ပၢႆးမၢၵ်ႈမီးတူၵ်း ႁႃငိုၼ်းယၢပ်ႇၽိုတ်ႇမႃးၵူႈဝၼ်းလႄႈ မႃႇလဵင်ႉၼႂ်းႁိူၼ်း (ၽၼ်းၼွၵ်ႈမိူင်း) ၵႃႈၶၼ်ယႂ်ႇ ၵႆႉၵႆႉၺႃးလၵ်ႉ ႁၢႆၶိူဝ်းယႂ်း တီႈဝဵင်းလႃႈသဵဝ်ႈ ။

တႄႇဢဝ် ႁၢင်လိူၼ်ဢေႊပရိူဝ်ႊ 2023 ၼႆႉမႃး မီးၵူၼ်းဢမ်ႇႁူႉၾၢႆႇ ဢႅဝ်ႇႁႃလၵ်ႉမႃလဵင်ႉၼႂ်းႁိူၼ်း မဵဝ်းၵႃႈၶၼ်ယႂ်ႇၼၼ်ႉ ၵႆႉႁွင်ႉမႃလၵ်ႉတၢင်ႇၵႃးၵႂႃႇ ၸိူဝ်းၼႆႉၵေႃႈ မီးမႃးၶိူဝ်းယႂ်းယဝ်ႉ ၼႂ်းဝဵင်းလႃႈသဵဝ်ႈ ၸိုင်ႈတႆးပွတ်းႁွင်ႇ ယွၼ်ႉပဵၼ် မႃႁၢင်ႈလီ ၸိူဝ်ႉၽၼ်းၼွၵ်ႈမိူင်း ၸိူဝ်းၼၼ်ႉ။

ၵူၼ်းပိုၼ်ႉတီႈ ဝဵင်းလႃႈသဵဝ်ႈ လၢတ်ႈတီႈၽူႈတွႆႇႁွၵ်ႈဝႃႈ – “တေႃႈလဵဝ် တီႈလႃႈသဵဝ်ႈၼႆႉ မီးဝႆႉၸုမ်းလၵ်ႉမႃ။ မႃၼႆႉ ၵႆႉ ႁၢႆၵၼ်မႃး ၶိူဝ်းယႂ်းၶႃႈဢေႃႈ။ မၢင်ႁိူၼ်းသႂ်ႇဝႆႉ CCTV ႁၼ်ၵူၼ်းလၵ်ႉ ၸိူဝ်းၼၼ်ႉ မႃးယွၵ်ႇ ႁွင်ႉဢဝ်မႃသႂ်ႇၵႃးၵႂႃႇ ၸိူဝ်းၼႆႉၵေႃႈမီးယဝ်ႉ။ ဢၼ်ၶဝ်လၵ်ႉၵႂႃႇမႃၼၼ်ႉ ၶဝ်ဢဝ်ၵႂႃႇႁဵတ်းသင်တႄႉ ဢမ်ႇႁူႉ။ ဢဝ်ၵႂႃႇၶၢႆႁႃႉၵေႃႈ ဢမ်ႇႁူႉ။ မိူဝ်ႈလိူၼ်ပူၼ်ႉမႃးၼၼ်ႉ တၢင်း ၼႃႈ ႁိူၼ်းႁဝ်းၶႃႈၼႆႉ ၶဝ်မီးမႃႁၢင်ႈလီ လဵင်ႉဝႆႉ ၼၼ်ႉၵေႃႈ ႁၢႆၵႂႃႇတေႃႇထိုင်ယၢမ်းလဵဝ် ပႆႇႁၼ်ၶိုၼ်းၶႃႈ”- ဝႃႈၼႆ။

မႃလဵင်ႉတၢင်းႁၢင်ႈလီ ၸွမ်းႁိူၼ်းၼႆႉ ၵႃႈၶၼ်မၼ်းမီး တႄႇဢဝ် 2 သႅၼ်ပျႃးၶိုၼ်ႈ သင်ပဵၼ်မႃၸိူဝ်ႉၽၼ်း ၼွၵ်ႈမိူင်း ဢၼ်ၸႅတ်ႈၸိုင် ၼိုင်ႈတူဝ်လႂ် ဢမ်ႇယွမ်း 10 သႅၼ်ပျႃး ဝႃႈၼႆ။

ၸဝ်ႈၶွင်မႃ ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “မိူဝ်ႈႁၢင်လိူၼ်ပူၼ်ႉမႃး ၼႂ်းဝၼ်းသဝ်ၼၼ်ႉ မႃၶႃႈႁၢႆၵႂႃႇတူဝ်ၼိုင်ႈ။ တေႃႇ ထိုင်ယၢမ်းလဵဝ် ႁႃပႆႇႁၼ်။ ယွၼ်ႉၵႂႃႇၵႆသေ ႁႃတၢင်းပွၵ်ႈၶိုၼ်းဢမ်ႇႁၼ်ယဝ်ႉလႄႈ ပိူၼ်ႈတေႁွင်ႉလဵင်ႉဝႆႉႁိုဝ် ဢမ်ႇႁူႉ။ မႃၶႃႈၼႆႉ ႁၢင်ႈလီ ယဝ်ႉၵေႃႈ တူဝ်ယႂ်ႇ ထွမ်ႇၵႂၢမ်းဝႃႈငၢႆႈၶႃႈဢေႃႈ”- ဝႃႈၼႆ။

ဝၢႆးသိုၵ်းမၢၼ်ႈ ယိုတ်းမိူင်းမႃးၼႆႉ ၵၢၼ်ပၢႆးမၢၵ်ႈမီး၊ ၵၢၼ်ပၢႆးပၺ်ႇၺႃႇ ၼႂ်းမိူင်းတႆး – မိူင်းႁူမ်ႈတုမ် ၸိူဝ်းၼႆႉ တူၵ်းႁႅင်းလႄႈ ၵၢၼ်ႁႃၵိၼ်လဵင်ႉတွင်ႉ ၵူၼ်းမိူင်းၵေႃႈ ယိုင်ႈၶႅၼ်းယၢပ်ႇၽိုတ်ႇမႃးလိူဝ်ၵဝ်ႇထႅင်ႈလႄႈ ယွၼ်ႉၵၢၼ်ႁႃၵိၼ်လဵင်ႉတွင်ႉၼႆႉသေ ၽူႈလၵ်ႉၸၵ်ႉၶုတ်ႈ ယိုင်ႈၶႅၼ်းလိူင်ႇၼမ်ႁႅင်း တေႃႇၼင်ႇ မႃလဵင်ႉတၢင်းႁၢင်ႈလီ ၼႂ်းႁိူၼ်းၵူၺ်း ဢမ်ႇဝႆႉ တႃႇလွင်ႈႁူမ်ႇလူမ်ႈ ၵူၼ်းမိူင်းတႄႉ ဢမ်ႇမီးသင်သေဢိတ်းယဝ်ႉ ၵူၼ်းပိုၼ်ႉတီႈ လႃႈသဵဝ်ႈလၢတ်ႈ။