မိူဝ်ႈၼႆႉ ဝၼ်းတီႈ 15/5/2023 ယၢမ်းႁူဝ်ၶမ်ႈ 3 မူင်းၼၼ်ႉ ထူပ်းႁၼ်တူဝ်တၢႆၵူၼ်းၸၢႆးၵေႃႉၼိုင်ႈ ႁိမ်းဝၢၼ်ႈပဵင်းဢွႆႈ ၼႂ်းပွၵ်ႉ 3 ၸႄႈဝဵင်းသႅၼ်ဝီ။
ၽူႈၶဝ်ႈၸုမ်းၸွႆႈတူင်ႇဝူင်းၵူၼ်းသႅၼ်ဝီ(အနိုင်းမဲ့)ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ -“ ၸႂ်ႈယဝ်ႉ ၵူၼ်းဝၢၼ်ႈၶဝ်လၢတ်ႈတႄႉ ပဵၼ်ၵူၼ်းမႃး ၵိၼ်ၸၢင်ႈပႂ်ႉသူၼ်ပိူၼ်ႈၼႆဝႃႈ မီးလုၵ်ႈမီးမေးယူႇၼႆဝႃႈ။တူၺ်းတႄႉ လႅပ်ႈပဵၼ်ၶီႈယႃႈၶီႈၾိၼ်ႇၵူၺ်းၼင်ႇၵဝ်ႇ။ၵူၼ်းဢၼ်မႃးပွင်ႇၶၢဝ်ႇ ပၼ်ႁဝ်းၼၼ်ႉၵေႃႈ ပဵၼ်ၵူၼ်းမဵဝ်းၼၼ်ႉၵူၺ်း။ ၼႂ်းသႅၼ်ဝီႁဝ်းၼႆႉ ပဵၼ်ၵူၼ်းၸိူင်ႉၼႆ ၼမ်ဝႃႈၼမ်ယဝ်ႉ။ ဢၼ်လူႉတၢႆၸွမ်းၼႂ်းသူၼ်ၼႂ်းႁိူၵ်ႈ ၸွမ်းၶႅပ်ႇတၢင်း ၸိူဝ်းၼႆႉၵေႃႈ ၼိုင်ႈလိူၼ်လႂ် မီး ၼိုင်ႈၵေႃႉ သွင်ၵေႃႉၼႆႉ ” – ဝႃႈၼႆ။
ၵေႃႉဢၼ်လူႉတၢႆၵႂႃႇၼႆႉ ဢႃယု မီးမွၵ်ႈ 35 ပီ ႁဵတ်းသုမ်ႉမုင်းဢွၼ်ႇ ယူႇႁိမ်းဝၢၼ်ႈပဵင်းဢွႆႈ ၸႄႈဝဵင်းသႅၼ်ဝီ မိူဝ်ႈလဵဝ် ၾၢႆႇၸုမ်းၸွႆႈတူင်ႇဝူင်းၵူၼ်းသႅၼ်ဝီ ၸွႆႈသူင်ႇပူၼ်ႉၶၢပ်ႈတူဝ်ယဝ်ႉလီငၢမ်း ။
ၼႂ်းဝဵင်းသႅၼ်ဝီၼႆႉ ၵူၼ်းဢမ်ႇႁူႉၾၢႆႇ မႃးယူႇသဝ်းၼမ်ႁႅင်း လွင်ႈၵေႃႇၵၢၼ်ႁၢႆႉၵေႃႈၼမ်ၶိုၼ်ႈ ၵူၼ်းမိူင်းမႆႈၸႂ် ၵူဝ်ႁႄ ဢမ်ႇမီးလွင်ႈႁူမ်ႇလူမ်ႈ ၵဵဝ်ႇလူၺ်ႈလွင်ႈၼႆႉ ပႆႇမီးၸုမ်းလႂ် တူၺ်းထိုင်ၵႄႈလိတ်ႈပၼ်လႆႈ ၼႆယဝ်ႉ။
ဢိင်ၼိူဝ်လွင်ႈၼႆႉ ၽူႈၶဝ်ႈၸုမ်းၸွႆႈတူင်ႇဝူင်းၵူၼ်းသႅၼ်ဝီ(အနိုင်းမဲ့)ၵေႃႉၼိုင်ႈသိုပ်ႇလၢတ်ႈဝႃႈ- “ တႃႇႁႂ်ႈ ၵူၼ်းဢမ်ႇႁူဝ်ဢမ်ႇႁၢင်ၸိူဝ်းၼႆႉ ယွမ်းလူင်းၵေႃႈ ဢမ်ႇငၢႆႈငၢႆႈယူဝ်ႉ ။ဢမ်ႇမီးၽႂ် ၶွတ်ႇၽွတ်ႈပၼ်ၸုမ်း တႃႇတေၵုမ်းၵမ် ၵူၼ်းသူႇသမ်းၵိၼ်ယႃႈၸိူဝ်းၼႆႉ ။သင်ဝႃႈ ႁဵတ်းလႆႈၼႆတႄႉ ဢဝ်ၶဝ် ၽႅတ်ႈယႃႈၶဝ်သေ သင်ဝႃႈ လူႉတၢႆၼႆၵေႃႈ ၸုမ်းၸွႆႈတူင်ႇၵူၼ်းမီးယူႇလူး။သင်ဝႃႈ ၽႅတ်ႈယႃႈယဝ်ႉ ၶိုၼ်းပဵၼ်ၵူၼ်းလီၵူၼ်းငၢမ်းၼႆၵေႃႈ ႁႂ်ႈၶဝ်ၸွႆႈၵၢၼ်ပရႁိတ ၸိူဝ်းၼႆႉၼႆ လႅပ်ႈတေမီးၽွၼ်းလီၶိုၼ်ႈမႃးယူႇၼႃ။ ၵူၺ်းၼႃႇ မိူဝ်ႈလဵဝ် ပႆႇၸၢင်ႈတူင်ႉၼိုင်သင်ပၼ်လႆႈၶႃႈ။ၵူၼ်းမိူင်းၵေႃႈ လူဝ်ႇဝႆႉ သတိ ႁင်းၽႂ်ႁင်းမၼ်းၵူၺ်းယဝ်ႉ ၼင်ႇႁိုဝ် တေဢမ်ႇပဵၼ်ၽေးသႂ်ႇႁဝ်းၼၼ်ႉ” – ဝႃႈၼႆ။
မိူၼ်ၼၼ်ၼင်ႇၵဝ်ႇ မိူဝ်ႈဝၼ်းတီႈ 5/5/2023 ၼၼ်ႉၵေႃႈ ၵူၼ်းဝၢၼ်ႈထူပ်းႁၼ်တူဝ်တၢႆ ၵူၼ်းၸၢႆးၵေႃႉၼိုင်ႈ တီႈဝၢၼ်ႈမွၵ်ႇၸလီ(ႁိုဝ်) ၸႄႈဢူ ၸႄႈဝဵင်းသႅၼ်ဝီ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ