ပၢင်တိုၵ်း သိုၵ်းမၢၼ်ႈတင်းPDF တီႈၸႄႈဝဵင်းယႂႃႇငၢၼ်ႇၼႆႉ ၾၢႆႇသိုၵ်းမၼ်ႈၸႂ်ႉၶိူင်ႈမိၼ်လေႃႇတိုၵ်းႁၢဝ်ႈႁႅင်းလႄႈ ၵူၼ်းမိူင်းလႆႈပၢႆႈၽေးၼပ်ႉႁူဝ်ပၢၵ်ႇ။
တႄႇဢဝ် ဝၼ်းတီႈ 4/5/2023 ၼၼ်ႉမႃး သိုၵ်းမၢၼ်ႈ ပၵ်းပၢင်သဝ်းယူႇၸွမ်း ၼႂ်းဝၢၼ်ႈ ဢၼ်မီးၼႂ်းၵႄႈ ဝဵင်းတႃႇသီႇလႄႈယႂႃႇငၢၼ်ႇၼၼ်ႉသေ ၸုမ်းသိုၵ်း PDF ၶဝ်ႈလေႃႇတိုၵ်းမႃး ဢမ်ႇထၢတ်ႇဢမ်ႇဝၢႆး ၾၢႆႇသိုၵ်းမၢၼ်ႈၸႂ်ႉၶိူင်ႈမိၼ်လေႃႇတိုၵ်းလႄႈ ၵူၼ်းမိူင်းလႆႈပၢႆၽေး ဢမ်ႇယွမ်း 500 ၼႆယဝ်ႉ ။
ၵူၼ်းၼႂ်းတီႈပိုၼ်ႉတီႈ ဝဵင်းယႂႃႇငၢၼ်ႇၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “ သိုၵ်းမၢၼ်ႈၼႆႉ ထႅမ်ႁႅင်းသိုၵ်းၶဝ်ႈမႃး ယူႇၸွမ်း ႁိူၼ်းၵူၼ်းမိူင်းလႄႈ ဝတ်ႉဝႃးၽႃသိူဝ်ႇၸိူဝ်းၼၼ်ႉ ၼမ်ဝႃႈၼမ်ယဝ်ႉ။ ၶဝ်ၼႆႉ တင်ႈၸႂ် ဢဝ်ၵွင်ႈလူင်ၵွင်ႈဢွၼ်ႇ ပိုတ်းယိုဝ်းသႂ်ႇ ၼႂ်းဝၢၼ်ႈလႄႈ ၵူၼ်းမိူင်းလႆႈပၢႆႈ မွၵ်ႈ 500 ၼႆႉဢေႃႈ ။ ၸုမ်းပိဝ်ႇသေႃးထီးၶဝ် လၢတ်ႈၼႄ ဢွင်ႈတီႈယူႇ PDF ၶဝ်ႁေလႄႈ ၸင်ႇတႄႇပဵၼ်ပၢင်တိုၵ်းမႃးၼၼ်ႉယဝ်ႉ ” – ဝႃႈၼႆ။
ၵူၼ်းၸိူဝ်းလႆႈ ပၢႆႈၽေးၼႆႉ မီးလၢႆလၢႆဝၢၼ်ႈ မိူၼ်ၼင်ႇ ဝၢၼ်ႈလႂႃႉၸိၼ်ႇ(လွှစင်) ၼႂ်းၸႄႈဝဵင်းတႃႇၸီႇ လႄႈ ဝၢၼ်ႈၼၢင်းၶုမ်ႇ(နန်းခုံ) ၊ ဝၢၼ်ႈပႃႇၵူၺ်ႈ(ငႅတ်ႉပျေႃးတေႃး) ၊ ဝၢၼ်ႈၵုင်းမေႃႇ၊ ဝၢၼ်ႈမႅတ်ႉၶႃးဢိၼ်း ဢၼ်မီး ၼႂ်းၸႄႈဝဵင်းယႂႃႇငၢၼ်ႇၸဵမ်ၸိူဝ်းၼႆႉ။
မိူဝ်ႈဝၼ်းတီႈ 6/4/2023 ၵၢင်ၼႂ် 9 မူင်းၼၼ်ႉၵေႃႈ သိုၵ်းမၢၼ်ႈဢဝ်ဢဵၼ်ႁႅင်းသိုၵ်းၼမ်လၢႆ ၶဝ်ႈသွၵ်ႈတဝ် ႁိူၼ်းၵူၼ်းပၢႆႈၽေး ၼႂ်းဝၢၼ်ႈမႅတ်ႉၶႃးဢိၼ်း ၸႄႈဝဵင်းယႂႃႇငၢၼ်ႇသေ ယႃႉလႅဝ်သွၵ်ႈတဝ် ဢဝ်ၶူဝ်းၶွင်ႁိူၼ်းယေးၵူၼ်းမိူင်း ၵႂႃႇတၢင်းၼမ်တၢင်းလၢႆၼႆယဝ်ႉ။
ၵူၼ်းၼႂ်းပိုၼ်ႉတီႈၵေႃႉၼိုင်ႈသိုပ်ႇလၢတ်ႈဝႃႈ – “ သိုၵ်းမၢၼ်ႈၶဝ်ၼႆႉ သွၵ်ႈတဝ်ဢဝ် ၶူဝ်းၶွင်ႁိူၼ်းယေးၵူၼ်းပၢႆႈၽေးၶဝ်သေဢမ်ႇၵႃး ပၢႆၸုတ်ႇၽဝ်ပႃး ႁိူၼ်းယေးထႅင်ႈၵွၼ်ႇဢေႃႈ။ၵူၼ်းမိူင်းသမ်ႉ ဢမ်ႇႁတ်းယူႇႁိူၼ်းၼႃႇ ပၢႆႈၶဝ်ႈယူႇၼႂ်းထိူၼ်ႇမူတ်းယဝ်ႉလူး ဝၢၼ်ႈဢၼ်ၶဝ်သွၵ်ႈၼႆႉ။တေဝႃႈ ဝူဝ်းၵႂၢႆးၵူၼ်းဝၢၼ်ႈၼႆၵေႃႈ ဢၼ်ၺႃးယိုဝ်းၵေႃႈမီး ဢၼ်ယဵပ်ႇၸပ်းမၢၵ်ႇမႅင်းႁေ တၢႆၵေႃႈမီးဢေႃႈ ” ဝႃႈၼႆ။
မိူဝ်ႈပူၼ်ႉမႃး လိူၼ်ဢေႊပရိူဝ်ႊၼႆႉၵေႃႈ သိုၵ်းမၢၼ်ႈတင်းPDF ယိုဝ်းၵၼ် ႁိမ်းဝၢၼ်ႈဢလႄႇၶျွင်ႇလႄႈဝၢၼ်ႈငွၵ်းသွၵ်ႇ(ငႅတ်ႉတွၵ်ႉ) ၸႄႈဝဵင်းယႂႃႇငၢၼ်ႇသေ ၾၢႆႇသိုၵ်းမၢၼ်ႈ တီႉၺွပ်းၵူၼ်းမိူင်းၵူတ်ႇထတ်းထဵတ်ႈထၢမ်ၵဵဝ်ႇၵပ်း PDF ႁၢဝ်ႈႁႅင်းသေဢမ်ႇၵႃး ယႃႉႁိူၼ်းၵူၼ်းမိူင်းလူႉၵွႆပႃး။
တႄႇဢဝ်သိုၵ်းမၢၼ်ႈယိုတ်းမိူင်းမႃးတေႃႇထိုင် ဝၼ်းတီႈ 28 လိူၼ်ၾႅပ်ႊပိဝ်ႊရီႊ ပီ 2023 ၼႆႉ လုၵ်ႈၸုမ်းသိုၵ်းမၢၼ်ႈ ၸုတ်ႇၽဝ်ယႃႉလႅဝ် ႁိူၼ်းၵူၼ်းမိူင်း မီးၵႂႃႇ 135 လင်သေ ၼႂ်းၼၼ်ႉ ပႃးႁိူၼ်းၵူၼ်းမိူင်းၸႄႈဝဵင်းယႂႃႇငၢၼ်ႇ 18 လင်ၼႆ Data for Myanmar ဢွၵ်ႇဝႆႉ မိူဝ်ႈဝၼ်းတီႈ 20/3/2023။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ