ပီၵၢၼ်ႁဵၼ်းလိၵ်ႈပီ 2023 ၼႆႉ လုၵ်ႈႁဵၼ်းဢၼ်လူင်းလၢႆးၸိုဝ်ႈႁဵၼ်းလိၵ်ႈၼႂ်းႁူင်းႁဵၼ်း လူင်ပွင်ၸိုင်ႈ တႂ်ႈသိုၵ်းမၢၼ်ႈၵုမ်းၵမ် ယွမ်းလိူဝ်ပီပူၼ်ႉမႃး 7 သႅၼ်ပၢႆ ဝႃႈၼႆ။
ဝၼ်းတီႈ1/6/2023 သိုၵ်းမၢၼ်ႈပိုၼ်ၽၢဝ်ႇတႄႇပိုတ်ႇႁူင်းႁဵၼ်းတႃႇပီၵၢၼ်ႁဵၼ်း 2023-2024 ။ သိုၵ်းမၢၼ်ႈယိုတ်းဢႃႇၼႃႇမႃးလႆႈပီထူၼ်ႈသွင်ယဝ်ႉသေတႃႉ ပေႃႈမႄႈလႄႈ လုၵ်ႈႁဵၼ်းဢၼ်ႁဵတ်း CDM တိုၵ်ႉမီးယူႇဢမ်ႇထၢတ်ႇၶိူဝ်းယႂ်း ပီၼႆႉႁူဝ်ၼပ်ႉလုၵ်ႈႁဵၼ်း ပေႃးတႅၵ်ႈတူၺ်း သဵၼ်ႈမၢႆႁူဝ်ၵူၼ်းလုၵ်ႈႁဵၼ်း မိူဝ်ႈပီပူၼ်ႉမႃးလႄႈ တင်းပီၼႆႉၸိုင် လႆႈဝႃႈ ပီၼႆႉ ယွမ်းလူင်း 7 သႅၼ်ပၢႆ။
ၾၢႆႇပၢႆးပၺ်ႇၺႃႇသိုၵ်းမၢၼ်ႈ ပိုၼ်ႇၽၢဝ်ႇဢွၵ်ႇဝႆႉဝႃႈ ၵၢၼ်ႁဵၼ်းၼႂ်းပီ 2022-2023 ၼႆႉ သဵၼ်ႈမၢႆလုၵ်ႈႁဵၼ်း မီး 7.23 လၢၼ်ႉပၢႆ။ ထိုင်မႃး ပီၼႆႉ မီး 6.47 လၢၼ်ႉ ( မီး 6,473,350 ၵေႃႉ) ။ ႁူဝ်ၼပ်ႉ သဵၼ်ႈမၢႆၸိူဝ်းၼႆႉ ပဵၼ်သဵၼ်ႈမၢႆပတ်းပိုၼ်ႉၸိုင်ႈမိူင်း ပႃးၸဵမ် ႁူင်းႁဵၼ်းလူင်ပွင်ၸိုင်ႈလႄႈတင်း ႁူင်းႁဵၼ်းသုၼ်ႇလဵဝ်(ကိုယ်ပိုင်ကျောင်း )၊ ႁူင်းႁဵၼ်း ဢၼ်ၾၢႆႇသႃႇသၼႃႇ ပူၵ်းပွင် ၸိူဝ်းၼၼ်ႉ ။
မႄႈလုၵ်ႈႁဵၼ်းၵေႃႉၼိုင်ႈလၢတ်ႈဝႃႈ – “ ႁႂ်ႈဝႃႈ မီးငိုၼ်းတွင်းၼမ်ၼႃႇၼႆတႄႉ ဢမ်ႇၸႂ်ႈၼင်ႇၵဝ်ႇ ၊ၵူၺ်းၵႃႈ ၶတ်းၸႂ် ဢဝ်လုၵ်ႈလၢင်းႁဝ်းဝႆႉ တီႈႁူင်းႁဵၼ်းသုၼ်ႇလဵဝ်ၵူၺ်းဢေႃႈ။ငိုၼ်းတႄႉ တိုၼ်းလႆႈ သဵင်ႈၼမ်ယူႇယဝ်ႉ။မၼ်းလႆႈ တမ်းၸႂ်လူးၼေႃႈ။ၵျွင်းဢၼ် သိုၵ်းမၢၼ်ႈၶဝ်ၽုၺ်ႇသွၼ်ၼၼ်ႉတႄႉ ဢမ်ႇၶႂ်ႈႁႂ်ႈၶိုၼ်ႈ။ ႁဝ်းဢမ်ႇမီးလွင်ႈ ယုမ်ႇယမ်ၼိူဝ်ၶဝ်။ မေႃသွၼ်ၶူးသွၼ် ၸိူဝ်းမီးၼမ်ႉၵတ်ႉၵေႃႈ ဢွၵ်ႇႁဵတ်း CDM မူတ်းယဝ်ႉၼႃႇ။ယွၼ်ႉၼၼ် ပေႃး ဢမ်ႇမီးၵျွင်းတီႈလႂ်လီၶိုၼ်ႈၵေႃႈ ၸႂ်ႉလုၵ်ႈလၢင်းႁဝ်းၶိုၼ်ႈ ၼႂ်းဢွၼ်ႊလၢႆႊဢဝ်ၶႃႈယဝ်ႉ။မိူဝ်ႈလဵဝ် ၵမ်ႈၽွင်ႈၵေႃႈ ဢွၼ်ဢဝ်လုၵ်ႈၶဝ် ၵႂႃႇဢၢပ်ႈၵျွင်းယူႇ။ မိူၼ်ပိူၼ်ႈ ဢဝ်ၵႂႃႇသႂ်ႇၶွၵ်ႈယဝ်ႉ ႁဝ်းဝႃႈတႄႉ တၢင်းၼႃႈၵျွင်းၸိူဝ်းၼၼ်ႉၵေႃႈ လုၵ်ႈသိုၵ်း ယိပ်းၵွင်ႈသေ ပႂ်ႉပေႃးတဵမ်လူင်ဝႆႉ ” -ဝႃႈၼႆ။
ၾၢႆႇၵုမ်းမေႃသွၼ်မိူင်းႁူမ်ႈတုမ်( မြန်မာနိုင်ငံလုံးဆိုင်ရာ ဆရာများအဖွဲ့ချုပ်) ဢွၵ်ႇဝႆႉဝႃႈ သဵၼ်ႈမၢႆလုၵ်ႈႁဵၼ်း ၼႂ်းပီ 2022 ၼၼ်ႉ တင်းသဵင်ႈမီး 12 လၢၼ်ႉၼႆယဝ်ႉ။
ၾၢႆႇ NUG ဢွၵ်ႇဝႆႉဝႃႈ ဝၢႆးသိုၵ်းမၢၼ်ႈယိုတ်းမိူင်းသေ ၼႂ်းပီ 2022 ၼႆႉ ၶူးသွၼ်မေႃသွၼ် ၽူႈႁၢပ်ႇၵၢၼ်ပၢႆးပၺ်ႇၺႃႇ ႁူဝ်ၵူၼ်းမွၵ်ႈ 2 သႅၼ်ပၢႆ သၢၼ်ၶတ်းသိုၵ်းမၢၼ်ႈယိုတ်းမိူင်းသေ ဢွၵ်ႇႁဵတ်း CDM ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ