မိူဝ်ႈၼႆႉ ဝၼ်းတီႈ 26/5/2023 ယၢမ်းၵၢင်ၼႂ် 7 မူင်းၼၼ်ႉ ၵႃးတင်းရူတ်ႉၶိူင်ႈၽႃႇၵၼ် တုမ်ႉတိူဝ်ႉႁၢဝ်ႈႁႅင်း ႁိမ်းဝတ်ႉဝၢၼ်ႈၼမ်ႉႁူး ဢိူင်ႇၶူဝ်မုင်း ၸႄႈဝဵင်းၵျွၵ်ႉမႄး ၼုမ်ႇၸၢႆး 2 ၵေႃႉ လူႉတၢႆထင်တီႈ။

ၽူႈတူင်ႉၼိုင်ၼႂ်းၸုမ်းၸွႆႈၶႅၵ်ႇလီပၢင်ၸႃႉၼမ်ႉၶူင်းၵေႃႉၼိုင်ႈလၢတ်ႈတီႈၽူႈတွႆႇႁွၵ်ႈဝႃႈ – “ တီႈၼႆၼႆႉ ပိူၼ်ႈဢမ်ႇပေႃးသူႈၽႃႇၵၼ် ။ ယွၼ်ႉၶဝ်ႁေႃႈၽႂ်းၼႃႇၶႃႈယူဝ်ႉ ။ တႃႇၵေႃႉၼိုင်ႈၼႆႉ ႁူဝ်မၼ်းဝၢင်ႈၽၢၵ်ႇလူင်ၵႂႃႇဢေႃႈ။ ႁူဝ်မၼ်းၼိုင်ႈၶိုင်ႈၼႆႉ ဢမ်ႇမီးယဝ်ႉ ဢွၵ်းမၼ်း ပေႃးမၢၵ်ႇမိူဝ်ၵႂႃႇသဵင်မူတ်းဢေႃႈ။ ထႅင်ႈၵေႃႉၼိုင်ႈသမ်ႉ ၶႃႁၢၵ်းႁေ တူၺ်းတႄႉ ႁူဝ်မၼ်းလႅပ်ႈၸဵပ်းတၢင်းၼႂ်းၼေႈ။ တၢႆထင်တီႈတင်းသွင်ၵေႃႉၼၼ်ႉယဝ်ႉ။ တေလႆႈဝႃႈ ၽေးၵိုင်ႉၵၢင်ႉဢၼ်ႁၢဝ်ႈႁႅင်းသေပိူၼ်ႈယဝ်ႉဝႃႈ ဝူင်ႈဝၢင်ႈၼႆႉ ။ မိူဝ်ႈႁဝ်းၵႂႃႇႁွတ်ႈတီႈပုၼ်ႉတႄႉ ပလိၵ်ႈၶဝ်ပေႃးမႃး ထိုင်ဝႆႉယဝ်ႉၶႃႈဢေႃႈ ။ ၶဝ်ပေႃးသိမ်းဝႆႉ မၢႆၾၢင်ၶဝ် ၶိူင်ႈၶူဝ်းၵပ်းတူဝ်ၵူၼ်းတၢႆၸိူဝ်းၼၼ်ႉမူတ်းယဝ်ႉ။ ၶဝ်ၵႂႃႇၸႅတ်ႈတူၺ်းလီလီသေ ၶဝ်ၸင်ႇႁွင်ႉႁဝ်း ၵႂႃႇတေႃႉဢဝ်ၶၢပ်ႈတူဝ်မႃးသူင်ႇပၼ်ႁဵတ်းၼႆၵွႆးဢေႃႈ ဢမ်ႇတၼ်းလႆႈႁူႉၸွမ်းသင် ” – ဝႃႈၼႆ။

ၵူၼ်း 2 ၵေႃႉ ဢၼ်ႉတၢႆၵႂႃႇၼႆႉ ပဵၼ်သႅၼ်းဢႃယု ၼႂ်းၵႄႈ 25-30 လုၵ်ႉဝဵင်းလိူဝ်ႇသေ တေဢၢၼ်းထိုင်ဝဵင်းၵျွၵ်ႉမႄး တင်းသွင်ၵေႃႉ ပဵၼ်ၽေးၵိုင်ႉၵၢင်ႉ တိူဝ်ႉတီႈၵွၵ်းႁူဝ်ႁၢဝ်ႈႁႅင်းသေ ထိုင်တီႈလူႉတၢႆထင်တီႈ။

ၽူႈတူင်ႉၼိုင်ၼႂ်းၸုမ်းၸွႆႈၶႅၵ်ႇလီပၢင်ၸႃႉၼမ်ႉၶူင်းၵေႃႉၼိုင်ႈသိုပ်ႇလၢတ်ႈဝႃႈ – “ ၵူၼ်းႁဝ်းၼႆႉ ၵႃႈၶႂ်ႈပၼ်သတိလူင်ႈၼႃႈၵေႃႈယဝ်ႉ ပေႃးဢမ်ႇပဵၼ်ၼႆမႃးၵေႃႈ ဢမ်ႇႁူႉၵၼ်။တီႈတႄႉမၼ်း ႁဝ်းလူဝ်ႇဝႆႉ သတိယႂ်ႇၼမ်သေ ႁေႃႈရူတ်ႉႁေႃႈၵႃးၶႃႈဢေႃႈ ။ ပေႃးမိူၼ်ၼႆမႃး ၵူၼ်းၵေႃႈ လႆႈလူႉတၢႆ ၵူၼ်းႁေႃႈၵႃးလူင်ၼၼ်ႉၵေႃႈ ဢမ်ႇလႆႈသၢၵ်ႈသႃႇ ။ ယွၼ်ႉၼၼ် ၵူၼ်းမိူင်းႁဝ်းၶႃႈ ၼုမ်ႇႁၢႆးၸၢႆးယိင်းႁဝ်းၶႃႈ ပေႃးႁေႃႈရူတ်ႉၵႂႃႇတႃႈၵႂႃႇတၢင်း ႁႂ်ႈဝႆႉ သတိၵၼ်ၼၵ်းၼႃ ။ ယႃႇႁိပ်ႈယႃႇၼႅတ်ႈ ပေႃးပဵၼ်မႃး ၶႃႁၢၵ်းမိုဝ်းႁၢၵ်းၵေႃႈဢမ်ႇလီ လူႉတၢႆၵႂႃႇၵေႃႈဢမ်ႇလီ ။ မိူင်းၵူၼ်းၼႆႉ ၽႂ်ၵေႃႈတိုၼ်းမီးၵၢၼ်တႃႇႁဵတ်းႁင်းၽႂ်မၼ်းယူႇ ၵူႈၵေႃႉမိူၼ်ၵၼ်ယဝ်ႉ ဢမ်ႇတၢပ်ႈလူဝ်ႇႁိပ်ႈ ထိုင်တီႈသၢႆၸႂ်လူႉသဵင်ႈႁဵတ်းသင်” – ဝႃႈၼႆ။

မိူဝ်ႈဝၼ်းတီႈ 5/5/2023 ၼၼ်ႉၵေႃႈ ၼၢင်းယိင်းၵေႃႉၼိုင်ႈ ၵူၼ်းပွၵ်ႉ 1 ဝဵင်းၵျွၵ်ႉမႄး ၵႂႃႇသူင်ႇၶူဝ်းသေပွၵ်ႈမႃးပဵၼ်ၽေးၵိုင်ႉၵၢင်ႉ ရူတ်ႉၶိူင်ႈလူမ်ႉတီႈၶူဝ်ၼမ်ႉၸၢဝ်းငၢဝ်း  ရူတ်ႉၶိူင်ႈသဵၼ်တူၵ်းၼမ်ႉ မၼ်းၼၢင်းလူႉတၢႆ။

မိူဝ်ႈဝၼ်းတီႈ 2/5/2023 ၼႆႉၵေႃႈ ရူတ်ႉၶိူင်ႈလမ်းၼိုင်ႈ ပဵၼ်ၽေးၵိုင်ႉၵၢင်ႉ လူမ်ႉၼိူဝ်သဵၼ်ႈတၢင်းလူင် လႃႈသဵဝ်ႈ – သႅၼ်ဝီသေ ၽူႈၸၢႆး ၵေႃႉၼိုင်ႈ လႆႈမၢတ်ႇၸဵပ်းႁၢဝ်ႈႁႅင်း။