ၾူၼ်ႁႃႇယႂ်ႇလူမ်းပတ်ႉႁႅင်း လိၼ်ၵူၼ်ႇပင်းသႂ်ႇႁိူၼ်းၵူၼ်းမိူင်းၸႄႈဝဵင်းတႃႈၶီႈလဵၵ်း 2 ၵေႃႉၽူဝ်မေးတၢႆထင်တီႈ။

မိူဝ်ႈၼႆႉ ဝၼ်းတီႈ 14/5/2023  ယၢမ်းႁူဝ်ၼႂ်ၸဝ်ႉ 4 မူင်း ၾူၼ်လူင်လူမ်းႁႅင်းလႄႈ ၵွင်လိၼ်လူင် ၵူၼ်ႇပင်းတဵင်သႂ်ႇ ႁိူၼ်းလင်ၼိုင်ႈ တီႈပွၵ်ႉသၼ်သၢႆး (ၶ) ၸႄႈဝဵင်းတႃႈꧠီႈလဵၵ်း   2 ၵေႃႉၽူဝ်မေး  တၢႆၶမ် ၵွင်လိၼ်။

ၵူၼ်းၼႂ်းပိုၼ်ႉတီႈဝဵင်းတႃႈၶီႈလဵၵ်းၵေႃႉၼိုင်ႈလၢတ်ႈတီႈၽူႈတွႆႇႁွၵ်ႈဝႃႈ – ၸႂ်ႈဢေႃႈ ႁိူၼ်းၼႆၵေႃႈ ဢမ်ႇၸၢင်ႈဝႃႈလီလီ တေပဵၼ်သုမ်ႉဢွၼ်ႇ မိူၼ်ၼင်ႇထဵင်ၼႃးၼၼ်ႉၵွႆး ။ၵူၺ်းၼႃႇ တေဢဝ်လဵၵ်းၽိူၵ်ႇဢွၼ်ႇႁေ ၵင်ႈဝႆႉ မုင်းဝႆႉႁဵတ်းၼၼ်ၵူၺ်းၼေႈ။ ယူႇဢိူမ်ႈဝႆႉ ၵွင်လိၼ်လူင်ယႂ်ႇယႂ်ႇ ၼႂ်းဝၢင်းၼၼ်ႉဢေႃႈ။ မၼ်းပဵၼ်တီႈႁဵတ်းၵၢၼ်ၶဝ်ၼၼ်ႉယဝ်ႉ။ၸဝ်ႈၶွင်တႄႉ ပဵၼ်ၽႂ်ႁဝ်းၵေႃႈ ဢမ်ႇႁူႉ။ၼႂ်းဝၢင်းၼၼ်ႉ ႁိူၼ်းၸိူင်ႉၼၼ် မီးမွၵ်ႈ 4 လင်ၼႆႉဢေႃႈ။ၵူၺ်းၼႃႇ လိူၵ်ႈလိူၵ်ႈလိၼ်သမ်ႉၵူၼ်ႇသႂ်ႇႁိူၼ်းလင်ၼႆႉ”  ဝႃႈၼႆ။

လင်ႁိူၼ်းဢၼ်ၺႃးၵွင်လိၼ် ၵူၼ်ႇပင်းသႂ်ႇၼႆႉ မီးၼႂ်းဝၢင်းတီႈဝႆႉၵွင်လိၼ်ဢၼ်ၶၢႆတႃႇၵေႃႇသၢင်ႈ တီႈပွၵ်ႉသၼ်သၢႆး (ၶ) ၸႄႈဝဵင်းတႃႈၶီႈလဵၵ်း။ၵူၼ်းဢၼ်လူႉတၢႆၸွမ်းၼႆႉ ပဵၼ်သွင်ပူႇဢွၵ်ႇၵၼ် မိူဝ်ႈလဵဝ် ၸုမ်းၸွႆႈတူင်ႇဝူင်းၵူၼ်းတင်းၵူၼ်းမိူင်း ႁူမ်ႈၸွႆႈၵၼ်ၶုတ်းလိၼ်ဢွၵ်ႇသေ ဢဝ်ၶၢပ်ႈတူဝ် သူင်ႇထိုင်ႁူင်းယႃလူင် တႃႈၶီႈလဵၵ်းသေ ၵူတ်ႇထတ်းဝႆႉၼႆယဝ်ႉ။

ၵူၼ်းၼႂ်းပိုၼ်ႉတီႈၵေႃႉၼိုင်ႈသိုပ်ႇလၢတ်ႈဝႃႈ – “ မိူဝ်ႈမိူင်းပႆႇလႅင်းလီလီၼၼ်ႉတႄႉ ၵူၼ်းႁိမ်းႁွမ်းၼၼ်ႉ ငိၼ်းသဵင်လၢၵ်ႇလၢႆးဝႆႉ သဵင်မၼ်း လင်ဝႆႉၼႆဢေႃႈ ။ၵွပ်ႈၾူၼ်သမ်ႉတူၵ်းယူႇလႄႈ ၽႂ်ၵေႃႈ ဢမ်ႇလုၵ်ႉတူၺ်း ထၢင်ႇဝႃႈ လိၼ်ၵူၼ်ႇလၢႆလၢႆၵူၺ်း ဢမ်ႇထၢင်ႇဝႃႈ တေလူမ်ႉတဵင်ႁိူၼ်းၼႆဢေႃႈ။ ၽိူဝ်ႇမိူင်းလႅင်း ပိူၼ်ႈၸင်ႇႁၼ်ဝႃႈၵူၼ်ႇတဵင်ၺႃးသုမ်ႉၼၼ်ႉ ” – ဝႃႈၼႆ။

မိူဝ်ႈဝႃးဝၼ်းတီႈ 13/5/2023 ၵေႃႈ ယွၼ်ႉၾူၼ်လူင်လူမ်းႁႅင်းသေ ၼမ်ႉၼွင်းယိုင်ၸွမ်း ၼႂ်းတႃႈၶီႈလဵၵ်း ပဵၼ်လၢႆပွၵ်ႉလၢႆဝၢၼ်ႈ မိူၼ်ၼင်ႇ ပုင်းထုၼ် ၊ တႃႈလေႃႉ ၊ မၢၵ်ႇၵႃႇႁူဝ်ၶမ်း ၸဵမ်ၸိူဝ်းၼႆႉ။မိူဝ်ႈၼႆႉ ၵၢင်ၼႂ် 7 မူင်း ၼမ်ႉယွမ်းလူင်းၶိုၼ်းယဝ်ႉသေတႃႉ ယုၵ်းယၢၵ်း ဢၼ်လွင်ႈၽူး မႃးၸွမ်းၼမ်ႉ မႃးၶၢင်ႉၶမ်ဝႆႉၸွမ်းၶၢင်ႈတၢင်းလႄႈ ၵူၼ်းမိူင်းယၢပ်ႇၽိုတ်ႇတႃႇၵႂႃႇမႃး။

ၾၢႆႇပႂ်ႉတူၺ်းၾူၼ်လူမ်တႄႉပိုၼ်ၽၢဝ်ႇဝႃႈ လူမ်းလႅင်ႉလူင်မူဝ်ႊၶႃႊ တေၽတ်ႉပဝ်ႇၼႂ်းမိူင်းရၶၢႆႇ ။ မိူင်းၶၢင် မိူင်းတႆး တေၺႃးႁၢင်လူမ်းလႄႈႁႂ်ႈလႆႈၾၢင်ႉယူႇသဝ်းၵိၼ်သၢင်ႈ ဝႃႈၼႆဝႆႉ။