ၸၢႆးၵေႃႉၼိုင်ႈမၢတ်ႇၸဵပ်းသေတၢႆဝႆႉၼိူဝ်တၢင်းၵၢင်ဝဵင်းတႃႈၶီႈလဵၵ်း

မိူဝ်ႈဝႃး ဝၼ်းတီႈ 4/6/2023 ယၢမ်းၶမ်ႈ 8 မူင်း ၶိုင်ႈၼၼ်ႉ ထူပ်းႁၼ်တူဝ်တၢႆၵူၼ်းၸၢႆးၵေႃႉၼိုင်ႈ တီႈႁိမ်း တၢင်းၶဝ်ႈ ဝၢၼ်ႈလူင် ၸႄႈဝဵင်းတႃႈၶီႈလဵၵ်းၼႆယဝ်ႉ။

ၸုမ်းၸွႆႈတူင်ႇဝူင်းၵူၼ်းဢူးလႃႉမူဝ်းလၢတ်ႈတီႈၽူႈတွႆႇႁွၵ်ႈဝႃႈ – “ ၵူၼ်းဝၢၼ်ႈႁၼ် လႄႈ ႁွင်ႉႁဝ်းၵႂႃႇ တူၺ်းဢေႃႈ ၵွၵ်းႁူဝ်မၼ်းၸိူဝ်းၼႆႉ မီးႁွႆးမၢတ်ႇၸဵပ်းဝႆႉၼမ်ဢေႃႈ။လႅပ်ႈတေၺႃးပေႃႉထုပ်ႉဝႆႉႁိုဝ် ႁဝ်းၵေႃႈ ဢမ်ႇၸၢင်ႈဝႃႈ။ၸုမ်းႁဝ်း တေႃႉသူင်ႇ ပၼ်တီႈႁူင်းယႃပၼ် ၵႃႈၼၼ်ႉၵွႆးဢေႃႈ ။လိူဝ်ၼၼ်ႉ ဢမ်ႇပႆႇႁူႉသင်ၸွမ်း ၶႃႈ ” – ဝႃႈၼႆ။

ၵေႃႉဢၼ်လူႉတၢႆၵႂႃႇၼႆႉ ၸိုဝ်ႈ မျိၼ်ႉတဵင်း ဢႃယု 30 ယူႇဝၢၼ်ႈမၢၵ်ႇယၢင်း ၸႄႈဝဵင်းတႃႈၶီႈလဵၵ်း။ ၸုမ်းဢူးလႃႉမူဝ်း ၸွႆႈဢဝ်ၶၢပ်ႈတူဝ် သူင်ႇထိုင်ႁူင်းယႃ  ပလိၵ်ႈမၢၼ်ႈၵေႃႈ မႃးၵူတ်ႇထတ်းယူႇ ၼႆယဝ်ႉ။

မိူဝ်ႈဝၼ်းတီႈ 2/6/2023 ၼၼ်ႉၵေႃႈ ၵႃးလမ်းၼိုင်ႈ ၺႃးယိုဝ်း ၼိူဝ်ႈသဵၼ်ႈတၢင်းၵႂႃႇပၢင်ႇပေႃႉ ၵွပ်ႉၾ်ရီႊၵျီႊၼႃႊ ၼႂ်းပွၵ်ႉသၼ်သၢႆး (ၵ) ၸႄႈဝဵင်းတႃႈၶီႈလဵၵ်းၼၼ်ႉသေ မီးၵူၼ်းမၢတ်ႇၸဵပ်းၵေႃႉၼိုင်ႈ။

ၵူၼ်းပိုၼ်ႉတီႈၵေႃႉၼိုင်ႈ လၢတ်ႈဝႃႈ – “ တီႈတႃႈၶီႈလဵၵ်းၼႆႉ မီးၵူၼ်းၸေးၼႃႇ။ယႃႈမဝ်းၵမ်ၵေႃႈလိူင်ႇ ၵူၼ်းမႃးႁဵတ်းဢွၼ်ႊလၢႆးၵဵမ်းၵေႃႈ ၼမ်ဝႃႈၼမ်။မၢင်ပွၵ်ႈမႃး ၵူၼ်းမဝ်းလဝ်ႈယႃႈၶဝ် ယိပ်းၶွၼ်ႉ ယိပ်းမိတ်ႈသေ ၵႂႃႇမႃး ၼိူဝ်တၢင်းႁဵတ်းၼၼ်ၵေႃႈႁၼ်ၶႃႈဢေႃႈ။ၵူၼ်းမိူင်းၵေႃႈ လႆႈၵူဝ်လႆႈႁႄဢေႃႈ ဢမ်ႇပေႃးထၢင်ႇႁၢင်ႈၵႂႃႇမႃး လႆႈၵူဝ်ၼႃႇ ” – ဝႃႈၼႆ။

မိူဝ်ႈဝၼ်းတီႈ 31/3/2023 ၼၼ်ႉၵေႃႈ  ၵူၼ်းၸၢႆး ဢႃယု 50 ၵေႃႉၼိုင်ႈ ၺႃးၽၼ်းလူႉတၢႆ တီႈဝၢၼ်ႈတူၼ်ႈၵေႃႉ ၸႄႈဝဵင်းတႃႈၶီႈလဵၵ်း။

တႃႈၶီႈလဵၵ်းၼႆႉ ယွၼ်ႉသဵၼ်ႈမၢႆႁူဝ်ၵူၼ်းၵေႃႈၼမ်မႃးလႄႈ လိူဝ်သေ မီးၵူၼ်းဢမ်ႇႁူႉၾၢႆႇ ၵေႃႇၵၢၼ်ႁၢႆႉယဝ်ႉ ၽေးၵိုင်ႉၵၢင်ႉရူတ်ႉၶိူင်ႈၵေႃႈမီးၵူႈဝၼ်းသေ ၽူႈလၵ်ႉၸၵ်ႉၶုတ်ႈၵေႃႈလိူင်ႇၼမ် ၶိူင်ႈၶူဝ်းၸႂ်ႉသွႆၼႂ်းႁိူၼ်းၼႂ်းယေးၵူၼ်းမိူင်းၵေႃႈ ၺႃးလၵ်ႉယူႇၵူႈမိုဝ်ႉၵူႈဝၼ်း။