ထဝ်ႈၸၢႆးၵူၼ်းလဵင်ႉၵႂၢႆး ၼႂ်းၸႄႈဝဵင်းတႃႈၶီႈလဵၵ်း 2 ၵေႃႉ ၺႃးၵႂၢႆးတေႃႈလႄႈ မၢတ်ႇၸဵပ်းႁၢဝ်ႈႁႅင်း။

မိူဝ်ႈၼႆႉ ဝၼ်းတီႈ 12/5/2023 ယၢမ်းၵၢင်ၼႂ် 8 မူင်းၼၼ်ႉ ထဝ်ႈၸၢႆး 2 ၵေႃႉ ၺႃးၵႂၢႆးတေႃး  ႁိမ်းဝၢၼ်ႈယၢၼ်ႇသျိၼ်း 4 ( ဝၢၼ်ႈၼိူဝ်) ဢိူင်ႇမိူင်းၵူဝ်း ၼႂ်းၸႄႈဝဵင်းတႃႈၶီႈလဵၵ်း မၢတ်ႇၸဵပ်းႁၢဝ်ႈႁႅင်း ထိုင်တီႈလႆႈႁၢမ်သူင်ႇႁူင်းယႃ။

ၸုမ်းၸွႆႈတူင်ႇၵူၼ်း ဢူးလႃႉမူဝ်း လၢတ်ႈတီႈၽူႈတွႆႇႁွၵ်ႈဝႃႈ – “ ငိၼ်းဝႃႈတႄႉ ၵႂၢႆးတေႃးၶဝ်ႁေယဝ်ႉၵေႃႈ ဢမ်ႇၵႂႃႇ ယူတ်းယႃ တီႈလႂ် ၵူဝ်သဵင်ႈငိုၼ်းၼမ် ၵွပ်ႈဢမ်ႇမီးငိုၼ်းၼမ်ၼႆဢေႃႈ ။ႁဵတ်းႁိုဝ်လႄႈၵႂၢႆးတေႃးၶဝ်ၼႆတႄႉၵေႃႈ ဢမ်ႇႁူႉၸွမ်းၼင်ႇၵဝ်ႇ။ ၵူၼ်းဝၢၼ်ႈ  ႁၼ်သွင်ၶႃၸဵပ်းႁႅင်းဝႆႉလႄႈ ၸင်ႇ ယွၼ်းတၢင်းၸွႆႈထႅမ်ႁဝ်းမႃးဢေႃႈ။ ၵေႃႉၼိုင်ႈတႄႉ တီႈၶႃလူင်မၼ်းလႄႈ ၶႅၼ်မၼ်းၸိူဝ်းၼႆႉ လွၵ်ႈလၢၼ်ႉၸဵပ်းၼမ်ဝႆႉဢေႃႈ။ ထႅင်ႈၵေႃႉၼိုင်ႈသမ်ႉ မၢၵ်ႇၵၢဝ်ႈမၼ်းလႄႈ လုပ်ႇၼႃႈၶႅင်ႈမၼ်းတေလႅပ်ႈၸတ်ႉဝႆႉၶႃႈဢေႃႈ ” – ဝႃႈၼႆ။

ထဝ်ႈၸၢႆး 2 ၵေႃႉ ဢၼ်ၺႃးၵႂၢႆးတေႃးၼႆႉ ၸိုဝ်ႈ လုင်းၵျႃႇၵျေး ဢႃယု 77 ပီ လႄႈ လုင်းၵျပူဝ်ႇ ဢႃယု 60 ပီ ယူႇဝၢၼ်ႈယၢၼ်ႇသျိၼ်းၼိူဝ် ဢိူင်ႇမိူင်းၵူဝ်း ၸႄႈဝဵင်းတႃႈၶီႈလဵၵ်း။မိူဝ်ႈလဵဝ် ၵိင်ႇၽႄၸုမ်းၸွႆႈတူင်ႇဝူင်းၵူၼ်းဢူးလႃႉမူဝ်း(ဝၢၼ်ႈမၢၵ်ႇယၢင်း) ၸွႆႈသူင်ႇယူတ်းယႃဝႆႉတီႈႁူင်းယႃလူင်တႃႈၶီႈလဵၵ်း။

မိူဝ်ႈဝၼ်းတီႈ 6/5/2023 ၼၼ်ႉၵေႃႈ ၸၢႆးၵူၼ်းပၢႆႈၽေးၵေႃႉၼိုင်ႈ ၺႃးမူထိူၼ်ႇ ထုၺ်ႇ မိူဝ်ႈၽွင်းၵိၼ်ၸၢင်ႈပိတ်းၼဵင်ႈၼႂ်းသူၼ် တီႈဝၢၼ်ႈၼႃးလုၺ်း ဢိူင်ႇၶူင်ငိုၼ်း ၸႄႈဝဵင်းမိူင်းငေႃႉ မၢတ်ႇၸဵပ်းႁၢဝ်ႈႁႅင်း၊  ဢမ်ႇမီးငိုၼ်းတွင်းတဵမ်ထူၼ်ႈလႄႈ ယၢပ်ႇၽိုတ်ႇတႃႇယူတ်းယႃ ။