သိုၵ်းမၢၼ်ႈလၢမ်းလိမ်းယိုဝ်းၵွင်ႈလူင် တူၵ်းသႂ်ႇ ၼႂ်းဝၢၼ်ႈလႄႈ ၵူၼ်းမိူင်းပၢႆး မၢတ်ႇၸဵပ်းႁၢဝ်ႈႁႅင်းသေ လူႉတၢႆၵေႃႉၼိုင်ႈ။
မိူဝ်ႈဝႃး ဝၼ်းတီႈ 3/6/2023 ယၢမ်းၵၢင်ၼႂ် 6 မူင်းၼၼ်ႉ သိုၵ်းမၢၼ်ႈလၢမ်းလိမ်းယိုဝ်းၵွင်ႈလူင် တူၵ်းသႂ်ႇ ၼႂ်းဝၢင်းႁိူၼ်းလင်ၼိုင်ႈ ဢၼ်မီးၼႂ်း ပွၵ်ႉ 3 ၸႄႈဝဵင်းမိူင်းပၢႆးၼၼ်ႉ ၵူၼ်းမိူင်းမၢတ်ႇၸဵပ်းႁၢဝ်ႈႁႅင်းသေ လူႉတၢႆၵေႃႉၼိုင်ႈၼႆယဝ်ႉ။
ၵူၼ်းၼႂ်းပိုၼ်ႉတီႈ မိူင်းပၢႆးၵေႃႉၼိုင်ႈ လၢတ်ႈတီၽူႈတွႆႇႁွၵ်ႈဝႃႈ – “ ၸႂ်ႈဢေႃႈ မႅၼ်ႈမိူဝ်ႈမၼ်း တိုၵ်ႉယူႇၼႂ်းဝၢင်းႁိူၼ်း ၼၼ်ႉယဝ်ႉ။တိူဝ်ႉမၢတ်ႇၼမ်ဝႆႉဢေႃႈ ၸွမ်းၵွၵ်းႁူဝ်မၼ်းလႄႈ ပုမ်မၼ်းၸိူဝ်းၼႆႉ တိူဝ်ႉၸၢၵ်ႇမၢၵ်ႇဝႆႉဢေႃႈ။ၸုမ်းၸွႆႈထႅမ်တူင်ႇဝူင်းၵူၼ်းၶဝ် မႃးဢဝ်သူင်ႇထိုင်ႁူင်းယႃယူႇဢေႃႈၼၼ်ႉ ယူႇဢမ်ႇတၼ်းႁိုင်ၵေႃႈ လူႉတၢႆပႅတ်ႈဢေႃႈ ” – ဝႃႈၼႆ။
ၵေႃႉဢၼ်တိူဝ်ႉမၢၵ်ႇၵွင်ႈလူင်သေ လူႉတၢႆၵႂႃႇၼႆႉ ၸိုဝ်ႈ ဢွင်ႇၵျေႃႇၽျူဝ်း ဢႃယု 22 ယူႇ ပွၵ်ႉ 3 ၸႄႈဝဵင်းမိူင်းပၢႆး ၸိုင်ႈတႆးပွတ်းၸၢၼ်း။
တႄႇဢဝ် မိူဝ်ႈဝၼ်းတီႈ 27 ထိုင် ဝၼ်းတီႈ 30 လိူၼ်မေႊၼၼ်ႉ သိုၵ်းမၢၼ်ႈယိုတ်းမိူင်းလႄႈ တင်း PDF ပိုတ်းယိုဝ်းၵၼ်ႁၢဝ်ႈႁႅင်း ၾၢႆႇသိုၵ်းမၢၼ်ႈ ၸႂ်ႉၶိူင်ႈမိၼ်လေႃႇတိုၵ်းပႃးလႄႈ ၵူၼ်းမိူင်း မၢတ်ႇၸဵပ်းႁၢဝ်ႈႁႅင်း 11 ၵေႃႉ လူႉတၢႆ 4 ၵေႃႉ ။
မိူဝ်ႈဝၼ်းတီႈ 3/6/2023 ၼႆႉၵူၺ်းၼင်ႇၵဝ်ႇ သိုၵ်းမၢၼ်ႈ လၢမ်းလိမ်းယိုဝ်းၵွင်ႈလူင် တူၵ်းသႂ်ႇၼႂ်းဝၢၼ်ႈၼႂ်းဝဵင်း တီႈမိူင်းပၢႆးသေ ႁၢၼ်ႉၶၢႆၼမ်ႉမၼ်းၸိူဝ်ႉၾႆး(ၼမ်ႉမၼ်းထၢတ်ႈသီႇ) ႁၢၼ်ႉၼိုင်ႈ လႄႈ လူတ်ႉၶိူင်ႈ 2 ၵၼ်း ၾႆးမႆႈလူႉသုမ်းၼႆယဝ်ႉ။
