Friday, May 31, 2024

ၾူၼ်ယႂ်ႇလူမ်းႁႅင်း တုမ်ႉတိူဝ်ႉ မိူင်းတႆးလူႉသုမ်းလၢႆတီႈ

Must read

တႄႇဢဝ် ဝၼ်းတီႈ 12 လိူၼ်မေႊၼႆႉမႃး ၼႂ်းၶၢဝ်းတၢင်းၼိုင်ႈဝူင်ႈၵူၺ်း ၾူၼ်ႁႃႇယႂ်ႇ လူမ်းပတ်ႉႁႅင်းသေ ၸႄႈဝဵင်းၼႂ်းမိူင်းတႆးလၢႆတီႈ မိူၼ်ၼင်ႇ ဝဵင်းတႃႈၶီႈလဵၵ်း ၊ ဝဵင်းတူၼ်ႈတီး ၊ ဝဵင်းၵူတ်ႉၶၢႆ ၊ ဝဵင်းၼမ်ႉသၼ်ႇ ၸဵမ်ၸိူဝ်းၼႆႉ လင်ႁိူၼ်းလူႉၵွႆသေဢမ်ႇၵႃး မၢင်တီႈမီးပႃးၵူၼ်းမၢတ်ႇၸဵပ်းလူႉတၢႆ။

ၸုမ်းၸွႆႈတူင်ႇဝူင်းၵူၼ်းပျၢမ်ႇမၸူဝ်ႇ (ၵူတ်ႉၶၢႆ)လၢတ်ႈတီႈၽူႈတွႆႇႁွၵ်ႈဝႃႈ – “ ယွၼ်ႉႁႅင်း လူမ်းလႅင်ႉမူဝ်ႊၶႃႊ ဢၼ်ပိူၼ်ႈ ပၼ်ၾၢင်ႉယူႇမိူဝ်ႈလဵဝ်ၼၼ်ႉၼႃႇ မိူင်းတႆးႁဝ်းၵေႃႈ လႆႈဝႃႈ ၺႃးၸၢၵ်ႇမၼ်းၸွမ်းၽွင်ႈဢေႃႈ။ မိူၼ်ၼင်ႇ ၵူတ်ႉၶၢႆ ၼႆႉၵေႃႈ တၢင်းဝၢၼ်ႈၼွင် ၼၼ်ႉ လင်ႁိူၼ်းဢၼ်လူႉၵွႆမီးမွၵ်ႈ 6 လင်ၼႆႉဢေႃႈ။ ၵူၼ်းႁိူၼ်းၶဝ် ပေႃးလႆႈပိုင်ႈယူႇၸွမ်း တၢင်ႇႁိူၼ်းဝႆႉဢေႃႈၼၼ်ႉ။ ယဝ်ႉၵေႃႈ တၢင်းဝဵင်းၼမ်ႉသၼ်ႇပုၼ်ႉၵေႃႈ ယွၼ်ႉလူမ်းပတ်ႉႁေ လင်ႁိူၼ်းၵူၼ်းမိူင်း လူႉၵွႆမွၵ်ႈ 10 လင်ပၢႆၼႆႉၼႆလူး။မိူဝ်ႈလဵဝ် ၸုမ်းႁဝ်းတႄႉ ႁၢင်ႈႁႅၼ်းဝႆႉ တႃႇတေၸွႆႈထႅမ်ၵူၼ်းမိူင်းဝႆႉယူႇၶႃႈ။ ၸုမ်းၸွႆႈတူင်ႇၵူၼ်းလၢႆဝဵင်းၵေႃႈ ဢွၼ်ၵၼ်ၵွင်ႉၵၼ်ဝႆႉယူႇ တႃႇတိတ်းတေႃႇၵၼ်ငၢႆႈ တႃႇတေပွင်ႇၶၢဝ်ႇ ပၼ်ၵၼ်ၸိူဝ်းၼႆႉ” – ဝႃႈၼႆ။

- Subscription -

မိူဝ်ႈဝၼ်းတီႈ 13-14/52023 ၼႆႉၵေႃႈ ယွၼ်ႉၾူၼ်ႁႃႇယႂ်ႇလူမ်းလႅင်ႉပတ်ႉသေ တူၼ်ႈမႆႉလူင်လူမ်ႉၽတ်ႉသႂ်ႇ သုမ်ႉဝႆႉ ရူတ်ႉၶိူင်ႈ တီႈႁူင်းယႃလူင်ၸဝ်ႈၸၢမ်ႇထုၼ်း ၸႄႈဝဵင်းတူၼ်ႈတီး ရူတ်ႉၶိူင်ႈလူႉၵွႆ 3 လမ်းလႄႈ မီးၵူၼ်းမၢတ်ႇၸဵပ်း 2 ၵေႃႉ။

ႁွင်ႈၵၢၼ်ၾၢႆႇပႂ်ႉတူၺ်းၾူၼ်လူမ်းဢွၵ်ႇဝႆႉဝႃႈ – “ ၼႂ်းမိူင်းတႆးၼႆႉ တေၺႃးၸၢၵ်ႇ လူမ်းလႅင်ႉမူဝ်ႊၶႃႊၶဝ်ႈထိုင်သေ ႁႅင်းလူမ်းၼႆႉ ၼိုင်ႈၸူဝ်ႈမူင်းလႂ် ႁွတ်ႈထိုင်လႆႈ 40 လၵ်း” – ဝႃႈၼႆ။

မိူၼ်ၼင်ႇ ဝၼ်းတီႈ 14/5/2023 ၼႆႉၵေႃႈ ၾူၼ်လူင်လူမ်းႁႅင်းလႄႈ ၵွင်လိၼ်လူင် ၵူၼ်ႇပင်းတဵင်သႂ်ႇ ႁိူၼ်းလင်ၼိုင်ႈ တီႈပွၵ်ႉသၼ်သၢႆး (ၶ) ၸႄႈဝဵင်းတႃႈꧠီႈလဵၵ်း 2 ၵေႃႉၽူဝ်မေး  တၢႆၶမ် ၵွင်လိၼ်။ဝၼ်းၼၼ်ႉၵူၺ်းၼင်ႇၵဝ်ႇ ယွၼ်ႉၽူၼ်လူမ်းႁႅင်းသေ တူၼ်ႈမႆႉ လူမ်ႉတဵင်သုမ်ႉပႂ်ႉၵိၼ်းပလိၵ်ႈ(အနီးစခန်း) တီႈႁိမ်းပွၵ်ႉလူင် 17  ၸႄႈဝဵင်းပၢင်ႁူႈ ၊ ပလိၵ်ႈမၢၼ်ႈၵေႃႉၼိုင်ႈ တၢႆထင်တီႈ။

ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ

- Subscription -
- SHAN's Apps -spot_img

ၶၢဝ်ႇလိုၼ်းသုတ်း