သိုၵ်းမၢၼ်ႈ ထႅမ်ႁႅင်းသိုၵ်းတူင်ႉၼိုင် ပိၵ်ႉဢိုတ်းသဵၼ်ႈတၢင်း တီႈဝၢၼ်ႈသၢင်း ၾၢႆႇဢွၵ်ႇဝဵင်းလၢႆးၶႃႈ မီးၶၢဝ်းတၢင်း 2-3 ဝၼ်းယဝ်ႉ ႁၢမ်ႈၵူၼ်းမိူင်း ၶဝ်ႈဢွၵ်ႇၵႂႃႇမႃး ႁဵတ်းႁႂ်ႈၵူၼ်းမိူင်းယၢပ်ႇၽိုတ်ႇၵၢၼ်ႁႃၵိၼ်လဵင်ႉတွင်ႉ။
တႄႇဢဝ် ဝၼ်းတီႈ 29/5/2023 ၼႆႉမႃး ၶွင်ႇသီႇသိုၵ်းမၢၼ်ႈ ယိုတ်းမိူင်း ပိၵ်ႉဢိုတ်းသဵၼ်ႈတၢင်း တီႈဝၢၼ်ႈသၢင်း ဢိူင်ႇဝၢၼ်ႈ သၢင်း တၢင်းၾၢႆႇဢွၵ်ႇဝဵင်းလၢႆးၶႃႈ ၸႄႈတွၼ်ႈလွႆလႅမ် ၸိုင်ႈတႆးပွတ်းၸၢၼ်းသေ ႁၢမ်ႈၵူၼ်းမိူင်းၵႂႃႇမႃး တီႈၼိူဝ်သဵၼ်ႈ တၢင်းၼၼ်ႉ မီးၶၢဝ်းတၢင်း 2-3 ဝၼ်းယဝ်ႉ ဝႃႈၼႆ။
ၵူၼ်း ဝဵင်းလၢႆးၶႃႈ လၢတ်ႈတီႈၽူႈတွႆႇႁွၵ်ႈဝႃႈ – “ သိုၵ်းမၢၼ်ႈပႂ်ႉဝႆႉတီႈတၢင်းၶဝ်ႈဝၢၼ်ႈသၢင်း ဢဵၼ်ႁႅင်းမွၵ်ႈ 4-5 ၵေႃႉ ၵူတ်ႇထတ်ၵူၼ်းၶဝ်ႈ/ဢွၵ်ႇ ဝၢၼ်ႈ။ တီႈ ႁူင်းႁဵၼ်း ၼႂ်းဝၢၼ်ႈသမ်ႉမီးဢဵၼ်ႁႅင်းထႅင်ႈမွၵ်ႈ 20-30 ၼႆႉ။ ၵူၼ်းၸိူဝ်းလုၵ်ႉတၢင်းဝဵင်းသေ တေၶဝ်ႈ ဝၢၼ်ႈသၢင်းၼႆႉ ၶဝ်ဢမ်ႇပၼ်ၶဝ်ႈ။ ၵူၺ်းၵႃႈ ပေႃးလုၵ်ႉတၢင်းဝၢၼ်ႈသေ တေဢွၵ်ႇၵႂႃႇတၢင်းဝဵင်းသမ်ႉ ပၼ်ၵႂႃႇယူႇ။ ယွၼ်ႉသင်လႄႈ ႁၢမ်ႈႁႄႉ ၸိူင်ႉၼၼ်ႉတႄႉ ႁဝ်း ၶႃႈဢမ်ႇႁူႉ”- ဝႃႈၼႆ။
ဝၢၼ်ႈသၢင်းၼႆႉ ယူႇၼႂ်းဢိူင်ႇဝၢၼ်ႈသၢင်း မီးၾၢႆႇဢွၵ်ႇဝဵင်းလၢႆးၶႃႈ တေယၢၼ်ဝဵင်းမွၵ်ႈ 4 လၵ်း သဵၼ်ႈတၢင်းၼႆႉသမ်ႉ တေပဵၼ်သဵၼ်ႈတၢင်း လၢႆးၶႃႈ – ၶူဝ်လမ် ၵၢႆႇၸူးၵၼ်ၵမ်းသိုဝ်ႈ။ ယၢမ်းလဵဝ် ၸွမ်းသဵၼ်ႈတႃႈသၢႆတၢင်းၼႆႉ သိုၵ်း မၢၼ်ႈ ထႅမ်ႁႅင်းသိုၵ်း တူင်ႉၼိုင်ယူႇဝႆႉ တင်းၼမ်။
“သဵၼ်ႈတၢင်းၼႆႉ လုၵ်ႉလၢႆးၶႃႈ ပွင်ႇထိုင်ၶူဝ်လမ် ၵမ်းလဵဝ်။ တေႃႈလဵဝ် ၾၢႆႇၽွင်းငမ်းဝၢၼ်ႈဝဵင်းၶဝ်တိုၵ်ႉသိူဝ်ႇတၢင်းယၢင်ဝႆႉယူႇ။ သဵၼ်ႈ တၢင်းၼႆႉ တေလတ်းၽၢၼ်ႇ ဢိူင်ႇဝၢၼ်ႈသၢင်း၊ ၼွင်ၵေႃႈ၊ ႁၢႆးသႅင်၊ ၼမ်ႉႁူး၊ ၼႃးပွႆး ၸိူဝ်းၼႆႉ။ ယၢမ်းလဵဝ် သဵၼ်ႈတၢင်းသၢႆ ၼၼ်ႉ ၸဵမ်သိုၵ်းမၢၼ်ႈ၊ သိုၵ်းတႆး SSPP – RCSS ၊ သိုၵ်းဝႃႉ ဢၼ်သႂ်ႇၶူဝ်း SSPP ၊ ပျီႇတူႉၸိတ်ႉမၢၵ်ႇၵႅင်း၊ ပျီႇတူႉၸိတ်ႉ ၼႃးယႆး၊ ပျီႇတူႉၸိတ်ႉမၢၼ်ႈပၢင်ႇ 758 ၸိူဝ်းၼႆႉ တူင်ႉၼိုင် ယူႇဝႆႉတင်းၼမ် ”- ၵူၼ်းပိုၼ်ႉတီႈ ဝဵင်းလၢႆးၶႃႈ သိုပ်ႇလၢတ်ႈ ၼႄၼင်ႇၼႆ။
ပူၼ်ႉမႃး ၶၢဝ်းတၢင်း 2-3 ဝၼ်းၼႆႉ ၽူႈၵွၼ်းတိူင်းသိုၵ်းမၢၼ်ႈ ၶူဝ်လမ် လၢတ်ႈတီႈသိုၵ်းတႆး သွင်ၸုမ်းၼႆႉဝႃႈ တၢင်းပွတ်းတွၼ်ႈၼႆႉ ယႃႇႁႂ်ႈမီးပၢင်တိုၵ်းၵၼ်ၼႆသေ ဝၢႆးၼၼ်ႉယဝ်ႉ သိုၵ်းမၢၼ်ႈ သူင်ႇႁႅင်းသိုၵ်း ၶဝ်ႈမႃးတူင်ႉၼိုင် ၸွမ်းသဵၼ်ႈတၢင်း လၢႆးၶႃႈ – ၶူဝ်လမ်ၼႆႉ တင်းၼမ်လၢႆ ၽူႈတူင်ႉၼိုင်ၵၢၼ်သိုၵ်း တၢင်းၾၢႆႇဝဵင်းလၢႆးၶႃႈ လၢတ်ႈတီႈၽူႈတွႆႇႁွၵ်ႈၼင်ႇၼႆ။
ၼွၵ်ႈလိူဝ်ၼၼ်ႉ မိူဝ်ႈဝၼ်းတီႈ 29 – 30 ယၢမ်းၵၢင်ၶမ်ႈ 7-8 မူင်းၼႆႉ သိုၵ်းမၢၼ်ႈ ဢဝ်ၶိူင်ႈမိၼ်တိုၵ်း မႃးပၼ်ႇလဵပ်တၢင်း ၾၢႆႇဢွၵ်ႇဝဵင်းလၢႆးၶႃႈၼႆႉ မီးမႃးၶၢဝ်းတၢင်း 2 ဝၼ်းထပ်းၵၼ်ယဝ်ႉ ဝႃႈၼႆ။
ယၢမ်းလဵဝ် ၵူၼ်းပိုၼ်ႉတီႈ တၢင်းၾၢႆႇဢွၵ်ႇဝဵင်းလၢႆးၶႃႈ ၸိူဝ်းၼၼ်ႉ ဢွၼ်ၵၼ်ပၢႆႈၶဝ်ႈမိူင်းထႆးၼမ် မၢင်ၸိူဝ်း ပွႆႇႁိူၼ်းယေး သူၼ်ႁႆႈၼႃးႁၢမ်းသေပၢႆႈ။ မၢင်ၸိူဝ်း သိုဝ်ႉဝႆႉၸိူဝ်ႉၾၼ်း တႃႇၽုၵ်ႇသွမ်ႈ ၸိူဝ်းၼႆႉၵေႃႈ ဢဝ်သူင်ႇၶိုၼ်းၸဝ်ႈၶွင်မၼ်းတင်းၼမ် သေ ပၢႆႈၶဝ်ႈမိူင်းထႆး ၸဵမ်ၸိူဝ်းၼႆႉ။
တၢင်းၾၢႆႇဢွၵ်ႇဝဵင်းလၢႆးၶႃႈၼႆႉ တႄႇဢဝ် ဝၼ်းတီႈ 11/4/2023 ၼၼ်ႉမႃး တေႃႇထိုင်ယၢမ်းလဵဝ် သဵင်ၵွင်ႈယင်းပႆႇယဵၼ် တိုၵ်ႉတႅၵ်ႇယူႇ ပဵၼ်ပွၵ်ႈပဵၼ်ၵမ်း ယွၼ်ႉသိုၵ်း RCSS တင်း SSPP ပိုတ်းယိုဝ်းၵၼ်မႃးႁၢဝ်ႈႁႅင်း ႁဵတ်းႁႂ်ႈၵူၼ်းမိူင်းပၢႆႈၽေး သိုၵ်း ဢမ်ႇယွမ်းႁဵင် ဢွၼ်ၵၼ်ပၢႆႈသွၼ်ႈၸွမ်းဝတ်ႉမုၼ်ၸဝ်ႈလႄႈ ႁိူၼ်းယေးပီႈၼွင်ႉၽႂ်မၼ်း ၼႂ်းဝဵင်း ၸဵမ်ၸိူဝ်းၼႆႉ။
