ၼုမ်ႇယိင်းဢွၼ်ႇ ၸႄႈဝဵင်းၼမ်ႉတူႈၵေႃႉၼိုင်ႈ ႁၢႆၸမ် 9 လိူၼ်ယဝ်ႉ ထိုင်မိူဝ်ႈလဵဝ် ၵပ်းသိုပ်ႇဢမ်ႇလႆႈ ၵူၼ်းႁိူၼ်းမႆႈၸႂ် ။
ၼၢင်းၶမ်းၵႅဝ်ႈ ဢႃယု 17 ပီ ၵူၼ်းဝၢၼ်ႈသႃႇ ဢိူင်ႇပၢင်လူင် ၸႄႈဝဵင်းၼမ်ႉတူႈ ဢွၵ်ႇႁိူၼ်းၵႂႃႇ ႁဵတ်းၵၢၼ်တီႈၸႄႈဝဵင်းလႃႈသဵဝ်ႈ တၼ်းလႆႈၶၢဝ်းတၢင်း 6 လိူၼ်သေ ႁၢႆၵႂႃႇ ၵူၼ်းႁိူၼ်းဢမ်ႇလႆႈတၢင်းၵပ်းသိုပ်ႇလႄႈ ဢွၼ်ၵၼ်မႆႈၸႂ်ဝႃႈ တၢႆႁိုဝ်လိပ်းၶီးဢမ်ႇလႆႈႁူႉၸွမ်းဝႃႈၼႆ။
ဢူၺ်းၵေႃႉၸမ်ၸႂ်ၼၢင်းၶမ်းၵႅဝ်ႈ လၢတ်ႈတီႈၽူႈတွႆႇႁွၵ်ႈဝႃႈ – “ ၸႂ်ႈယဝ်ႉ မၼ်းၵႂႃႇႁဵတ်းၵၢၼ်တီႈလႃႈသဵဝ်ႈ ၸဵမ်မိူဝ်ႈ လိူၼ်ထူၼ်ႈ 4 ပီၵၢႆပုၼ်ႉဢေႃႈၼၼ်ႉ ။ ၵူၺ်းၵႃႈ ၵႂႃႇယူႇမွၵ်ႈ 5လိူၼ်6လိူၼ်ၼႆႉႁေၵေႃႈ ႁၢႆၵႂႃႇ ၵပ်းသိုပ်ႇႁႃ ဢမ်ႇလႆႈ ။ ၾဵတ်ႉပုၵ်ႉမၼ်း ၾူၼ်းမၼ်းၸိူဝ်းၼႆႉ တိုၼ်းဝႃႈ ၵပ်းႁႃဢမ်ႇလႆႈသေဢၼ်ၼၼ်ႉယဝ်ႉ။ ၵူၼ်းတီႈႁိူၼ်းမၼ်းၵေႃႈ ဢွၼ်ၵၼ်မႆႈၸႂ်ပဵၼ်တေႉပဵၼ်ဝႃႈၶႃႈယဝ်ႉၼၼ်ႉ။ ဝႃႈတႄႉ မၼ်းၵႂႃႇႁဵတ်းၵၢၼ်တီႈ ႁူင်းယႃ ဢၼ်ၼိုင်ႈ တီႈဝဵင်းလႃႈသဵဝ်ႈ ဝၢႆးမႃးသမ်ႉ ႁွတ်ႈၵႂႃႇတီႈလႂ်သေဢမ်ႇႁူႉၶႃႈယဝ်ႉ” – ဝႃႈၼႆ။
တေႃႇထိုင်ယၢမ်းလဵဝ် ၵူၼ်းႁိူၼ်းလႄႈဢူၺ်းၵေႃႉ ဢမ်ႇၸၢင်ႈတိတ်းတေႃႇႁႃတီႈလႂ်။ သိုၵ်းမၢၼ်ႈယိုတ်းမိူင်း မႃးၶၢဝ်း တၢင်း 2 ပီၼႆႉ ၵူၼ်းၼုမ်ႇ ႁၢမ်းၵၢၼ်ႁဵတ်းလႄႈၵၢၼ်ႁဵၼ်း။ ပၢႆးမၢၵ်ႈမီးတူၵ်း ဢမ်ႇမီးငိုၼ်းၶဝ်ႈလႄႈ ၵူၼ်းၼုမ်ႇသႅၼ်း ႁုၼ်ႈမႂ်ႇ လႆႈၵႂႃႇႁႃၵၢၼ်ႁႃငၢၼ်းတၢင်းလႅၼ်လိၼ်ၶႄႇ လႅၼ်လိၼ်ထႆး။ ၵမ်ႈၽွင်ႈ ၺႃးၵဝ်းလႅၼ်ၵႂႃႇၶၢႆၵိၼ် ၵေႃႈမီး။ ၵူၼ်းၼုမ်ႇမိူင်းတႆးၵေႃႈၵမ်းၵမ်းႁၢႆ ။
ဢူၺ်းၵေႃႉမၼ်းၼၢင်း သိုပ်ႇလၢတ်ႈတီႈၽူႈတွႆႇႁွၵ်ႈဝႃႈ-“ ၼႃႉၶဝ်ဝႃႈတႄႉ မၼ်းတေၶၢႆႉၵၢၼ်ၼႆၵေႃႈ ဢမ်ႇလၢတ်ႈ ဢမ်ႇငိၼ်းဝႃႈႁိုဝ်ၼႆဢေႃႈ။ ၵပ်းသိုပ်ႇႁႃဢမ်ႇလႆႈၸိူင်ႉၼႆ ဢွၼ်ၵၼ်မႆႈၸႂ်။တီႈႁိူၼ်းၼႆႉ တေၵိုတ်းၼွင်ႉယိင်းမၼ်းၵေႃႉၼိုင်ႈ မီးထႅင်ႈ ပူႇ ၊ ၼႃႉမၼ်းႁေဢေႃႈ မႄႈၶဝ်တႄႉ ဢမ်ႇမီးယဝ်ႉ။ၶႃႈၵေႃႈ ဢမ်ႇၸၢင်ႈၸွႆႈသင်ပၼ်ၶဝ်လႆႈ။ၶႃႈသမ်ႉၵႆႉၵႂႃႇလႃႈသဵဝ်ႈလႄႈ ၵူၼ်းတီႈႁိူၼ်းမၼ်း မႃးႁႂ်ႈၶႃႈ ၸွမ်းႁႃၼႆဢေႃႈ ၶႃႈၵေႃႈ လိူဝ်သေ ပိုၼ်ၽၢဝ်ႇႁႃ ဢမ်ႇၸၢင်ႈၵႂႃႇပိုင်ႈၽႂ် ” – ဝႃႈၼႆ။
ၽႂ်ႁၼ်မႅၼ်ႈ ၼၢင်းၶမ်းၵႅဝ်ႈ ၼႆၵေႃႈ ႁႂ်ႈၵပ်းသိုပ်ႇပွင်ႇၶၢဝ်ႇပၼ်လႆႈ တီႈမၢႆၾူၼ်း 09 974 525 530 သေၵမ်း ဢူၺ်းၵေႃႉလႄႈၵူၼ်းႁိူၼ်းလၢတ်ႈၼင်ႇၼႆ။
