ၵူၼ်းလၵ်ႉရူတ်ႉၶိူင်ႈ ၼႂ်းၸႄႈဝဵင်းတႃႈၶီႈလဵၵ်း လိူင်ႇၼမ်ၶိုၼ်ႈမႃးၵူႈဝၼ်းလႄႈ ၵူၼ်းမိူင်းမႆႈၸႂ် ယွၼ်ႉဢမ်ႇၸၢင်ႈတိူင်ႇလၢတ်ႈၾၢႆႇလႂ်ၸွႆႈထႅမ်ပၼ်။
ၶၢဝ်းတၢင်းသိုၵ်းမၢၼ်ႈယိုတ်းမိူင်းမႃး 2 ပီပၢႆၼႆႉ ၵၢၼ်ဝၢၼ်ႈမိူင်းဢမ်ႇၼိမ်သဝ်းသေဢမ်ႇၵႃး ၽူႈလၵ်ႉၸၵ်ႉၶုတ်ႈၵေႃႈ လိူင်ႇၽႄႈၼမ်မႃးၼႂ်းမိူင်းတႆးၵူႈမိုဝ်ႉၵူႈဝၼ်း မိူၼ်ၼင်ႇ ၼႂ်းၸႄႈဝဵင်းတႃႈၶီႈလဵၵ်း ၸိုင်ႈတႆးပွတ်းဢွၵ်ႇၼႆႉၵေႃႈ မီးၵူၼ်းဢမ်ႇႁူႉၾၢႆႇ လၵ်ႉရူတ်ႉၶိူင်ႈၼမ်မႃးၶိူဝ်းယႂ်း ၵူၼ်းမိူင်းမႆႈၸႂ် ယွၼ်ႉဢမ်ႇၸၢင်ႈတိူင်ႇလၢတ်ႈမူႇလႂ်ၸုမ်းလႂ် ၸွႆႈထႅမ်ပၼ်လႆႈ ၼႆယဝ်ႉ။
ၼုမ်ႇယိင်းတႃႈၶီႈလဵၵ်းၵေႃႉၼိုင်ႈလၢတ်ႈတီႈၽူႈတွႆႇႁွၵ်ႈဝႃႈ – “ မိူၼ်ၼင်ႇ ႁိူၼ်းႁဝ်းၼႆႉၵေႃႈ ရူတ်ႉၶိူင်ႈၵိုတ်းဝႆႉ ၼႂ်းဝၢင်းႁိူၼ်း ၵူၺ်းၼႃႇႁဝ်းသမ်ႉ ဢမ်ႇလႆႈၶတ်းၽၵ်းတူဝႆႉ ပိၵ်ႉဝႆႉႁဵတ်းၼၼ်လၢႆလၢႆၵူၺ်း။ ၺႃးလၵ်ႉၵႂႃႇဢေႃႈ။ရူတ်ႉၶိူင်ႈဢၼ်ၺႃးလၵ်ႉၼႆႉ ပဵၼ် PCX သီၶၢဝ်သီလမ်လေႃးၵၼ်ဢေႃႈ။ႁဝ်းတူၺ်းၶိုၼ်းၼႂ်း CCTV ဢၼ်တင်ႈဝႆႉၼၼ်ႉၵေႃႈ ႁူႉဝႃႈ ၵူၼ်းၶဝ်ႈလၵ်ႉၼႆၵူၺ်း ဢမ်ႇၸၢင်ႈၵႂႃႇတိူင်ႇလၢတ်ႈႁႃၽႂ် ၼႂ်းတႃႈၶီႈလဵၵ်းႁဝ်းၼႆႉ ၽႂ်ပဵၼ်ၵေႃႈ မၼ်းလႆႈၶၢမ်ႇၵူၺ်းဢေႃႈ တေဝႃႈၵႂႃႇလၢတ်ႈယႄးၶဝ်သင်ၶဝ်ၵေႃႈ ယဝ်ႉလၢႆလၢႆၵူၺ်းဢေႃႈ” – ဝႃႈၼႆ။
ၼႂ်းၸႄႈဝဵင်းတႃႈၶီႈလဵၵ်းၼႆႉ ၵမ်ႈၽွင်ႈၺႃးလၵ်ႉရူတ်ႉၶိူင်ႈ ၸွမ်းႁေႃၸွမ်းႁိူၼ်းယဝ်ႉ ၵမ်ႈၽွင်ႈ ၺႃးၸုမ်းဢမ်ႇႁူႉၾၢႆႇ ႁႄႉႁၢမ်ႈလွၵ်ႇငိုတ်ႈၸူၼ်ဢဝ် ၸွမ်းသဵၼ်ႈတႃႈသၢႆတၢင်းၸိူဝ်းၼႆႉၵေႃႈမီးၼမ်။ပေႃးပဵၼ်ၼၢင်းယိင်း တႃႇၶီႇရူတ်ႉၶိူင်ႈ သေ ဢွၵ်ႇၵႂႃႇတၢင်းၼွၵ်ႈၵေႃႈ လႆႈမႆႈၸႂ်ၵူဝ်ႁႄလၢႆလွင်ႈၼႆယဝ်ႉ။
ဢိင်ၼိူဝ်လွင်ႈၼႆႉသေ ၼုမ်ႇယိင်းတႃႈၶီႈလဵၵ်းၵေႃႉၼိုင်ႈသိုပ်ႇလၢတ်ႈဝႃႈ – “ ၼႂ်းတႃႈၶီႈလဵၵ်းႁဝ်းၼႆႉ လီၵူဝ်ၼႃႇ ဢမ်ႇၶဝ်ႈလၵ်ႉၼႂ်းႁိူၼ်းၼႂ်းယေးၵေႃႈ ပႂ်ႉႁိမ်ဢဝ်ၸွမ်းတႃႈ ၸွမ်းတၢင်းၸိူဝ်းၼႆႉၵေႃႈ မီးဢေႃႈ။ ၵူၼ်းတီႈလႂ်လၢႆလၢႆၵေႃႈ ဢမ်ႇႁူႉ မႃးမီးၼႂ်းဝၢၼ်ႈၼႂ်းဝဵင်းႁဝ်းၼႆႉ။မၢင်ၵေႃႉၵေႃႈ မိူၼ်ၵူၼ်းလီယူႇ မၢင်ၵေႃႉၵေႃႈ တူၺ်းမိူၼ်မဝ်းလဝ်ႈမဝ်းယႃႈ။ၼၢင်းယိင်းမိူၼ်ႁဝ်း တေဢွၵ်ႇၵၢင်ၶမ်ႈၵၢင်ၶိုၼ်းၵေႃႈ လႆႈၵူဝ်ႁႅင်းၼႃႇ” – ဝႃႈၼႆ။
ၼႂ်းႁူဝ်လိူၼ်ၼႆႉၵူၺ်း ရူတ်ႉၶိူင်ႈၵူၼ်းမိူင်းတႃႈၶီႈလဵၵ်း ၺႃးလၵ်ႉ ဢမ်ႇယွမ်း 5 လမ်းသေ ဢဝ်လွင်ႈတၢင်းရူတ်ႉၶိူင်ႈႁၢႆၼႆႉသေ တၢင်ႇၼိူဝ်ဢွၼ်ႊလၢႆႊ ယဝ်ႉသေတႃႉ ဢမ်ႇမီးလွင်ႈတုမ်ႉယွၼ်ႈသင်သေဢမ်ႇၵႃး ဢမ်ႇမီးၽႂ်တီႉၺွပ်းၽူႈလၵ်ႉပၼ်လႆႈ ၼႆယဝ်ႉ။
မိူၼ်ၼင်ႇမိူဝ်ႈဝႃး ဝၼ်းတီႈ 10/5/2023 ယၢမ်းႁူဝ်ၼႂ် 3 မူင်းၼႆႉၵူၺ်းၵေႃႈ ၵူၼ်းမိူင်း ပွၵ်ႉပႃႇလႅင် 2 ၸႄႈဝဵင်းတႃႈၶီႈလဵၵ်း ၺႃးၵူၼ်းၶဝ်ႈၼႂ်းဝၢင်းလၵ်ႉရူတ်ႉၶိူင်ႈၵႂႃႇ လမ်းၼိုင်ႈ ။
