ဝၼ်းတီႈ 31/5/2023 ယၢမ်းဝၢႆးဝၼ်း 2 မူင်းပၢႆ လုၵ်ႈဢွၼ်ႇ ပွၵ်ႉၼမ်ႉတူႈ ( ပဵၼ်ပွၵ်ႉၶႃႈႁၢပ်ႇၵၢၼ်ၶုၼ် ) ၼႂ်းၸႄႈဝဵင်း ၼမ်ႉတူႈ ဢွၼ်ၵၼ်ၵႂႃႇ လဵၼ်ႈလုၺ်းၼမ်ႉတီႈတႃႈၼမ်ႉ ႁိမ်းဝၢၼ်ႈသေ ၸူမ်ၼမ်ႉ တၢႆၵႂႃႇ 2 ၵေႃႉ။
ၵူၼ်းၼႂ်းပိုၼ်ႉတီႈ ဝဵင်းၼမ်ႉတူႈၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “ ၸႂ်ႈဢေႃႈ ၼႂ်းဝၢၼ်ႈၶဝ်သမ်ႉ မီးပၢင်မႃႇသႃႇ ဝႆႉတီႈၼိုင်ႈၼႆ။ မိူဝ်ႈပိူၼ်ႈပႆႇပူၼ်ႉၵူၼ်းတၢႆၼၼ်ႉ လုၵ်ႈဢွၼ်ႇၸိူဝ်းၼႆႉသမ်ႉ ဢွၼ်ၵၼ်ၵႂႃႇဢၢပ်ႇၼမ်ႉလုၺ်းၼမ်ႉ ႁေလႄႈ ၸူမ်ၼမ်ႉ။ ၶဝ်တေၵႂႃႇလဵၼ်ႈၼမ်ႉမွၵ်ႈလၢႆၵေႃႉ ဢမ်ႇႁူႉၼင်ႇၵဝ်ႇ။ တႃႇသၢမ်ၵေႃႉၼႆႉ ၵိုင်ႉၵၢင်ႉ ၸူမ်ၼမ်ႉ ၼႆဢေႃႈ။ မႅၼ်ႈမိူဝ်ႈၵူၼ်းဝၢၼ်ႈၶဝ်ၵႂႃႇလွႆးၶူဝ်းလႄႈ တၼ်းႁၼ်ယူႇ ။ ၵူၺ်းၼႃႇ ၸွႆႈလႆႈၵေႃႉလဵဝ်ၵူၺ်း တႃႇသွင်ၵေႃႉ ၼၼ်ႉ ၸွႆႈဢမ်ႇတၼ်းသေ တၢႆပႅတ်ႈဢေႃႈ” – ဝႃႈၼႆ။
လုၵ်ႈဢွၼ်ႇသွင်ၵေႃႉ ဢၼ်ၸူမ်ၼမ်ႉတၢႆၵႂႃႇၼႆႉ ပဵၼ်ဢွၼ်ႇယိင်း ဢႃယု ပႆႇတဵမ် 18 ပီ ။ ၸိုဝ်ႈ ပၢၼ်းဢိလၢႆႇ ဢႃယု 14 ပီ တိုၵ်ႉၶိုၼ်ႈႁဵၼ်းဝႆႉ ၸၼ်ႉ 8 လႄႈ ၶိၼ်ႇယူႇပႃႇၵျေႃႇ ဢႃယု 16 ပီ တိုၵ်ႉၶိုၼ်ႈႁဵၼ်းဝႆႉ ၸၼ်ႉ 10 ၼႆယဝ်ႉ။
ၵူၼ်းၼႂ်းပိုၼ်ႉတီႈ ဝဵင်းၼမ်ႉတူႈၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “ တီႈၶဝ်ၸူမ်ၼမ်ႉ ၼမ်ႉၼၼ်ႉ ဢမ်ႇသူႈ ငိၼ်းဝႃႈ မီးၵူၼ်းၸူမ်ၼႃ။ ၾၢႆႇတႂ်ႈၼၼ်ႉဢိတ်းၼိုင်ႈတႄႉ ယၢမ်ႈငိၼ်းဢေႃႈ ၵႃးလမ်းၼိုင်ႈ သဵၼ်တူၵ်းလႄႈ ၵူၼ်းတၢႆၼႆ ။ တီႈလုၵ်ႈဢွၼ်ႇၸူမ်ၼမ်ႉၼႆႉ မၼ်းပဵၼ်တီႈဢၼ် ၵူၼ်းဝၢၼ်ႈၶဝ် ၵႂႃႇဢၢပ်ႇၼမ်ႉ လွႆးၶူဝ်းၵူၺ်း။ တေၵႆၵၼ်တၢင်းဝဵင်းၼမ်ႉတူႈ မွၵ်ႈ 1 လၵ်းပၢႆၼႆႉၵူၺ်းဢေႃႈ” – ဝႃႈၼႆ။
ၼင်ႇႁိုဝ် တေဢမ်ႇလႆႈမီးလုၵ်ႈဢွၼ်ႇၸူမ်ၼမ်ႉလူႉတၢႆ ၸိူင်ႉၼႆထႅင်ႈၼၼ်ႉ ယူႇတီႈ ၽူႈၵွၼ်းပွၵ်ႉ သင်ႇလၢတ်ႈဝႃႈ – “ ပေႃးဢမ်ႇမီး ပေႃႈမႄႈၽူႈယႂ်ႇၵူၼ်းလူင်ၵႂႃႇသူင်ႇၼႆ လုၵ်ႈဢွၼ်ႇၵေႃႉလႂ်ၵေႃႈယဝ်ႉ တေဢမ်ႇလႆႈ လူင်းလုၺ်းၼမ်ႉ၊ ဢၢပ်ႇၼမ်ႉ တီႈၼမ်ႉႁွင်ႈ ၊ တီႈၵႄးၼမ်ႉ တီႈဢၼ်ၼမ်ႉၸႅဝ်ႈ ၼမ်ႉလိုၵ်ႉၸိူဝ်းၼၼ်ႉ” – ဝႃႈၼႆ။
မိူဝ်ႈဝၼ်းတီႈ 12/5/2023 ၼၼ်ႉၵေႃႉ ၵူၼ်းမိူင်းၼမ်ႉတူႈ ၸူဝ်းၵၼ်ၵႂႃႇႁႃႁွႆ တီႈၼမ်ႉႁွင်ႈတၢတ်ႇ( ပိတ်ကလေးချောင်း)သေ သွင်ၽူဝ်မေး ၵူႈၼိုင်ႈ ၸူမ်ၼမ်ႉလူ့တၢႆ ၼင်ႇၵဝ်ႇ။
 ၼႂ်းၸႄႈဝဵင်း ၼမ်ႉတူႈ ဢွၼ်ၵၼ်ၵႂႃႇ လဵၼ်ႈလုၺ်းၼမ်ႉတီႈတႃႈၼမ်ႉ ႁိမ်းဝၢၼ်ႈသေ ၸူမ်ၼမ်ႉ တၢႆၵႂႃႇ 2 ၵေႃႉ။){kind=link}