ၵိင်ႇမႆႉယၢင်းႁႅင်ႈ ဝဵင်းသႃရၽီး ၵဵင်းမႂ်ႇ တူၵ်းသႂ်ႇႁႅင်းၵၢၼ်တႆး လူႉတၢႆၵေႃႉၼိုင်ႈ

ဝၼ်းတီႈ 31 လိူၼ်မေႊ ယၢမ်းဝၢႆးဝၼ်း 5 မူင်း ၵိင်ႇႁႅင်ႈတူၼ်ႈမႆႉယၢင်းလူင် တီႈဝဵင်းသႃရၽီး ဢိူင်ႇၼွင်ၽိုင်ႈဝဵင်းၵဵင်းမႂ်ႇ ၸိုင်ႈထႆးၼၼ်ႉ တူၵ်းသႂ်ႇၵူၼ်း ၵေႃႉၼိုင်ႈ လူႉတၢႆ ၊ပဵၼ်ႁႅင်းၵၢၼ်ယၢၼ်မိူင်းဢႃယု 37 ပီ ၸိုဝ်ႈႁွင်ႉၸၢႆးတႃး ။ မၼ်းၸၢႆးပဵၼ်ၵူၼ်းႁဵတ်းၵၢၼ်ႁပ်ႉၸၢင်ႈ ၵူႈလွင်ႈလွင်ႈ။

 ၶၢဝ်ႇထႆး ၵဵင်းမႂ်ႇၼိဝ်းသ်ဢွၵ်ႇဝႆႉဝႃႈ မၼ်းၸၢႆး ယူႇၼႂ်းဝၢၼ်ႈ ၼမ်ႉၽိုင်ႈဝီးလဵတ်ႉၶျ် ၼႂ်းဢိူင်ႇၼွင်ၽိုင်ႈ။ ဝၼ်းၼၼ်ႉ ႁူဝ်ၶမ်ႈ မၼ်းၸၢႆးၶီႇရူတ်ႉၶိူင်ႈ ၵႂႃႇႁႃသိုဝ်ႉၶဝ်ႈၽၵ်း၊ ၽွင်းထိုင်တႂ်ႈတူၼ်ႈမႆႉယၢင်းၼၼ်ႉ ၵိင်ႇမႆႉႁႅင်ႈႁၵ်းတူၵ်းမႅၼ်ႈသႂ်ႇ  မၼ်းၸၢႆးတိုၵ်ႉၶီႇရူတ်ႉမႃးၼၼ်ႉလီလီ။ ရူတ်ႉၶိူင်ႈပိၼ်ႈလူမ်ႉပိဝ်ၵႂႃႇ ၽႃႇသႂ်ႇပၢႆႉ လၢၼ်ႉၶၢႆယႃႈယႃ။ တူဝ်မၼ်းၸၢႆးတႄႉ ၵိင်ႇမႆႉႁႅင်ႈတဵင်သႂ်ႇလႄႈ လိူတ်ႈဢွၵ်ႇၸွမ်းႁူးႁူ ႁူးၶူႈလင်။ ၵူၼ်းႁိမ်းႁွမ်းမႃးၸွႆႈ ၽွင်းၼၼ်ႉမၼ်းၸၢႆး ယင်းတိုၵ်ႉတွပ်ႇလၢတ်ႈၶေႃႈထၢမ်ဢၼ်ၵူၼ်းမႃးၸွႆႈ ၸိူဝ်းၼၼ်ႉယူႇ ဝႃႈၼႆ။

ဝၢႆးလင် ၸဝ်ႈၼႃႈတီႈၾၢႆႇၸွႆႈထႅမ်မႃးဢဝ်တူဝ်မၼ်းၸၢႆးသူင်ႇႁူင်းယႃ မၼ်းၸၢႆးလႆႈလူႉတၢႆၵႂႃႇ တီႈႁူင်းယႃ ရတ်ႉၶျဝဵတ်ႉ။ လႆႈႁူႉဝႃႈ မၼ်းၸၢႆးမီးၼႃႈႁိူၼ်း လႄႈမီးလုၵ်ႈလဵၵ်ႉဝႆႉၵေႃႉၼိုင်ႈ။ ၾၢႆႇပလိၵ်ႈလႄႈ ၶွမ်ႊပၼီႊ ပရၵၼ်ရူတ်ႉ ၶိုင်ပွင်တႃႇၸွႆႈထႅမ်ၶိုၼ်းလုၵ်ႈမေးၸိူဝ်းၵိုတ်းဝႆႉတၢင်းလင် ဝႃႈၼႆ။

တူၼ်ႈမႆႉယၢင်းလူင်ၸိူဝ်းၼႆႉဢႃယုႁိုင်ၼၢၼ်းၼပ်ႉပၢၵ်ႇပီယဝ်ႉ။ ၵိင်ႇမႆႉႁႅင်ႈၵႆႉလူၼ်ႇတူၵ်းသႂ်ႇၵူၼ်းၵႂႃႇမႃး ၸွမ်း တၢင်းၵူႈပီ။ ၵွပ်ႈၼႆလႄႈ ၵွၼ်ႇလူမ်းလႅင်ႉတေၶဝ်ႈ ၽွင်းသွင်သၢမ်လိူၼ်ပူၼ်ႉမႃး ၸဝ်ႈၼႃႈတီႈၾၢႆႇလိူမ်ႈလႆႇ ၸႄႈဝဵင်း  လူင်းပိုၼ်ႉတီႈ ဢဝ်ၵိင်ႇမႆႉဢၼ်ၸၢင်ႈတူၵ်းၼၼ်ႉဢွၵ်ႇပႅတ်ႈယဝ်ႉႁွပ်ႈၼိုင်ႈ။

ၽွင်းၵိင်ႇမႆႉတူၵ်းသႂ်ႇၸၢႆးတႃး ၼႆႉတႄႉ ဢမ်ႇမီးလူမ်းဢမ်ႇမီးၾူၼ်သင်။ ယူႇယူႇၵိင်ႇမႆႉၵေႃႈတူၵ်းမႃးႁင်းၵူၺ်း မၼ်းၵူၺ်း ဝႃႈၼႆ။

ပူၼ်ႉမႃးႁၢင်ပီ ပီၵၢႆၼႆႉၵေႃႈ 3 ၵေႃႉမႄႈလုၵ်ႈ ၵႂႃႇႁပ်ႉၵၼ်တီႈႁူင်းႁဵၼ်းသေ ၶီႇရူတ်ႉၶိူင်ႈ ပွၵ်ႈႁိူၼ်း၊ ၽွင်းထိုင်တီႈ ထႅဝ်တူၼ်ႈမႆႉယၢင်းၼၼ်ႉ ၵိင်ႇမႆႉတူၵ်းသႂ်ႇ၊ လုၵ်ႈယိင်းၵေႃႉယႂ်ႇဢၼ်ၶီႇသွၼ်ႉမႃးတၢင်းလင်သုတ်း ၼၼ်ႉမၢတ်ႇၸဵပ်းႁၢဝ်ႈႁႅင်း ၵူၺ်းၵႃႈ ဢမ်ႇထိုင်တီႈတၢႆ။ ၵေႃႉပဵၼ်မႄႈလႄႈလုၵ်ႈၵေႃႉလဵၵ်ႉတႄႉဢမ်ႇမၢတ်ႇၸဵပ်းသင်။ 

(Source: Chiangmai News)