Friday, March 29, 2024

ႁူင်းပလိၵ်ႈမၢၼ်ႈ ဝဵင်းလႃႈသဵဝ်ႈ ထုၵ်ႇသိုၵ်း MNDAA လူမ်ႇယိုဝ်း

Must read

မိူဝ်ႈၼႆႉ ဝၼ်းတီႈ 5/6/2023 ယၢမ်းၵၢင်ၼႂ်ၸဝ်ႉ မွၵ်ႈ 3:50 မူင်း သိုၵ်းၵဝ်ႈၵၢင်ႉ MNDAA ၶဝ်ႈလူမ်ႇယိုဝ်း ႁူင်းပလိၵ်ႈမၢၼ်ႈ မၢႆ 2 တီႈပွၵ်ႉ 12 ၼႂ်းဝဵင်းလႃႈသဵဝ်ႈ ၸိုင်ႈတႆးပွတ်းႁွင်ႇ ႁၢဝ်ႈႁႅင်း။

ၶွပ်ႇမၢၵ်ႇၵွင်ႈ သိုၵ်းမၢၼ်ႈ
Photo by – ၵူၼ်းပိုၼ်ႉတီႈ/ ၶွပ်ႇမၢၵ်ႇၵွင်ႈ သိုၵ်းမၢၼ်ႈ တူၵ်းဝႆႉ ၸွမ်းၼႂ်းမူႇဝၢၼ်ႈ တီႈဝဵင်းလႃႈသဵဝ်ႈ

ၵူၼ်းပိုၼ်ႉတီႈ ဝဵင်းလႃႈသဵဝ်ႈ လၢတ်ႈတီႈၽူႈတွႆႇႁွၵ်ႈဝႃႈ -“ပဵၼ်သိုၵ်းၵဝ်ႈၵၢင်ႉ ၶဝ်ႈလူမ်ႇယိုဝ်း တီႈႁူင်းပလိၵ်ႈမၢၼ်ႈ မၢႆ 2 တီႈ ပွၵ်ႉ 12 ။ သိုၵ်းၵဝ်ႈၵၢင်ႉၼႆႉ ယူႇတီႈၾၢႆႇၼိူဝ်ၵျွင်းၵၢင်မိူင်းသေ ယိုဝ်းၶဝ်ႈၼႂ်းႁူင်းပလိၵ်ႈမၢၼ်ႈ ႁၢဝ်ႈႁႅင်း။ သွင်ၾၢႆႇယိုဝ်းၵၼ် တေႁိုင်မွၵ်ႈ 20 မိၼိတ်ႉ။ လႆႈငိၼ်းဝႃႈ ၾၢႆႇပလိၵ်ႈသိုၵ်းမၢၼ်ႈ မီးလွင်ႈမၢတ်ႇၸဵပ်းလူႉတၢႆၸွမ်း။ လၢႆၵေႃႉတႄႉတႄႉ တႄႉဢမ်ႇပႆႇႁူႉ”- ဝႃႈၼႆ။

- Subscription -

တီႈႁူဝ်ႉႁူင်းပလိၵ်ႈ ပဵၼ်ႁွႆးမၢၵ်ႇၵွင်ႈဝႆႉလွၼ်ႉလွၼ်ႉ ။ သဝ်လၵ်းၾႆးၼႃႈႁူင်းပလိၵ်ႈၵေႃႈႁၵ်းၵွႆဝႆႉလၵ်းၼိုင်ႈ။ ၶွၵ်ႇမၢၵ်ႇၵွင်ႈတူၵ်းမိူဝ်ဝႆႉၼႃႈႁူင်းပလိၵ်ႈလႄႈၸွမ်းတၢင်းၸိူဝ်းၼႆႉတင်းၼမ်။

လိူဝ်ၼၼ်ႉ သိုၵ်းမၢၼ်ႈ ယိုတ်းမိူင်းတင်း သိုၵ်းၵဝ်ႈၵၢင်ႉ ပဵၼ်ပၢင်တိုၵ်းၵၼ်ႁၢဝ်ႈႁႅင်းထႅင်ႈ တီႈမၢၼ်ႈဢၢႆႇ ၶၢဝ်းတၢင်းႁိုင်မွၵ်ႈ 30 မိၼိတ်ႉၼႆႉ ဝႃႈၼႆ။

“ဝၢႆးသေ သဵင်ၵွင်ႈတႅၵ်ႇ တီႈႁူင်းပလိၵ်ႈမၢၼ်ႈ မၢႆ 2 ၼၼ်ႉယဝ်ႉ ပႆႇႁိုင် သဵင်ၵွင်ႈမႃးတႅၵ်ႇထႅင်ႈ တီႈမၢၼ်ႈဢၢႆႇ ပဵၼ်သိုၵ်းၵဝ်ႈၵၢင်ႉတင်း သိုၵ်းမၢၼ်ႈ တပ်ႉၶလယ 507 ။ သိုၵ်းၵဝ်ႈၵၢင်ႉ လုၵ်ႉတၢင်းဝၢၼ်ႈၵုင်းၺွင်ႇ ပႆမႃး ဢဵၼ်ႁႅင်း 80 ပၢႆ ၶဝ်မႃးၵိုတ်းၵႃး တီႈၼၼ်ႈသေ ပႆမႃးယူႇတီႈၸဝ်ႈမိူင်းမၢၼ်ႈဢၢႆႇယဝ်ႉ ယိုဝ်းသႂ်ႇတီႈတပ်ႉသိုၵ်းမၢၼ်ႈ 507 မၢၵ်ႇလူင်မွၵ်ႈ 2 လုၵ်ႈ။ မၢၵ်ႇၵွင်ႈ မွၵ်ႈ 1-2 မႅၵ်ႉၼႆႉ။ ဝၢႆးယိုဝ်းယဝ်ႉ သိုၵ်းၵဝ်ႈၵၢင်ႉထွႆၶိုၼ်း။ ပၢင်တိုၵ်းတႄႉ ပဵၼ်ႁၢဝ်ႈႁႅင်း လွင်ႈလူႉတၢႆမၢတ်ႇၸဵပ်းတင်း သွင်ၾၢႆႇ တႄႉ ဢမ်ႇမီး။ ဝၢႆးပၢင်တိုၵ်းယဝ်ႉၼၼ်ႉ သိုၵ်းမၢၼ်ႈ မႃးယူႇတီႈမၢၼ်ႈဢၢႆႇ ၸွမ်းၸဝ်ႈမိူင်းၼႆႉသေ ယိုဝ်းၵွင်ႈလူင်ၵွင်ႈဢွၼ်ႇ လမ်းၸွမ်းၵူၼ်ႈသိုၵ်းၵဝ်ႈၵၢင်ႉႁိုင် မွၵ်ႈ 30 မိၼိတ်ႉၼႆႉ”- ၵူၼ်းပိုၼ်ႉတီႈ ဝဵင်းလႃႈသဵဝ်ႈ သိုပ်ႇလၢတ်ႈၼႄၼင်ႇၼႆ။

ယၢမ်းလဵဝ် သိုၵ်းမၢၼ်ႈ ပၵ်းယူႇဝႆႉ ၸွမ်းၼႂ်းမူႇမၢၼ်ႈဢၢႆႇ ၸွင်းၵျွင်းလွႆဝဵင်း ၸိူဝ်းၼႆႉထႅင်ႈတင်းၼမ်။ ယဝ်ႉၵေႃႈ ၸွမ်း ၵျွင်း ၵၢင်ဝဵင်း ႁိမ်းႁူင်းပလိၵ်ႈမၢၼ်ႈ မၢႆ 2 ၸိူဝ်းထႅင်ႈ။

ၵူၼ်းၼုမ်ႇ ပိုၼ်ႉတီႈ ဝဵင်းလႃႈသဵဝ်ႈ လၢတ်ႈတီႈၽူႈတွႆႇႁွၵ်ႈဝႃႈ – “ၵူၼ်းမိူင်းတႄႉ ၵူဝ်ၶႃႈဢေႃႈ ပေႃးလႆႈငိၼ်းသဵင်ၵွင်ႈတႅၵ်ႇၼႆ ႁဝ်းၶႃႈ ပေႃးၽႅတ်းတိုၼ်ႇၶႃႈဢေႃႈ။ သဵင်ၵွင်ႈၶဝ်ယိုဝ်းၵၼ် တီႈမၢၼ်ႈဢၢႆႇၼႆႉ လႆႈငိၼ်းဝႃႈ သိုၵ်း မၢၼ်ႈ ယူႇတီႈၵျွင်းလွႆဝဵင်းသေ ယိုဝ်းၸွႆႈ ၸႂ်ႉမၢၵ်ႇလူင်သေယိုဝ်းလႄႈ လိၼ်ယွၼ်ႈႁႅင်းသေ မၢၼ်ႇၵႃး ၸဝ်ႈသြႃႇႁဝ်းၶႃႈ ပေႃးတႅၵ်ႇလူႉၵွႆၸွမ်းၼႆၶႃႈဢေႃႈ။ တီႈၼၼ်ႉသမ်ႉ မီးသိုၵ်းမၢၼ်ႈ ပၵ်းယူႇဝႆႉ။ ဢၼ်သိုၵ်းၵဝ်ႈၵၢင်ႉမႃးယိုဝ်းၼႆႉ ၶဝ်တေဝႆႉႁူင်း ပလိၵ်ႈမၢၼ်ႈ မၢႆ 2 ၼၼ်ႉပဵၼ်ပဝ်ႉမၢႆယႂ်ႇလူင်ၶဝ်။ ဢၼ်ၶဝ်မႃးယိုဝ်းတီႈမၢၼ်ႈဢၢႆႇၼႆႉ ၶဝ်ယွၵ်ႇႁႂ်ႈသိုၵ်းမၢၼ်ႈတိုၼ်ႇသၢၼ်ႈ ၵူၺ်း”- ဝႃႈၼႆ။

ၼႂ်းဝၼ်းတီႈ 5 ၼႆႉ သိုၵ်းၵဝ်ႈၵၢင်ႉ MNDAA ႁႅၼ်းသိုၵ်းလေႃႇတိုၵ်း ႁူင်းပလိၵ်ႈမၢၼ်ႈတင်း တပ်ႉသိုၵ်းမၢၼ်ႈ တီႈဝဵင်းလႃႈသဵဝ်ႈ ႁၢဝ်ႈႁႅင်း 2 ဢွင်ႈတီႈ ၼႆယဝ်ႉ။

ၼွၵ်ႈလိူဝ်ၼၼ်ႉ မိူဝ်ႈဝႃး ဝၼ်းတီႈ 4/6/2023 ယၢမ်းၵၢင်ၶမ်ႈ 9 မူင်းပၢႆ သိုၵ်းၵၢဝ်ႈၵၢင်ႉ မႃးပွႆႇမၢၵ်ႇတႅၵ်ႇ တီႈႁိမ်းၶူဝ်ၶဝ်ႈဝဵင်း သႅၼ်ဝီ ၼႂ်းၵႄႈလႃႈသဵဝ်ႈ – သႅၼ်ဝီ လုၵ်ႈၼိုင်ႈ။ ထိုင်မႃး မိူဝ်ႈၼႆႉ ဝၼ်းတီႈ 5 ယၢမ်းၵၢင်ၼႂ် မွၵ်ႈ 2 မူင်းပၢႆ သိုၵ်းမၢၼ်ႈတင်း သိုၵ်းၵဝ်ႈၵၢင်ႉ ပဵၼ်ပၢင်တိုၵ်းၵၼ် တီႈၶူဝ်ၼၼ်ႉထႅင်ႈ ႁၢဝ်ႈႁႅင်း။

ပူၼ်ႉမႃး မိူဝ်ႈဝၼ်းတီႈ 2/6/2023 ယၢမ်းၵၢင်ၼႂ် 9 မူင်းပၢႆ ၶွင်ႇသီႇသိုၵ်းမၢၼ်ႈ ယိုတ်းမိူင်းတင်း သိုၵ်းၵဝ်ႈၵၢင်ႉ MNDAA ပဵၼ်ပၢင်တိုၵ်းၵၼ် ၼႂ်းဢိူင်ႇၼႃးၼၢင်း ၸဵင်ႇၸၢၼ်းဝၼ်းဢွၵ်ႇ ဝဵင်းလႃႈသဵဝ်ႈ ၸိုင်ႈတႆးပွတ်းႁွင်ႇ ၼႆယဝ်ႉ။

သိုၵ်းၵဝ်ႈၵၢင်ႉ ဢၼ်ၶဝ်ႈပႃးၼႂ်းၸုမ်းဢူၺ်းလီပွတ်းႁွင်ႇ 3 ၸုမ်း TNLA, AA, MNDAA ဢၼ်ၵႂႃႇဢုပ်ႇဢူဝ်းၵၼ်တင်းတူဝ်တႅၼ်းၸုမ်းငမ်းယဵၼ်သိုၵ်းမၢၼ်ႈတီႈ ဝဵင်းမိူင်းလႃး။ ပၢင်ဢုပ်ႇဢူဝ်းပွၵ်ႈၼႆႉ မိူင်းၶႄႇသူင်ႇတူဝ်တႅၼ်းမႃးပဵၼ်ၵၢင် ပဵၼ်လၵ်းထၢၼ်သၢၵ်ႈသေႇဝႃႈၼႆယူႇသေတႃႉ ၾၢႆႇသိုၵ်းမၢၼ်ႈလႄႈၸၢဝ်းၶိူဝ်း တူၵ်းလူင်းၵၼ်ဢမ်ႇလႆႈလႄႈ ဢၢၼ်းဢုပ်ႇဢူဝ်းၵၼ် 3 ဝၼ်းသေတႃႉ ပၢင်ႇဢုပ်ႇဢူဝ်းလႆႈလူႉၵႂႃႇပႅတ်ႈၸဵမ်မိူဝ်ႈဝၼ်းႁႅၵ်ႈၼၼ်ႉ။

ဝၢႆးၼၼ်ႉသိုၵ်းမၢၼ်ႈ ပိုတ်းယိုဝ်းပၢင်သဝ်းသိုၵ်းၵဝ်ႈၵၢင်ႉဢၼ်မီးၼႂ်းၸႄႈဝဵင်း သႅၼ်ဝီ၊ မူႇၸေႊ၊ လၢဝ်ႇၵၢႆး ၸိူဝ်းၼႆႉမႃးဢမ်ႇထၢတ်ႇသေ တေႃႇထိုင်ဝၼ်းမိူဝ်ႈၼႆႉ သိုၵ်းသွင်ၾၢႆႇ လႆႈၶဵင်ႈၶႅင်တေႃႇၵၼ်ဝႆႉ။

ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ

- Subscription -
- SHAN's Apps -spot_img

ၶၢဝ်ႇလိုၼ်းသုတ်း