ၼၢင်းယိင်းၵူၼ်းၵျွၵ်ႉမႄးၵေႃႉၼိုင်ႈ ၶီႇရူတ်ႉၶိူင်ႈမႃး ပဵၼ်ၽေးၵိုင်ႉၵၢင်ႉလူမ်ႉသေသဵၼ်တူၵ်းတၢင်း တူၵ်းၶဝ်ႈၵႂႃႇၼႂ်းၵႄးၼမ်ႉ လူႉတၢႆ ။
မိူဝ်ႈၼႆႉ ဝၼ်းတီႈ 5/5/2023 ယၢမ်းႁူဝ်ၼႂ် 2 မူင်းၶိုင်ႈၼၼ်ႉ ၼၢင်းယိင်းၵေႃႉၼိုင်ႈ ၵူၼ်းပွၵ်ႉ 1 ဝဵင်းၵျွၵ်ႉမႄး ၵႂႃႇသူင်ႇၶူဝ်းသေပွၵ်ႈမႃးပဵၼ်ၽေးၵိုင်ႉၵၢင်ႉ ရူတ်ႉၶိူင်ႈလူမ်ႉတီႈၶူဝ်ၼမ်ႉၸၢဝ်းငၢဝ်း ရူတ်ႉၶိူင်ႈသဵၼ်တူၵ်းၼမ်ႉ မၼ်းၼၢင်းလူႉတၢႆ။
ၽူႈတူင်ႉၼိုင် ၼႂ်းၸုမ်းၼမ်ႉၶူင်း ၶႅၵ်ႇလီပၢင်ၸႃႇတႆးၵေႃႉၼိုင်ႈလၢတ်ႈတီႈၽူႈတွႆႇႁွၵ်ႈဝႃႈ – “ မၼ်းလုၵ်ႉတၢင်ႇတီႈသေပွၵ်ႈၶိုၼ်းႁိူၼ်းဢေႃႈၼၼ်ႉ။ တူၺ်းတႄႉ လႅပ်ႈငဝ်လပ်းသေ ရူတ်ႉၶိူင်ႈလူမ်ႉ တူၵ်းၼမ်ႉၵႂႃႇႁဵတ်းၼႆၶႃႈၼေႈ။ တီႈမၼ်းတူၵ်းၵႂႃႇၼႆႉ တၢင်းသုင် တေမီးမွၵ်ႈ 16 ပေႇၼႆႉ ။ တီႈၵွၵ်းႁူဝ်မၼ်း ၼႃႈမၼ်းၸိူဝ်းၼႆႉ မီးႁွႆးၸဵပ်းဢၼ်တူၵ်းလူင်းၵႂႃႇၽတ်ႉသႂ်ႇဝႆႉၼၼ်ႉၼႃႇ တူၵ်းလူင်းတၢႆထင်တီႈၼၼ်ႉယဝ်ႉ” – ဝႃႈၼႆ။
ၼၢင်းယိင်းဢၼ်လူႉတၢႆၵႂႃႇၼႆႉ ၸိုဝ်ႈ ၼၢင်းဢူင်းၺုၼ်ႉ ဢႃယု 39 ပီ ယူႇပွၵ်ႉ 1 ၼႃႈလိၼ် မၢႆ 6 ၸႄႈဝဵင်းၵျွၵ်ႉမႄး။ ၼႂ်းထူင်မၼ်းၼၢင်းဢၼ်ပႃးၵိုၵ်းတူဝ်ဝႆႉၼၼ်ႉမီး မၢႆၾၢင်(မၢတ်ႇပူင်ႇတိၼ်ႇ) ၊ ၶူဝ်းၸႂ်ႉသွႆၵမ်ႈၽွင်ႈလႄႈ ငိုၼ်းတွင်း ၵမ်ႈၽွင်ႈ။
မိူဝ်ႈလဵဝ် ၾၢႆႇၸုမ်းၶႅၵ်ႇလီပၢင်ၸႃႉ ၼမ်ႉၶူင်း ဢဝ်ၶၢပ်ႈတူဝ်သူင်ႇထိုင် ၽူႈမီးပုၼ်ႈၽွၼ်းၶဝ်သေ တိုၵ်ႉၵူတ်ႇထတ်းႁူဝ်ယွႆႈယႅမ်းဝႆႉယူႇ ဝႃႈၼႆ။
မိူဝ်ႈဝၼ်းတီႈ 2/5/2023 ၼႆႉၵေႃႈ ရူတ်ႉၶိူင်ႈလမ်းၼိုင်ႈ ပဵၼ်ၽေးၵိုင်ႉၵၢင်ႉ လူမ်ႉၼိူဝ်သဵၼ်ႈတၢင်းလူင် လႃႈသဵဝ်ႈ – သႅၼ်ဝီသေ ၽူႈၸၢႆး ၵေႃႉၼိုင်ႈ လႆႈမၢတ်ႇၸဵပ်းႁၢဝ်ႈႁႅင်း။
တီႈၸႄႈဝဵင်းလႃႈသဵဝ်ႈၵေႃႈ ၼႂ်းလိူၼ်ဢေႊပရိူဝ်ႊၼႆႉၵူၺ်း ၽေးၵိုင်ႉၵၢင်ႉ ရူတ်ႉၶိူင်ႈ/ ၵႃးၽႃႇၵၼ် ဢမ်ႇယွမ်း 20 ပွၵ်ႈ မီးၵူၼ်းလူႉတၢႆၸွမ်း 3 ၵေႃႉ မၢတ်ႇၸဵပ်း 26 ၵေႃႉယဝ်ႉ ဝႃႈၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ