မိူဝ်ႈၼႆႉ ဝၼ်းတီႈ 2/6/2023 ယၢမ်းၵၢင်ၼႂ် 9 မူင်းပၢႆ ၶွင်ႇသီႇသိုၵ်းမၢၼ်ႈ ယိုတ်းမိူင်းတင်း သိုၵ်းၵဝ်ႈၵၢင်ႉ MNDAA ပဵၼ် ပၢင်တိုၵ်းၵၼ် ၼႂ်းဢိူင်ႇၼႃးၼၢင်း ၸဵင်ႇၸၢၼ်းဝၼ်းဢွၵ်ႇ ဝဵင်းလႃႈသဵဝ်ႈ ၸိုင်ႈတႆးပွတ်းႁွင်ႇ ၼႆယဝ်ႉ။
ၵူၼ်းပိုၼ်ႉတီႈ ထုင်ႉၼမ်ႉပွင်ႈ လၢတ်ႈတီႈၽူႈတွႆႇႁွၵ်ႈဝႃႈ – “ၸႂ်ႈၶႃႈဢေႃႈ ပဵၼ်သိုၵ်းမၢၼ်ႈတင်း သိုၵ်းၵဝ်ႈၵၢင်ႉ ယိုဝ်း ၵၼ် ၼႂ်း ဢိူင်ႇၼႃးၼၢင်း ၼႂ်းၵႄႈဝၢၼ်ႈပဵင်းၺွင်ႇ – ဝၢၼ်ႈၼႃးမူင်ႈ။ လႆႈႁူႉဝႃႈ ၶဝ်ၽႃႇၺႃးၵၼ်ၼႆသေ ပဵၼ်ပၢင်တိုၵ်းၵၼ်ၶႃႈဢေႃႈ။ ၵူၺ်းၵႃႈ ႁူဝ်ယွႆႈမၼ်းတႄႉ ဢမ်ႇလႆႈႁူႉတႅတ်ႈတေႃးလီ။ လွင်ႈၵူၼ်းမၢတ်ႇၸဵပ်းလူႉတၢႆ ၸိူဝ်းၼႆႉ ၵေႃႈ ပႆႇႁူႉ”- ဝႃႈၼႆ။
ထုင်ႉၼမ်ႉပွင်ႈၼႆႉ ပေႃးဢဝ်ဢိူင်ႇမၼ်းဝႃႈၸိုင် တင်းမူတ်းတေမီးမွၵ်ႈ 16 ဢိူင်ႇၼႆႉ။ ယဝ်ႉၵေႃႈ ၸုမ်းယိပ်းၵွင်ႈၵၢင်ႇ တူင်ႉၼိုင် ယူႇဝႆႉ မိူၼ်ၼင်ႇ သိုၵ်းမၢၼ်ႈ၊ သိုၵ်းၶၢင် KIA ၊ သိုၵ်းတဢၢင်း TNLA ၊ သိုၵ်းၵဝ်ႈၵၢင်ႉ MNDAA သိုၵ်းတႆး SSPP လႄႈ သိုၵ်းရၶႅင်ႇ AA ၸိူဝ်းၼႆႉ။
ပူၼ်ႉမႃး မိူဝ်ႈလိူၼ်မၢတ်ႊၶျ် 2023 ၼၼ်ႉ သိုၵ်းမၢၼ်ႈတင်း ၸုမ်းဢူၺ်းလီ ပွတ်းႁွင်ႇ ပဵၼ်ပၢင်တိုၵ်းၵၼ် ႁၢဝ်ႈႁႅင်း ႁိမ်း ဝၢၼ်ႈၵုင်းၸူင် ဢိူင်ႇၼမ်ႉပွင်ႈ။ ႁဵတ်းႁႂ်ႈ ၵူၼ်းဝၢၼ်ႈၵုင်းမူင်ႈ၊ ဝၢၼ်ႈၶုမ်ႇၸူင်၊ ဝၢၼ်ႈၽႃပလၢင်ႇလႄႈ ဝၢၼ်ႈလွႆငိုၼ်း ၸိူဝ်းၼႆႉ ပၢႆႈသွၼ်ႈတီႈဝတ်ႉဝႃးမုၼ်ၸဝ်ႈ တင်းၼမ်။
ပူၼ်ႉမႃး မိူဝ်ႈဝၼ်းတီႈ 11/5/2023 ၼၼ်ႉ သိုၵ်း TNLA ဢဝ်ဢဵၼ်ႁႅင်းတင်းၼမ် ပႂ်ႉၸွမ်းတၢင်း၊ ၸွမ်းၵိဝ်ႇသေ ၶဝ်ႈတီႉၺွပ်း ၵူၼ်းမိူင်း ၼႂ်းပွၵ်ႉ 10 တင်း ပွၵ်ႉ 11 ၼမ်ႉပႃၶီး ၼႂ်းဝဵင်းလႃႈသဵဝ်ႈ ၸိုင်ႈတႆးပွတ်းႁွင်ႇ တီႉဢဝ်ၵႂႃႇ တႃႇႁဵတ်းသိုၵ်းမႂ်ႇ ၼႆယဝ်ႉ။
