ၵႃး 12 လေႃႉ တၢင်ႇလိၼ်ပုၼ် (ဘိလပ်မြေ) လမ်းၼိုင်ႈ ၺႃးၽဝ် ၼိူဝ်သဵၼ်ႈတၢင်းလူင် သႅၼ်ဝီ – ၵုၼ်လူင်။

မိူဝ်ႈဝၼ်းတီႈ 26/5/2023 ၼၼ်ႉ ၵႃး 12 လေႃႉ တၢင်ႇလိၼ်ပုၼ် လမ်းၼိုင်ႈ ထုၵ်ႇၽဝ် ၼႂ်းၵႄႈ ဝဵင်းသႅၼ်ဝီ – ဝဵင်းၵုၼ်လူင် ၸိုင်ႈတႆးပွတ်းႁွင်ႇသေ မိူဝ်ႈလဵဝ်ၸဝ်ႈၵႃးႁၢႆဝႆ့  ။

ၸဝ်ႈၵႃး ၼႂ်းပိုၼ့်တီႈၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “ ပဵၼ်ၵႃးတၢင်ႇလိၼ်ပုၼ် လုၵ့်တၢင်းဝဵင်းလိူဝ်ႇ ၶိုၼ်ႈမႃး ၊ ဢၢၼ်းတေတေႃႉသူင်ႇ တီႈဝဵင်းလၢဝ်ႇၵၢႆး ၊ ဝၼ်းၼၼ့် ၸုမ်းယိပ်းၵွင်ႈ ၸုမ်းၼိုင်ႈ မႃးႁႄ့ၵႃးမၼ်းသေ ႁႂ်ႈမၼ်းလူင်းၵႃးယဝ့် ၽဝ်ၵႃးလမ်းၼၼ့် ၊ ၶဝ်လၢတ်ႈဝႃႈပဵၼ် ယွၼ့် ဢမ်ႇသႂ်ႇၶွၼ်ႇပၼ်တီႈၸုမ်းၶဝ် ” – ဝႃႈၼႆ။

ၵဵဝ်ႇၵပ်းလွင်ႈၼႆ့သေ ဢၼ်ၽဝ်ၵႃးတၢင်ႇၵုၼ်ႇၼၼ်ႉ ပဵၼ်ၸုမ်းယိပ်းၵွင်ႈၵၢင်ႇ ၸုမ်းလႂ် ဢၼ်ဝႃႈၼၼ့် ၸုမ်းၶၢဝ်ႇၽူႈတွႆႇႁွၵ်ႈ ပႆႇယိုၼ်ယၼ်လႆႈ။

ၼႂ်းၵႄႈ ဝဵင်းလႃႈသဵဝ်ႈ တေႃႇထိုင် မူႇၸေႊ ၊ ၼမ့်ၶမ်းၼႆ့ မီးဝႆ့ ၸုမ်းယိပ်းၵွင်ႈၵၢင်ႇတၢင်းၼမ် ပႂ့်ၵဵပ်းငိုၼ်း တီႈၸဝ်ႈၵႃး ၵူၼ်းၵႂႃႇမႃး၊ လိူဝ်ၼၼ့် ဢိင်ၼိူဝ် ၵုၼ်ႇၶူဝ်း ဢၼ်တၢင်ႇမႃးၼၼ့်သေ လႆႈသႂၢင်းၶွၼ်ႇပၼ်တီႈ ၸုမ်းယိပ်းၵွင်ႈၵၢင်ႇ လၢႆလၢႆၸုမ်း ၼႆယဝ့်။

တီႈၸိုင်ႈတႆးပွတ်းႁွင်ႇၼႆ့ ၵႃးတၢင်ႇၵုၼ်ႇ ၵႆ့ၺႃး ၸုမ်းယိပ်းၵွင်ႈၵၢင်ႇ ၽဝ်ၵႃး ယႃ့ၵွႆ ၊ မိူဝ်ႈႁူဝ်လိူၼ်မၢတ့်ၶျ် ပူၼ့်မႃးၼႆ့ၵေႃႈ ၵႃးတၢင်ႇၵုၼ်ႇ 2 လမ်း ထုၵ်ႇၽဝ် ၊ ပဵၼ်ၸုမ်းလႂ် ႁွႆးမိုဝ်းၽႂ် ဢၼ်ဝႃႈၼၼ့် ဢမ်ႇမီးၽႂ်ယိုၼ်ယၼ်။

ၼိူဝ်သဵၼ်ႈတၢင်း ၸိုင်ႈတႆးပွတ်းႁွင်ႇၼႆ့ မီးဝႆ့ ၸုမ်းယိပ်းၵွင်ႈၵၢင်ႇလၢႆၸုမ်း မိူၼ်ၼင်ႇ သိုၵ်းတဢၢင်း TNLA ၊ သိုၵ်းၶၢင် KIA ၊ သိုၵ်းၵဝ်ႈၵၢင့် MNDAA ၊ သိုၵ်းတႆး SSPP ၊ ဢိၵ်ႇပႃး သိုၵ်းမၢၼ်ႈယိုတ်းမိူင်းလႄႈ ၸုမ်းပျီႇတူ့သိတ့် ၸိူဝ်းၼႆ့တူင့်ၼိုင်ၵႂႃႇမႃးဝႆ့။