ပလိၵ်ႈၾၢႆႇၵူတ်ႇထတ်း ၵူၼ်းၶဝ်ႈမိူင်း တီႈဝဵင်းပၢင်ႇသၢႆး ၵဵပ်းငိုၼ်းၵူၼ်းမိူင်းလိူဝ်ႁႅင်း ၽွင်းၵႂႃႇႁဵတ်းမၢႆၾၢင်။
ဝၢႆးသိုၵ်းမၢၼ်ႈယိုတ်းမိူင်းမႃးၼႆႉ ၶႃႈႁၢပ်ႇၵၢၼ်လူင်ပွင်ၸိုင်ႈ ဢၼ်ယူႇတႂ်ႈသိုၵ်းမၢၼ်ႈ ၵိၼ်ၸိၵ်းတွၵ်ႇၸွၵ်း ၼိူဝ်ၵူၼ်းမိူင်းမႃးလၢႆႁွင်ႈၵၢၼ် မိူၼ်ၼင်ႇ ပလိၵ်ႈၾၢႆႇၵူတ်ႇထတ်း ၵူၼ်းၶဝ်ႈမိူင်း ဢၼ်မီးတီႈဝဵင်းပၢင်ႇသၢႆး ၸႄႈတွၼ်ႈမူႇၸေႊၼၼ့်ၵေႃႈ ၵဵပ်းငိုၼ်းလိူဝ် တီႈၵူၼ်းမႃးႁဵတ်းမၢႆၾၢင်။
ၵူၼ်းမိူင်းၼႂ်းပိုၼ်ႉတီႈဝဵင်းပၢင်ႇသၢႆးၵေႃႉၼိုင်ႈလၢတ်ႈတီႈၽူႈတွႆႇႁွၵ်ႈဝႃႈ -“ ယၢမ်းလဵဝ် တီႈပၢင်ႇသၢႆးၼႆႉ လုမ်းဢၼ် ပိုတ်ႇဝႆႉပဵၼ်တၢင်းၵၢၼ်ၼႆမၼ်းဢမ်ႇမီးၶႃႈ ယဝ်ႉၵေႃႈၵူၼ်းၵမ်ႈၼမ်ၼႆႉ ပေႃးၵႂႃႇႁဵတ်းမၢႆၾၢင်ၼႆ ၵႂႃႇဢၢပ်ႈ ပွႆးၸႃး ၵူၺ်း ၶဝ်ဢမ်ႇၵႂႃႇႁဵတ်းႁင်းၵူၺ်းၼၼ်ႉၼႃႇ မိူဝ်ႈလဵဝ်တေႉၶဝ်တေ ဢဝ်လွင်ႈတၢင်း ဝႃႈလူဝ်ႇတၢင်ႇပၼ် တီႈလႃႈသဵဝ်ႈ ၸိူဝ်းၼႆႉဢိူဝ်ႈ ၵႃႈၾၢႆႇမၼ်း ၵႃႈၵႃးမၼ်းၸိူဝ်းၼႆႉ တေလႆႈပၼ် 20000-30000 ၸိူဝ်းၼႆႉ5-6 မိုၼ်ႇၸိူဝ်းၼႆႉၵေႃႈမီး ” – ဝႃႈၼႆ။
ၼွၵ်ႈလိူဝ် လႆႈပၼ်ငိုၼ်းၼမ်ယဝ်ႉ ၵမ်ႈၼမ် ဢမ်ႇလူင်ႉလႅၼ်ႇၵႂၢမ်းမၢၼ်ႈ တႃႇတေၶဝ်ႈဢုပ်ႇ ၼႂ်းလုမ်းၼႂ်းၸႆးလႄႈ တႃႇတေလႆႈမၢႆၾၢင်ၼၼ့် ယင်းလႆႈသဵင်ႈငိုၼ်းပဵၼ်သႅၼ်ၵေႃႈမီးၼႆယဝ်ႉ။
ၵူၼ်းမိူင်းၼႂ်းပိုၼ်ႉတီႈဝဵင်းပၢင်ႇသၢႆးၵေႃႉၼိုင်ႈသိုပ်ႇလၢတ်ႈတီႈၽူႈတွႆႇႁွၵ်ႈဝႃႈ – “ ၵူၼ်းၵမ်ႈၼမ်တႄႉ မၼ်းဢမ်ႇမေႃ လိၵ်ႈမၢၼ်ႈၼၼ်ႉၼႃႇၼေႃႈ ။ ယဝ်ႉၵေႃႈတေပဵၼ်ၶႄႇၵမ်ႈၼမ် မၢင်ၸိူဝ်း ၵေႃႈပဵၼ်တႆးဢိူဝ်ႈ ၶဝ်ၵေႃႈတူၺ်းၵူၼ်းသေ ယွၼ်းၵူၺ်းၶႃႈလူင် မၼ်းဢမ်ႇမီးပိူင်တၢႆ မၢင်ပွၵ်ႈၵေႃႈယွၼ်း 2-3 မိုၼ်ႇ မၢင်ပွၵ်ႈၵေႃႈႁူဝ်သႅၼ်မၼ်းၵေႃႈမီးၶႃႈဢေႃႈ။ ပေႃးပဵၼ်ၵူၼ်းၸၢဝ်းၶိူဝ်းၵႂႃႇႁဵတ်းၵူၺ်းၼႆသဵင်ႈယူႇ 2-3 မိုၼ်ႇ ပေႃးပဵၼ်ၶႄႇသမ်ႉ ပေႃးၵႂႃႇႁဵတ်းၼႆ သဵင်ႈပဵၼ် 4-5 သႅၼ်ၼၼ်ႉၼႃႇ ” – ဝႃႈၼႆ။
တႃႇတေႁဵတ်းမၢႆၾၢင်ၼႆႉ ပလိၵ်ႈၾၢႆႇၵူတ်ႇထတ်း ၵူၼ်းၶဝ်ႈမိူင်း ယွၼ်းငိုၼ်းၵူၼ်းမိူင်းလိူဝ်ႁႅင်း ၽွင်းၵႂႃႇႁဵတ်းမၢႆၾၢင် ၊ Passport ၶၢမ်ႈမိူင်းၸိူဝ်းၼႆ့။ ၼႆႉႁဵတ်းႁႂ်ႈၵူၼ်းမိူင်း ထူပ်းတၢင်းယၢပ်ႇၽိုတ်ႇ ၽွင်းမီးၵၢၼ်လမ်ႇလွင်ႈ တႃႇဢွၵ်ႇတႃႈ ဢွၵ်ႇတၢင်း။
