတီႈ ဢွၼ်ၵၼ် ၵႂႃႇတုၵ်းယွၼ်းတီႈသိုၵ်းၶၢင် မိူဝ်ႈ ဝၼ်းတီႈ 19/5/2023 ၵမ်းၼိုင်ႈလႄႈ ဝၼ်းတီႈ 1/6/2023 ၼႆႉၵမ်းၼိုင်ႈ၊ ပူၼ်ႉမႃး မိူဝ်ႈဝၼ်းတီႈ 3/6/2023 ၼႆႉၵေႃႈ ၵူၼ်းမိူင်း ၼႂ်းဢိူင်ႇမိူင်းၸီး ၸႄႈဝဵင်းၵူတ်ႉၶၢႆ ဢွၼ်ၵၼ် ၵႂႃႇႁူပ်ႉထူပ်းဢုပ်ႇဢူဝ်း တင်းသိုၵ်းၶၢင် KIA သေ ၸင်ႇလႆႈၶႂၢင်ႉပိုတ်ႇႁူင်းႁဵၼ်းၸၼ်ႉသုင် တီႈၼႂ်းဢိူင်ႇမိူင်းၸီး ၵူၺ်းၵႃႈ ပီၼႆႉ လႆႈၶႂၢင်ႉပိုတ်ႇတူၵ်း လိုၼ်း ပဵၼ်လၢႆဝၼ်း ဝႃႈၼႆ။
ၵူၼ်းပိုၼ်ႉတီႈ ဝဵင်းၵူတ်ႉၶၢႆ လၢတ်ႈတီႈၽူႈတွႆႇႁွၵ်ႈဝႃႈ – “ၶဝ်ပၼ်ပိုတ်ႇတႄႉ ၼႆၵေႃႈ ဢမ်ႇဝႃႈၼင်ႇၵဝ်ႇ ၵူၺ်းၵႃႈ တေလႆႈ မိူၼ်မိူဝ်ႈပီၵၢႆ ပူၼ်ႉမႃးၼႆႉၵူၺ်း တေမီးပႃးလွင်ႈႁၢမ်ႈၽွင်ႈ မိူၼ်ၼင်ႇ တေဢမ်ႇလႆႈဢွၵ်ႇ ႁၢင်ႈၾၢင်ႁူင်းႁဵၼ်းလူင်ပွင်ၸိုင်ႈ မၢၼ်ႈ၊ တေဢမ်ႇလႆႈၼုင်ႈၶူဝ်းသိူဝ်းၽိူၵ်ႇၵူၼ်ၶဵဝ် (ၶူဝ်းလုၵ်ႈႁဵၼ်း) ၸိူဝ်းၼႆႉၶိုၼ်ႈ”- ဝႃႈၼႆ။
ပၼ်ၶႂၢင်ႉပိုတ်ႇႁူင်းႁဵၼ်းယူႇသေတႃႉ သိုၵ်းၶၢင်သင်ႇဝႃႈ တေဢမ်ႇလႆႈဢွၵ်ႇၾၢင်ႁၢင်ႈ ႁူင်းႁဵၼ်းလူင်ပွင်ၸိုင်ႈမၢၼ်ႈၼႆလႄႈ ထိုင်မႃး ဝၼ်းတီႈ 4/6/2023 ၼႆႉ ၸင်ႇ ဢွၼ်ၵၼ်ႁဵတ်း လွင်ႈမူတ်းသႂ် ၊ မိူဝ်ႈၼႆႉ ဝၼ်းတီႈ 5 ၸင်ႇတႄႇႁပ်ႉသဵၼ်ႈမၢႆ လုၵ်ႈႁဵၼ်း ၵူၺ်းၵႃႈ ဝၼ်းၶိုၼ်ႈႁဵၼ်းတႄႉ ပႆႇ လႆႈမၵ်းမၼ်ႈဝႃႈ တေပိုတ်ႇဝၼ်းလႂ် ၸိူဝ်းၼႆႉ။
ဢိူင်ႇမိူင်းၸီးၼႆႉ တင်းမူတ်းမီး 21 ဝၢၼ်ႈ။ ၼႂ်းၼၼ်ႉ တႃႇဝၢၼ်ႈတႆးမီး 8 ဝၢၼ်ႈ။ ယဝ်ႉၵေႃႈ ယူႇတၢင်းၸဵင်ႇႁွင်ႇဝၼ်း ဢွၵ်ႇ ဝဵင်းၵူတ်ႉၶၢႆ ၼႂ်းၵႄႈၵူတ်ႉၶၢႆ – လဝ်ႇၵၢႆး။ ယဝ်ႉၵေႃႈ တၢင်းပွတ်းတွၼ်ႈၼၼ်ႉ တေမီးၸုမ်းယိပ်းၵွင်ႈၵၢင်ႇ ၸၢဝ်း ၶိူဝ်း တူင်ႉၼိုင် ယူႇဝႆႉၼမ် မိူၼ်ၼင်ႇ သိုၵ်းၶၢင် KIA, သိုၵ်းၵဝ်ႈၵၢင်ႉ MNDAA, သိုၵ်းတဢၢင်း TNLA, သိုၵ်းတႆး SSPP ၸိူဝ်းၼႆႉ။
ဝၼ်းတီႈ 1/6/2023 ၼႆႉ ယူႇတီႈ သိုၵ်းမၢၼ်ႈ ပိုၼ်ၽၢဝ်ႇ တႄႇပိုတ်ႇႁူင်းႁဵၼ်း တႃႇပီၵၢၼ်ႁဵၼ်း 2023-2024 ၼႆယဝ်ႉ ဝႃႈၼႆ။ ယူႇတီႈ ၾၢႆႇပၢႆးပၺ်ႇၺႃႇသိုၵ်းမၢၼ်ႈ ပိုၼ်ၽၢဝ်ႇဢွၵ်ႇဝႆႉဝႃႈ ၵၢၼ်ႁဵၼ်းၼႂ်းပီ 2022-2023 သဵၼ်ႈမၢႆလုၵ်ႈႁဵၼ်းမီး 7.23 လၢၼ်ပၢႆ။ ထိုင်မႃး ပီၼႆႉ မီး 6.47 လၢၼ်ႉ (မီး 6,473,350 ၵေႃႉ) ပေႃးတႅၵ်ႈၼိူင်းပီၵၢႆ တင်းပီၼႆႉၸိုင် လုၵ်ႈ ႁဵၼ်း ယွမ်းလူင်း 7 သႅၼ်ပၢႆ ၼႆယဝ်ႉ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ