ၵူၼ်းလၵ်ႉလိူင်ႇၼမ်ဝဵင်းၼမ်ႉၶမ်း ၼႂ်းဝူင်ႈလဵဝ်ယႃႉၽၵ်းတူၶဝ်ႈႁိူၼ်း 3 လင်လၵ်ႉရူတ်ႉၶိူင်ႈၵႂႃႇ 3 လမ်း

ႁိူၼ်းၵူၼ်းမိူင်းဝဵင်းၼမ်ႉၶမ်း 3 လင် ၺႃးၵူၼ်းလၵ်ႉယႃႉၽၵ်းတူႈၶဝ်ႈဝၢင်းသေ လႆႈၵႂႃႇရူတ်ႉၶိူင်ႈ 3 လမ်း။

ၼႂ်းဝူင်ႈၼႆႉ တီႈဝဵင်းၼမ်ႉၶမ်း ၺႃးၽူႈလၵ်ႉၸၵ်ႉၶုတ်ႈ ၶဝ်ႈထိုင်ၼႂ်းဝၢင်းႁိူၼ်းယေးသေ ၶိူင်ႈၶူဝ်းၸႂ်ႉသွႆႈ ႁၢႆပဵၼ်လၢႆႁိူၼ်း မိူၼ်ၼင်ႇၼႂ်းပွၵ်ႉၼိူဝ် ၊ ပွၵ်ႉလူင် ၊ ပွၵ်ႉႁူဝ်ၼွင် ၸဵမ်ၸိူဝ်းၼႆႉ တင်းသဵင်ႈႁိူၼ်း 3 လင်ၺႃးလၵ်ႉ ရူတ်ႉၶိူင်ႈၵႂႃႇ 3 လမ်းၼႆယဝ်ႉ။

ၵူၼ်းၼႂ်းပိုၼ်ႉတီႈဝဵင်းၼမ်ႉၶမ်းၵေႃႉၼိုင်ႈလၢတ်ႈတီႈၽူႈတွႆႇႁွၵ်ႈဝႃႈ – “ ၼႂ်းဝူင်ႈၼႆႉၵူၺ်းဢေႃႈ။ ၵူၼ်းလၵ်ႉၼႆႉ ၶဝ်ႈလၵ်ႉ ၶၢဝ်းၾူၼ်ယႂ်ႇလူမ်းႁႅင်း မိူဝ်ႈၶိုၼ်းလိုၵ်းၼၼ်ႉၼႃႇ ၽႂ်ဢမ်ႇငိၼ်းသဵင်ၶဝ်။ ဢဝ်လႃးလိူဝ်ႈ ယႃႉသေႃးဝၢင်းႁိူၼ်းသေ ၶဝ်ႈလၵ်ႉဢေႃႈ။မၢင်ႁိူၼ်းၵေႃႈ ဢမ်ႇယႃႉသေႃးသေတႃႉ ၶဝ်မီးသေႃးၽုၺ်ႇႁေၵေႃႈ ၶဝ်ႈလႆႈဢေႃႈ။ပႃးၵႂႃႇ ရူတ်ႉၶိူင်ႈ 3 လမ်းၼၼ်ႉၼႃႇ” – ဝႃႈၼႆ။

ရူတ်ႉၶိူင်ႈဢၼ်ၺႃးလၵ်ႉၵႂႃႇၼႆႉ မီးလၢႆသႅၼ်း မိူၼ်ၼင်ႇ ရူတ်ႉၶိူင်ႈ DT လမ်းၼိုင်ႈ ၊ သႅၼ်း သၵုပ်ႉပီႉ SCOOPY လမ်းၼိုင်ႈလႄႈ 125 လမ်းၼိုင်ႈ ၸဵမ်ၸိူဝ်းၼႆႉ။

ၼႂ်းၸႄႈဝဵင်းၼမ်ႉၶမ်းၼႆႉ ယႃမဝ်းၵမ်ၵေႃႈလိူင်ႇၽႄႈ၊ ပၢင်တေႃႇလွင်းၵေႃႈၼမ်ၶိုၼ်ႈမႃးၵူႈဝၼ်းသေဢမ်ႇၵႃး ဢွင်ႈတီႈလဵၼ်ႈၵဵမ်ႊၸိူဝ်းၼႆႉၵေႃႈ ၼမ်ၶိုၼ်ႈမႃးလႄႈ ႁဵတ်းႁႂ်ႈ ၵူၼ်းလၵ်ႉၵူၼ်းၸူၼ်လိူင်ႇၼမ်မႃးသေ ၵူၼ်းမိူင်းဢမ်ႇမီးလွင်ႈႁူမ်ႇလူမ်ႈ။

ၵူၼ်းၼႂ်းပိုၼ်ႉတီႈဝဵင်းၼမ်ႉၶမ်းၵေႃႉၼိုင်ႈသိုပ်ႇလၢတ်ႈဝႃႈ – “ မိူဝ်ႈလဵဝ် ၼမ်ႉၶမ်းႁဝ်းၼႆႉ ဢမ်ႇလႆႈဝၢင်းၸႂ် သေလွင်ႈယဝ်ႉၶႃႈ။တေႃႈၼင်ႇ မီးၽၵ်းတူႈဝၢင်းႁိူၼ်းယူႇၵေႃႈ တၢင်းၺႃး ၵူၼ်းလၵ်ႉသွၵ်ႈတဝ်ႈ။မိူၼ်ၼင်ႇ ရူတ်ႉၶိူင်ႈဝႃႇ ၶူဝ်းႁိူၼ်းၶူဝ်းယေးဝႃႇၼႆ ၵမ်းၵမ်းႁၢႆ ။ၵၢၼ်တေႃႇလွင်း ၵၢၼ်လဵၼ်ႈၵဵမ်ႊ ၸိူဝ်းၼႆႉၵေႃႈ ၼမ်မႃးလႄႈ ၵူၼ်းလၵ်ႉၵူၼ်းၸူၼ်ၵေႃႈ တိုၼ်းၼမ်ၸွမ်းယူႇယဝ်ႉ” – ဝႃႈၼႆ။

တႃႇပိုတ်ႇၽုၺ်ႇလႆႈ ပၢင်တေႃႇလွင်းလႄႈ ပၢင်လဵၼ်ႈၵဵမ်ႊၸိူဝ်းၼႆႉၵေႃႈ လႆႈသႂ်ႇၶွၼ်ႇတီႈ ပျီႇတုၸိတ်ႉ၊ သိုၵ်းမၢၼ်ႈ လႄႈ ၸုမ်းယိပ်းၵွင်ႈၵၢင်ႇၸၢဝ်းၶိူဝ်းၸဵမ်ၸိူဝ်းၼႆႉ ။လိူဝ်ၼၼ်ႉ ၸႄႈဝဵင်းၼမ်ႉၶမ်းၼႆႉ ၽူႈလၵ်ႉၸၵ်ႉၶုတ်ႈ၊ၵူၼ်းႁၢႆႉၵူၼ်းၸူၼ်လိူင်ႇၼမ်မႃးသေတႃႉ ဢမ်ႇမီးၸုမ်းလႂ် ၾၢႆႇလႂ် ဢဝ်ပုၼ်ႈၽွၼ်း လူင်းမိုဝ်းၵူတ်ႇထတ်း ႁႄႉႁၢမ်သင်ပၼ်လႆႈ ၵူၼ်းပိုၼ်ႉတီႈ ဝဵင်းၼမ်ႉၶမ်း ၵေႃႉၼိုင်ႈလၢတ်ႈ။