ၵူၼ်းပၢႆႈၽေးသိုၵ်းဢၼ်မီးတီႈဝဵင်းၵျွၵ်ႉမႄးၵေႃႉၼိုင်ႈ ၺႃးမူထိူၼ်ႇ ထုၺ်ႇ မၢတ်ႇၸဵပ်းႁၢဝ်ႈႁႅင်းလႄႈ ယၢပ်ႇၽိုတ်ႇတႃႇယူတ်းယႃ။

မိူဝ်ႈဝႃး ဝၼ်းတီႈ 6/5/2023 ၵၢင်ဝၼ်း 11 မူင်းၼၼ်ႉ ၸၢႆးၵူၼ်းပၢႆႈၽေးၵေႃႉၼိုင်ႈ ၺႃးမူထိူၼ်ႇ ထုၺ်ႇ မိူဝ်ႈၽွင်းၵိၼ်ၸၢင်ႈပိတ်းၼဵင်ႈၼႂ်းသူၼ် တီႈဝၢၼ်ႈၼႃးလုၺ်း ဢိူင်ႇၶူင်ငိုၼ်း ၸႄႈဝဵင်းမိူင်းငေႃႉ မၢတ်ႇၸဵပ်းႁၢဝ်ႈႁႅင်း၊  ဢမ်ႇမီးငိုၼ်းတွင်းတဵမ်ထူၼ်ႈလႄႈ ယၢပ်ႇၽိုတ်ႇတႃႇယူတ်းယႃ ။

ၵူၼ်းၼႂ်းပိုၼ်ႉတီႈၵေႃႉၼိုင်ႈလၢတ်ႈတီႈၽူႈတွႆႇႁွၵ်ႈဝႃႈ – “မၼ်းပဵၼ်ၵူၼ်းပၢႆႈၽေးၵေႃႉၼိုင်ႈဢေႃႈ။ဢမ်ႇၸၢင်ႈမီးၵၢၼ်သင်ႁဵတ်းတေႉတေႉၶႃႈ။လိူဝ်သေ မႃးႁႃၵိၼ်ၸၢင်ႈပိတ်းၼဵင်ႈပၼ်ပိူၼ်ႈတီႈဝၢၼ်ႈၼႆႉ။မိူဝ်ႈမၼ်းတိုၵ်ႉပိတ်းၼဵင်ႈၼၼ်ႉ ဢမ်ႇထၢင်ႇသေ မီးမူထိူၼ်ႇတူဝ်ၼိုင်ႈ မႃးထုၺ်ႇတေႃးမၼ်းဢေႃႈ။ လုၵ်ႉၼႂ်းယုမ်းႁေလႅၼ်ႈလူင်ဢွၵ်ႇမႃးႁႃမၼ်းၼႆ။မၼ်းၵေႃႈ ႁိုဝ်တေတၼ်းၶႄတူဝ်လႃႇၼေႃႈ။ၽုတ်းလူင်ဢွၵ်ႇမႃးၵမ်းလဵဝ်ႁဵတ်းၼၼ်ၼႃႇ။ မေး မၼ်းၵေႃႈ ပႃးတွင်ႉဝႆႉၸမ်ၵိူတ်ႇယဝ်ႉ သမ်ႉပၢႆႈမီး လုၵ်ႈယိင်းဢွၼ်ႇဝႆႉထႅင်ႈလူးၵွၼ်ႇဢေႃႈ။ မၼ်းသမ်ႉမၢတ်ႇၸဵပ်းႁႅင်းဝႆႉမိူဝ်ႈလဵဝ် ”- ဝႃႈၼႆ။

ၵေႃႉဢၼ်ၺႃးမူထိူၼ်ႇထုၺ်ႇၼႆႉ ၸိုဝ်ႈႁွင်ႉ ၸၢႆးသၢင်ႇဢွၼ်ႇ ဢႃယု 48 ပီ ယူႇဝၢၼ်ႈၼမ်ႉမင်း ၸႄႈဝဵင်းၵျွၵ်ႉမႄး ယွၼ်ႉငဝ်းလၢႆးသိုၵ်းသိူဝ်ဢမ်ႇၼိမ်လႄႈ ပၢႆႈၽေးသေ မႃးၵိၼ်ၸၢင်ႈႁႃငိုၼ်းတီႈဝၢၼ်ႈၼႃးလုၺ်း ၸႄႈဝဵင်းမိူင်းငေႃႉ။မိူဝ်ႈလဵဝ် ၾၢႆၸုမ်းၶႂႆႇၶႃပႄလႅင် ၸွႆႈသူင်ႇယူတ်းယႃတူဝ်ဝႆႉ တီႈႁူင်းယႃလူင်ၵျွၵ်ႉမႄး။

ၵူၼ်းၼႂ်းပိုၼ်ႉတီႈၵေႃႉၼိုင်ႈသိုပ်ႇလၢတ်ႈဝႃႈ – “   မေးမၼ်းၵေႃႈ လိူၼ် 7 မႂ်ႇၼႆႉ တေၵိူတ်ႇလုၵ်ႈယဝ်ႉၼႆဢေႃႈၼၼ်ႉ။လုၵ်ႈယိင်းမၼ်း ၵေႃႉဢၼ်မီးဝႆႉၵေႃႈ ဢႃယု တိုၵ်ႉမီး 8 ၶူပ်ႇၵူၺ်း ။ယွၼ်ႉၼႂ်းၼႃႈႁိူၼ်းၶဝ် ဢမ်ႇမီးၵူၼ်း တႃႇတေႁႃငိုၼ်းလႆႈလီလီယဝ်ႉလႄႈ လူဝ်ႇၵႃႈယူတ်းၵႃႈယႃဢေႃႈၼၼ်ႉ ၵႃႈလႆႈယွၼ်းတၢင်းၵမ်ႉထႅမ် ပီႈပီႈၼွင်ႉၼွင်ႉၶဝ်ၽွင်ႈယဝ်ႉ ” – ဝႃႈၼႆ။

သင်ဝႃႈ ၽူႈမီးၼမ်ႉၸႂ်တီႈၸမ်တီႈၵႆ ၶႂ်ႈၸွႆႈၵမ်ႉထႅမ်ပၼ်ငိုၼ်းတွင်းၵႃယူတ်းယႃ ၸၢႆးသၢင်ႇဢွၼ်ႇၼႆႉ ၼႆၸိုင် ၵပ်းသိုပ်ႇတွင်ႈထၢမ် ႁူဝ်ယွႆႈမၼ်းလႆႈ တီႈမၢႆၾူၼ်း 09 760 653 789 ။