ၼုမ်ႇၸၢႆး 4 ၵေႃႉ ဢၼ်ၵႂႃႇႁဵတ်းၵၢၼ် တီႈဝဵင်းလၢဝ်ႇၵၢႆး ႁၢႆလႆႈ 7 ဝၼ်းယဝ်ႉ ပႆႇၵပ်းသိုပ်ႇလႆႈၶိုၼ်း။
ၼုမ်ႇၸၢႆး 4 ၵေႃႉ လုၵ်ႉမိူင်းမၢၼ်ႈတူင်ႈပဵင်းသေ မႃးႁႃၵႃႉၶၢႆၶိူင်ႈၶူဝ်းၸႂ်ႉသွႆႈႁိူၼ်းယေး တီႈဝဵင်းႁူဝ်ပၢင်ႇ ၊ ဝဵင်းလၢဝ်ႇၵၢႆး ၸိုင်ႈတႆးပွတ်းႁွင်ႇ ထိုင်မႃးမိူဝ်ႈဝၼ်းတီႈ 9/5/2023 ၼၼ်ႉၸိူဝ်းၶဝ် ၵိုင်ႉၵၢင်ႉႁၢႆၵႂႃႇ ၵပ်းသိုပ်ႇဢမ်ႇလႆႈလႄႈ ပေႃႈမႄႈပီႈၼွင်ႉ မႆႈၸႂ်ပဵၼ်ၼမ်ႉႁူႈၼမ်ႉတႃ ဝႃႈၼႆ။
ပီႈၼွင်ႉၸမ်ၸႂ်ၼုမ်ႇၸၢႆးၵေႃႉၼိုင်ႈလၢတ်ႈတီႈၽူႈတွႆႇႁွၵ်ႈဝႃႈ – “ ၸႂ်ႈယဝ်ႉ ၼွင်ႉၸၢႆးႁူမ်ႈတွင်ႉၵၼ်တၢင်းၶႃႈတႄႉ ပႃးၵေႃႉၼိုင်ႈဢေႃႈ။ မႃးႁဵတ်းၵၢၼ်တီႈလဵဝ်ၵၼ် တီႈႁူဝ်ပၢင်ႇၼႆႉယဝ်ႉ။ၶႃႈမႃးၶၢတ်ႈႁွင်ႈယူႇၸွမ်းမေးၶႃႈႁွင်ႈၼိုင်ႈ ၶဝ်သမ်ႉယူႇၸွမ်းၵၼ် 4 ၵေႃႉ။ႁဝ်းၶႃႈ မႃးၵႃႉၶၢႆၶိူင်ႈၶူဝ်း မိူၼ်ၼင်ႇ ၽႃႈႁူမ်ႇ ၽႃႈၵွပ်း တိူၵ်ႈသႂ်ႇၶူဝ်းလႄႈ ယူးပတ်း ၶဝ်ၸိူဝ်းၼႆႉဢေႃႈ ။ တၢင်ႇရူတ်ႉၶိူင်ႈသေ လႄႇႁႃၶၢႆၼၼ်ႉၼႃႇ ။ မၢင်ဝၼ်းၵေႃႈႁူမ်ႈၵၼ်ၵႂႃႇတီႈလဵဝ် မၢင်ဝၼ်းၵေႃႈ ၽႄတၢင်းၵၼ်ၵႂႃႇ။ဝၼ်းၼၼ်ႉသမ်ႉ ၶဝ်ဢွၼ်ၵၼ်ၵႂႃႇ တၢင်းလၢဝ်ႇၵၢႆးပုၼ်ႉၼၼ်ႉ ။ မိူဝ်ႈတႄႇမၼ်းတႄႉ ထၢင်ႇၶဝ် ၵႂႃႇၶၢႆၶူဝ်းတီႈဢၼ် ဢမ်ႇမီးလႅင်းၾူၼ်းႁိုဝ်ၼႆဢေႃႈ ။ တၢင်းၼႆႉသမ်ႉ မၢင်တီႈၵေႃႈ မၼ်းဢမ်ႇမီးလႅင်းၾူၼ်း ၼၼ်ႉၼႃႇၼေႃႈ ။ ၵူၺ်းၼႃႇသမ်ႉ ႁၢႆၵႂႃႇပဵၼ်ၶၢဝ်းတၢင်း 7 ဝၼ်း ပႃးမိူဝ်ႈၼႆႉယဝ်ႉလူးၼေႃ ။မႆႈၸႂ်ၵၼ်မူတ်း ယဝ်ႉဢေႃႈ မိူဝ်ႈလဵဝ် ပေႃႈမႄႈပီႈၼွင်ႉတၢင်းႁိူၼ်းပုၼ်ႉၵေႃႈ ပဵၼ်ၼမ်ႉႁူၼမ်ႉတႃယဝ်ႉ” – ဝႃႈၼႆ။
ၼုမ်ႇၸၢႆးၸိူဝ်းႁၢႆတူဝ်ၵႂႃႇၼႆႉ ပဵၼ်လုၵ်ႈပီႈလုၵ်ႈၼွင်ႉၵၼ်တင်းမူတ်း ။ ၼႂ်းၼၼ်ႉ ဢွင်ႇၸေႃႇထုၼ်း(ႁိုဝ်)မူဝ်းၺူဝ်ႇ ဢႃယု 20 ပီ ၊ ႁဵင်းထႅတ်ႉၸေႃႇ ဢႃယု 18 ပီ ၊ ထႅတ်ႉမျၢတ်ႉဢွင်ႇ ဢႃယု 18 ပီ ၊ၵျေႃႇၶၢႆႇလိၼ်း ဢႃယု 17 ပီ ယူႇ ၸႄႈဝဵင်းမူင်ႇယႂႃႇ တိူင်းၸႄႈၵႅင်း ယွၼ်ႉငဝ်းလၢႆးလၢႆလွင်ႈသေ မႃးႁဵတ်းၵၢၼ်ႁႃၵိၼ်လဵင်ႉတွင်ႉ ၼႂ်းမိူင်းတႆး မီးၶၢဝ်းတၢင်း 1 ပီ ၼႆယဝ်ႉ။
ပီႈၼွင်ႉၸမ်ၸႂ်ၼုမ်ႇၸၢႆးၵေႃႉၼိုင်ႈသိုပ်ႇလၢတ်ႈဝႃႈ – “ ႁဝ်းၵေႃႈ ဢမ်ႇယၢမ်ႈၺႃးသေပွၵ်ႈ ။ ပီႈၼွင်ႉႁၢႆၸိူင်ႉၼႆ ။ထိုင်မိူဝ်ႈလဵဝ်ၵေႃႈ ၼႂ်းၸႂ်ၵေႃႈ ထၢင်ႇဝႃႈၶဝ်ၵႂႃႇႁႃၶၢႆၶူဝ်းယူႇႁဵတ်းၼႆဢေႃႈ။ၵူၺ်းၼႃႇ ပေႃးတူၺ်းသမ်ႉ ႁၢႆၵႂႃႇႁိုင်ၸိူင်ႉၼႆၵေႃႈ မႆႈၸႂ်မႃးၼင်ႇၵဝ်ႇ ၵူၼ်းတီႈႁိူၼ်းတႄႉ ပွင်ႉႁင်းၶႃႈ ပေႇၸႂ်ယဝ်ႉၶႃႈ။ ၶႃႈပဵၼ်ၵေႃႉယႂ်ႇသေပိူၼ်ႈ ဢမ်ႇတူၺ်းထိုင်လီလီၼႆဢေႃႈ ။ ၵူႈဝၼ်းၵေႃႈ ၵႂႃႇႁႃၶၢႆပေႃးၸွတ်ႇ ၵူႈတီႈၵေႃႈ ပေႃးထိုင်ၶိင်ႇမၼ်းမႃးၼႆ ပွၵ်ႈမႃးႁႃ တီႈလိုဝ်ႈၽႂ်မၼ်းယူႇလူး။ မိူဝ်ႈလဵဝ်ၵေႃႈ ၶႃႈဢမ်ႇၸၢင်ႈၵႂႃႇတိူင်ႇပၢင်ႇၽႂ် လိူဝ်သေ ပိုၼ်ၽၢဝ်ႇႁႃ ၼိူဝ်ဢွၼ်ႊလၢႆႊ ” – ဝႃႈၼႆ။
သင်ဝႃႈ ၽႂ်ႁၼ်မႅၼ်ႈ ၼုမ်ႇၸၢႆး 4 ၵေႃႉၼႆႉၼႆၸိုင် ၵပ်းသိုပ်ႇပွင်ႇၶၢဝ်ႇပၼ်လႆႈတီႈ မၢႆၾူၼ်း ၵူၼ်းႁူမ်ႈႁိူၼ်း 09 756 976 148 ၊ 09 697 346 318 သေၵမ်းဝႃႈၼႆ ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ