ၵူၼ်းမိူင်း ၼႂ်းဢိူင်ႇမိူင်းၸီး ၸႄႈဝဵင်းၵူတ်ႉၶၢႆ ဢမ်ႇၸၢင်ႈႁဵတ်းသူၼ်ႁဵတ်းၼႃး ယွၼ်ႉပိူဝ်ႈၸုမ်းယိပ်းၵွင်ႈၵၢင်ႇ ၶဵင်ႈၶႅင်ၵၢၼ်သိုၵ်းတေႃႇၵၼ်သေဢမ်ႇၵႃး ၵဵပ်းသိုၵ်း ၵဵပ်းၶွၼ်ႇတီႈၵူၼ်းမိူင်းဢမ်ႇထၢတ်ႇ -ႁဵတ်းႁႂ်ႈၵူၼ်းမိူင်းလႆႈပၢႆႈၵႂႃႇႁဵတ်းၵၢၼ်တၢင်းမိူင်းၶႄႇ မိူင်းထႆးၼမ်။
တႄႇဢဝ် ပီ 2022 ၼၼ်ႉမႃးတေႃႇထိုင်ယၢမ်းလဵဝ် 2023 ၼႆႉ ၵူၼ်းဝၢၼ်ႈ ၼႂ်းဢိူင်ႇမိူင်းၸီး ၸႄႈဝဵင်းၵူတ်ႉၶၢႆ ၸႄႈတွၼ်ႈမူႇၸေႊ ၸိုင်ႈတႆး ပွတ်းႁွင်ႇ ဢွၼ်ၵၼ်ပွႆႇၼႃးႁၢမ်းပႅတ်ႈ ဢမ်ႇယွမ်း 20 ဢေႊၶိူဝ်ႊ ပၼ်ႁႃယႂ်ႇလူင် ဢၼ် ၵူၼ်းပိုၼ်ႉတီႈ ထူပ်းသမ်ႉ ဢမ်ႇမီးၼမ်ႉတႃႇၽုၵ်ႇသွမ်ႈ၊ ၵႃႈၾုၼ်ႇထၢတ်ႈၶိုၼ်ႈႁႅင်းလႄႈ လွင်ႈၸုမ်းယိပ်းၵွင်ႈၵၢင်ႇ ၵဵပ်းသိုၵ်း ၸိူဝ်းၼႆႉၼမ် ႁႅင်းလႄႈ ၵူၼ်းမိူင်းဢမ်ႇၶၢမ်ႇလႆႈ ဢွၼ်ၵၼ်ပၢႆႈ။
ၵူၼ်းပိုၼ်ႉတီႈ ဝဵင်းၵူတ်ႉၶၢႆ လၢတ်ႈတီႈၽူႈတွႆႇႁွၵ်ႈဝႃႈ – “ပဵၼ်ၼႃးလွၼ်ႉလွၼ်ႉၶႃႈယဝ်ႉ ဢၼ်ႁၢမ်းၵႂႃႇၼႆႉ တင်းမူတ်း ဢမ်ႇ ယွမ်း 20 ဢေႊၶိူဝ်ႊ တႄႇဢဝ် ပီ 2022 ၼၼ်ႉမႃး တေႃႇထိုင် ပီ 2023 ၼႆႉ။ ပၼ်ႁႃမၼ်း မီးသၢမ်လွင်ႈ ဢၼ် ၵူၼ်းမိူင်းပၢႆႈ ၼႆႉ 1) ယွၼ်ႉဢမ်ႇမီးၼမ်ႉတႃႇၽုၵ်ႇ၊ 2) ယွၼ်ႉၵႃႈၾုၼ်ႇထၢတ်ႈၶိုၼ်ႈႁႅင်းလႄႈ 3) ယွၼ်ႉ ၵဵပ်းသိုၵ်း ၵဵပ်းၶွၼ်ႇၵေႃႈ ပိူင်ၼိုင်ႈ လႄႈ ၵူၼ်းမိူင်းၼႆႉ ၸင်ႇဢွၼ်ၵၼ်ပၢႆႈ”- ဝႃႈၼႆ။
ပွတ်းတွၼ်ႈၼၼ်ႉ မီးၸုမ်းယိပ်းၵွင်ႈၵၢင်ႇ ၸၢဝ်းၶိူဝ်း တူင်ႉၼိုင် ယူႇဝႆႉၼမ် မိူၼ်ၼင်ႇ သိုၵ်းၶၢင် KIA, သိုၵ်း ၵဝ်ႈၵၢင်ႉ MNDAA, သိုၵ်းတဢၢင်း TNLA, သိုၵ်းတႆး SSPP ၸိူဝ်းၼႆႉ။ပၼ်ႇပုတ်ႈၵၼ် ၵဵပ်းၶွၼ်ႇ ၵဵပ်းသိုၵ်းဢမ်ႇထၢတ်ႇ ႁဵတ်းႁႂ်ႈတုမ်ႉတိူဝ်ႉၵူၼ်းမိူင်း။
တူင်ႈၼႃး ၵူၼ်းဝၢၼ်ႈ ၼႂ်းဢိူင်ႇမိူင်းၸီး ဢၼ်လႆႈႁၢမ်းၵႂႃႇ 20 ဢေႊၶိူဝ်ႊပၢႆၼႆႉ တေပဵၼ် ၶွင်ၵူၼ်းဝၢၼ်ႈပဵင်းၶၢၼ်၊ ဝၢၼ်ႈ ၵုင်းသႃႇ၊ ဝၢၼ်ႈၵွင်းၶမ်းလႄႈ ဢိၵ်ႇထႅင်ႈလၢႆလၢႆဝၢၼ်ႈ ၸဵမ်ၸိူဝ်းၼႆႉ။
“ယၢမ်းလဵဝ် ၽႂ်ၽႂ်ၵေႃႈ ဢွၼ်ၵၼ်မႆႈၸႂ် သူင်ႇလုၵ်ႈလၢင်းၽႂ်မၼ်းပၢႆႈ ၵွပ်ႈၼႆလႄႈ လုၵ်ႈလဵင်ႉၵေႃႈ ဢမ်ႇမီး တႃႇတေ ႁဵတ်းၼႃး။ ယွၼ်ႉဝႃႈ ပေႃးမီးလုၵ်ႈၸၢႆးသမ်ႉ ၵူဝ်လႆႈႁဵတ်းသိုၵ်းၼႆသေ ဢွၼ်ၵၼ်ပၢႆႈ။ ၵမ်ႈၼမ် ၵူၼ်းၵိုတ်းတၢင်းလင် ဢၼ်ယူႇ ပႂ်ႉႁိူၼ်းသမ်ႉ တေပဵၼ်ၵူၼ်းဢႃယု 45 ၶိုၼ်ႈၼိူဝ်လွၼ်ႉလွၼ်ႉယဝ်ႉ။ ၵူၼ်းၼုမ်ႇ ၸဵမ်ၸၢႆးၸဵမ်ယိင်းတႄႉ ဢွၼ်ၵၼ်ပၢႆႈ မူတ်း ယဝ်ႉၶႃႈ” – ၵူၼ်းပိုၼ်ႉတီႈ ဝဵင်းၵူတ်ႉၶၢႆ သိုပ်ႇလၢတ်ႈၼႄၼင်ႇၼႆ။
ၵမ်ႈၼမ် ၵူၼ်းၼုမ်ႇ ဢၼ်ပၢႆႈယူႇၶိူဝ်းယႂ်း ယၢမ်းလဵဝ်ၼႆႉ တေၶဝ်ႈၵႂႃႇႁဵတ်းၵၢၼ် ၼႂ်းမိူင်းၶႄႇ။ လိူဝ်ၼၼ်ႉ ၸွမ်းလႅၼ်လိၼ် တႆး – ၶႄႇ ၊ တႆး – ထႆး ၸိူဝ်းၼၼ်ႉ။ ယဝ်ႉၵေႃႈ ၼႂ်းမိူင်းထႆး ၸဵမ်ၸိူဝ်းၼႆႉ။
ဢိူင်ႇမိူင်းၸီးၼႆႉ တင်းမူတ်းမီး 21 ဝၢၼ်ႈ။ ၼႂ်းၼၼ်ႉ တႃႇဝၢၼ်ႈတႆးမီး 8 ဝၢၼ်ႈ။ ယဝ်ႉၵေႃႈ ယူႇတၢင်းၸဵင်ႇႁွင်ႇဝၼ်းဢွၵ်ႇ ဝဵင်းၵူတ်ႉၶၢႆ ၼႂ်းၵႄႈၵူတ်ႉၶၢႆ – လဝ်ႇၵၢႆး ၼႆယဝ်ႉ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ